इरानका सर्वोच्च नेता आयतोल्लाह अली खामेनी इसराइलसँगको युद्धपछि पहिलो पटक सार्वजनिक कार्यक्रममा देखिएका छन्।
इरानी सरकारी टेलभिजनले शनिबार खामेनीले एक मस्जिदमा नमाजका लागि उपस्थित भएकाहरूलाई अभिभादन गरेको दृश्य देखाएका थियो।
खामेनीको सार्वजनिक कार्यक्रममा त्यो पहिलो भौतिक उपस्थिती थियो। अशुराको सिया पर्वको एक दिन अघि उनी सार्वजनिक कार्यक्रममा देखिएको भनेर इरानी सरकारी टेलिभिजनलाई उद्धृत गरेर बिबिसीले उल्लेख गरेको छ।
इरान-इसराइल युद्ध उत्कर्षमा पुगेपछि खामेनी बंकरमा लुकेर बसेका थिए। युद्धविरामपछि पनि उनी देखिएनन्। युद्धविराम घोषणा भएको दुई दिनपछि उनको भिडिओ सन्देश सार्वजनिक भएको थियो।
त्यसले इसराइलसँगको युद्धमा खामेनी पनि मारिएको हुन सक्ने इरानीहरूको चिन्ता दूर गरेको थियो। यद्यपि उनको भौतिक उपस्थिती नहुँदा विभिन्न प्रश्न र चासो उठेका थिए।
खामेनी आफू पनि मारिन सक्ने भयले बंकरमा लुकेका थिए। विशेषगरी उनको नजिकका सहयोगीहरू मारिएपछि सर्वोच्च नेताको सुरक्षा जिम्मेवारी लिएको इस्लामिक रिभोलुसनरी गार्ड कोर (आइआरजिसी)ले उनलाई अत्यन्त कडा सुरक्षा घेरामा राखेको थियो।
देशव्यापी चिन्ता बढेपछि बंकरमै रेकर्ड गरिएको भिडिओ सार्वजनिक गरिएको थियो।
उनले त्यतिबेला इसराइल र अमेरिकालाई इरानले गतिलो जबाफ दिएको भनेका थिए।
उनले अमेरिकाले सशक्त आक्रमण गरेको दाबी गरे पनि त्यसको उपलब्धी शून्यकरिब रहेको बताएका थिए। इरानी आणविक भट्टीहरू अमेरिकाले दाबी गरेजस्तो सम्पूर्ण रूपमा ध्वस्त नभएको पनि खामेनीले बताएका थिए।
-1746009348.jpg)
