राष्ट्रिय प्रजातन्त्र पार्टी (राप्रपा)ले कमल थापासहित नेताहरूलाई पक्राउ गर्नु विचारलाई निषेध गर्ने सरकारको प्रयास रहेको धारणा सार्वजनिक गरेको छ।
आइतबार साँझ केन्द्रीय कार्यालय धुम्बाराहीमा बसेको केन्द्रीय कार्यसम्पादन समितिको आकस्मिक बैठकले सरकारले विचारलाई निषेध गर्न खोजेको निष्कर्ष निकालेको हो।
राप्रपाका प्रवक्ता मोहनकुमार श्रेष्ठले विज्ञप्ति जारी गर्दै भनेका छन्,‘प्रदर्शनका क्रममा राप्रपा नेपालका अध्यक्ष कमल थापा र अन्य ७ जनालाई प्रशासनले नियन्त्रणमा लिएको, गिरफ्तार हुनु भएकाहरूलाई भेट्न जाने क्रममा प्रतिनिधिसभाका सांसद मा. दिपकबहादुर सिंहलाई प्रहरी परिसरभित्रै नियन्त्रणमा लिइएको घटना संविधानको व्यवस्था विपरीत, अलोकतान्त्रिक, सर्वसत्तावादी र विचारलाई निषेध गर्ने प्रयास हो भन्ने पार्टीको प्रष्ट धारणा रहेको छ।’
राप्रपाले आइतबार निषेधित क्षेत्र नतोकिएको स्थान नारायणचौर, नक्साल क्षेत्रमै प्रशासनले हस्तक्षेप गरेको भन्दै भ्रत्सर्ना गरेको छ।
राप्रपाले थापा, सांसद सिंह सहित सबैलाई रिहाइ गर्न माग गरेको छ। रिहा नगरे थप आन्दोलन कार्यक्रमको घोषणा गर्ने चेतावनी समेत दिएको छ।
