नेपाली कांग्रेसका सभापति शेरबहादुर देउवाले नेपाललाई शिक्षाको हब बनाउनुपर्ने बताएका छन्।
नैनसिंह महर नेतृत्वको कांग्रेस शिक्षा विभागले काठमाडौंमा सोमबार गरेको कार्यक्रममा बोल्दै सभापति देउवाले नेपालमा राम्रो शिक्षा नभएको भन्दै अभिभावकले विदेश पढ्न आफ्ना सन्तानहरू पठाउने गरेको बताए।
‘नेपालमा राम्रो एजुकेसन छैन भन्ने हिसाबले होला, कतिपय आमाबुबाले छोराछोरी विदेश पढ्न पठाउँछन्। त्यसकारण नेपालमै राम्रो एजुकेसन दिने स्कुलदेखि लिएर युनिभर्सिटीसम्म हामीले बनाउनसक्यो भने हाम्रो देशको विद्यार्थी विदेश जानबाट रोकिन्छन्,’ सभापति देउवाले भने।
नेपालमा हावापानी पनि राम्रो भएकोले विदेशी विद्यार्थी पनि पढ्न आउन सक्ने उनले बताए।
‘त्यसको लागि नेपाल शिक्षाको हब बन्नसक्छ। त्यस्तो किसिमको शिक्षा नेपालमा हामीले दिनसक्यौं भने नेपालमा विदेशी विद्यार्थी आउन सक्छन्। नेपालनै शिक्षाको हब बन्नसक्छ। अहिलेको बेला शिक्षा नै महत्वपूर्ण कुरा हो। शिक्षालाई प्राथमिकता दिनुपर्छ,’ उनले भने।
(न्युज एजेन्सी नेपाल)
