नेकपा (एमाले) निकट अनेरास्ववियुको २४ औं राष्ट्रिय महाधिवेशन आउन अब दुई दिन बाँकी छ। अनेरास्ववियुको महाधिवेशन जेठ २५ देखि २८ गतेसम्म काठमाडौंको कीर्तिपुरमा हुँदैछ।
महाधिवेशन नजिकिँदै जाँदा अध्यक्षलगायत अन्य पदका आकांक्षीहरू बढेका छन्।
अनेरास्ववियुले पहिलोपटक उमेरहदको प्रबन्ध गर्न लागेको छ। गत जेठ ११ गते बसेको एमाले सचिवालय बैठकले अनेरास्ववियुमा उमेरहदरको मापदण्ड लागू गर्ने निर्णय गरेको थियो। सोहीअनुसार ३२ वर्ष मुनिका र नियमित विद्यार्थीलाई महाधिवेशन प्रतिनिधि चयन गर्न र अनेरास्ववियुको कमिटीहरूमा ३२ वर्ष मुनिकालाई मात्रै राख्न एमाले महासचिव शंकर पोखरेलले परिपत्र गरिसकेका छन्। त्यसअघि एमालेले जनसंगठनहरूमा दुई तहको मात्रै कमिटी (सचिवालय र केन्द्रीय कमिटी) राख्ने र पदाधिकारीहरूको संख्या ९ मा सीमित गर्ने निर्णय गरेको थियो।
अखिलमा उमेरहद लाग्दा मौजुदा पदाधिकारीहरूमध्ये पाँच जना मात्रै बाँकी रहन्छन्। पाँच जना सचिवहरू ३२ वर्षमुनिका भएकाले तिनैमध्येबाट नेतृत्व चयन गर्ने तयारी भइरहेको छ। अहिले सचिवहरू प्रकाश पौडेल, दीपक धामी, डा. सुजन कडरिया, आरती भट्टराई र अञ्जना शिवाकोटी अध्यक्षको आकांक्षीको रूपमा छन्।
बिहीबार बेलुका प्रधानमन्त्रीसमेत रहेका पार्टी अध्यक्ष केपी शर्मा ओलीले अनेरास्ववियुका पूर्वअध्यक्ष वर्तमान पदाधिकारीहरूलाई बालुवाटार बोलाएर सहमतिमै नेतृत्व चयन गर्न जोड दिएका थिए। अखिलका पूर्वअध्यक्ष माधव ढुंगेल, किशोरविक्रम मल्ल, नवीना लामा, ऐन महर, सुनीता बरालसहित नेताहरू बालुवाटारको छलफलमा थिए। त्यस्तै जनसंगठन समन्वय संयन्त्र प्रमुख भानुभक्त ढकाल र अनेरास्ववियुमा वर्तमान पदाधिकारीहरूलाई पनि बालुवाटार बोलाइएको थियो।
छलफलमा अध्यक्ष ओलीले एमालेलाई चौतर्फी घेराबन्दी भइरहेकाले पार्टीको आन्तरिक एकतालाई कसिलो बनाउनुपर्ने खाँचो औंल्याएको सचिव प्रकाश पौडेलले जानकारी दिए।
‘उहाँले सहमतिमै नेतृत्व चयन गरेर जाँदा उपयुक्त हुने बताउनुभएको थियो। सहमति पनि लोकतान्त्रिक मूल्यमान्यताभित्रै पर्ने हुँदा एकले अर्कालाई नेतृत्वमा स्वीकारेर जाँदा पार्टीभित्रको लोकतन्त्र अझ बलियो हुने उहाँले बताउनुभयो,’ उनले भने।
सहमति नभएको खण्डमा स्वस्थ प्रतिस्पर्धा पनि स्वीकार्य हुने अध्यक्ष ओलीले बताएका थिए। पार्टीले कसैलाई पनि नबोक्ने बताउँदै जसले जिते पनि अनेरास्ववियु र महाधिवेशनको निर्णयलाई पार्टीले मान्ने बताएका थिए।
अर्का सचिव दीपक धामीले पनि अनेरास्ववियुमा सहमतिमै नेतृत्व टुंग्याउन अध्यक्ष ओलीले सुझाव दिएको बताए।
‘अहिले एमाललाई चर्को घेराबन्दी छ। यस्तो बेलामा सहमतिका साथ नेतृत्व चयन गर्दा एकताको सन्देश पनि जान्छ,’ अध्यक्ष ओलीको भनाइ उद्धृत गर्दै सचिव धामीले भने, ‘सहमति नहुँदा स्वस्थ प्रतिस्पर्धा गर्न सकिन्छ। तर सकेसम्म सहमतिमै जोड दिनुस्। यसले राम्रो सन्देश दिन्छ।’
अध्यक्ष ओलीले अखिलमा उमेरहद अहिलेको आवश्यकता भएकाले कार्यान्वयन गरेर जान पनि निर्देशन दिएका थिए। अनेरास्ववियुको नेता–कार्यकर्ता ३२ वर्षमुनिका र नियमित विद्यार्थीमध्येबाट हुँदा संगठनलाई गतिशील बनाउने अध्यक्ष ओलीको बुझाइ थियो।
