जनमत पार्टी र नागरिक उन्मुक्ति पार्टीबीचको एकता प्रक्रियाप्रति नाउपाकी अध्यक्ष रञ्जिता श्रेष्ठ बेखुस देखिएकी छिन्।
आफूलाई तेस्रो वरीयतामा राख्ने गरी नागरिक उन्मुक्तिका संरक्षक रेशम चौधरी र जनमत पार्टीका अध्यक्ष सिके राउतबीच एकताको समझदारी भएपछि उनी असन्तुष्ट देखिएकी हुन्।
जनमत अध्यक्ष राउत र नाउपा संरक्षक चौधरी गत शनिबारदेखि नै एकताको गृहकार्यमा जुटेका थिए।
आइतबार बर्दियास्थित रेशम चौधरीको घरमै बसेर दुई शीर्ष नेताले पार्टीको नाम, आधारभूत नीति, नेतृत्व, झन्डा र चुनाव चिह्नसमेत टुंगो लगाएका थिए।
जनमतका उपाध्यक्ष अब्दुल खानका अनुसार दुई पार्टीबीच ९ बुँदे सहमति भइसकेको छ।
सहमतिअनुसार सिके राउत पार्टीको कार्यकारी अध्यक्ष हुनेछन्। नाउपा संरक्षक चौधरीको वरीयता पहिलो नम्बरमा हुनेछ। सिके राउत दोस्रो र सहअध्यक्षको भूमिका पाउने रञ्जिताको वरीयता तेस्रो नम्बरको हुनेछ।
सिके राउत र रेशम चौधरीबीच यसरी भएको एकीकृत पार्टीको वरीयता बाँडफाँटप्रति रञ्जिताले चित्त नबुझाएको नाउपाका केन्द्रीय सदस्य रामलाल डगौरा थारूले जानकारी दिए।
‘पार्टी एकताप्रति उहाँको सैद्धान्तिकरूपमा असहमति छैन। असहमति हुनुपर्ने कारण पनि म देख्दिनँ,’ उनले भने, ‘पार्टी एकता समानताको आधारमा हुनुपर्छ। पार्टी एकता गर्दा दुवै पार्टीका अध्यक्षको समान वरीयता हुनुपर्छ भन्ने उहाँको कुरा हो।’
दुई जना अध्यक्षलाई बराबर हैसियता र जिम्मेवारी दिएर एकता गर्दा सम्मानजनक हुने बुझाइ रञ्जिताको रहेको उनले बताए।
‘नाउपासँग सुदूरपश्चिम संघ र प्रदेशमा गरी १६ जना सांसद छन्। स्थानीय तहमा पनि राम्रै उपस्थिति छ। यी सबैका आधारमा सम्मानजन एकता हुनुपर्छ। वरीयतामा तलमाथि पार्न पाइँदैन भन्ने नै उहाँको दृष्टिकोण हो। एकताप्रति नै असन्तुष्ट रहेको भन्ने कुरा चाहिँ होइन,’ उनले भने।
संघीय संसदमा नाउपाका चार जना सांसद छन् भने सुदूरपश्चिम प्रदेश सभामा ७ सांसद छन्।
त्यस्तै लुम्बिनी प्रदेशमा चार जना जना सांसद छन् भने मधेस प्रदेशमा एक जना सांसद छन्। टीकापुर नगरपालिकाको मेयर, भजनी नगरपालिकामा मेयर, उपमेयर, जोशिपुर र जानकी गाउँपालिका अध्यक्ष, उपाध्यक्षलगायत स्थानीय तहमा सय हाराहारी जनप्रतिनिधि नाउपाका तर्फबाट निर्वाचित छन्।
अध्यक्ष रञ्जितानिकट अर्का केन्द्रीय सदस्यले भने उनी एकताप्रति नै बेखुसी रहेको दाबी गरे। जनमतसँगको पार्टी एकताको छलफलमा उनी कतै पनि दृश्यमा छैनन्।
आइतबार सिके राउत र रेशम चौधरी बसेर नेतृत्व बाँडफाँट गर्द पनि उनी देखिएकी थिइनन्। समझदारीको अघिल्लो दिन शनिबार सिके र रेशमले सामूहिक तस्बिर खिचाउँदा त्यहाँ पनि रञ्जिता देखिएकी थिइनन्।
‘यी सबै घटनाक्रमले पार्टी एकताप्रति रञ्जिता खुसी छैनन् भन्ने नै बुझिन्छ। रञ्जिता खुसी नहुनुको कारण अर्को पनि छ– रेशम चौधरीलाई वरीयताक्रममा अगाडि राख्ने भनिएको छ तर उहाँलाई निर्वाचन आयोगले चिन्दैन। पहिले पनि महाधिवेशन गरेर उहाँलाई अध्यक्ष बनाउन खोज्दा निर्वाचन आयोगले वैधता दिन अस्वीकार गर्यो। तसर्थ रेशम चौधरी पहिलो वरीयतामा रहने भने पनि पार्टीको कार्यकारी अध्यक्ष सिके राउत नै हुने हो। सहअध्यक्षको कुनै भूमिका हुँदैन। यसरी जानाजान आफ्नो भूमिका र जिम्मेवारी घटाउने गरी उहाँ एकता गर्न राजी हुनुहुन्न,’ ती केन्द्रीय सदस्यले भने।
नाउपाका संस्थापक २१ जना केन्द्रीय सदस्यमध्ये रञ्जितातर्फ ६ जना मात्रै छन्। त्यसमध्ये केहीले पार्टी छाडिसकेका छन्। कतिपय एकता प्रक्रियामा नजाने भनेर सार्वजनिकरूपमै अभिव्यक्ति दिइसकेका छन्।
बहुमत सदस्यहरूले एकतामा जाने निर्णय गरेपछि रञ्जितालाई पनि सामेल हुन करै लाग्छ। तर त्यो एकता दिगो हुनेमा ती केन्द्रीय सदस्यले शंका व्यक्त गरे।
यसबारे हामीले नाउपा अध्यक्ष रञ्जितासँग पनि कुरा गर्यौं। उनले आफू एकताप्रति बेखुस नरहेको प्रतिक्रिया दिइन्।
‘म एकताप्रति सन्तुष्ट छैन भन्ने कुरा साँचो होइन। किन असन्तुष्ट हुने हो र! पार्टी एकता हुने कुरा आफैमा राम्रो हो,’ सेतोपाटीलाई संक्षिप्त प्रतिक्रिया दिँदै उनले भनिन्।
दुई पार्टीबीच भएको सहमतिअनुसार चितवनपूर्वको नेतृत्व सिके राउतले गर्नेछन्। चितवन पश्चिमको पार्टी कामको अगुवाइ रेशम चौधरीले गर्नेछन्।
अब विधान र नियमावलीमात्रै टुंग्याउन बाँकी छ।
त्यसका लागि दुवै पार्टीको विधान प्रतिस्थापन कार्यदल बनेको छ। त्यसले एकीकृत पार्टीको विधान मस्यौदा गर्नेछ। त्यो मस्यौदालाई अलगअलग पार्टीको केन्द्रीय समितिमा छलफल गराएर पार्टी एकता घोषणा हुनेछ। वैशाख १५ गते एकता घोषणा गर्ने गरी दुई पार्टी अघि बढेको छ।
जनमत र नाउपा एकता भए संघीय संसदमा नेकपा (एकीकृत समाजवादी) सरह उनीहरूका सांसद हुनेछन्।
यो पनि:
जनमत–नाउपा एकता: चितवनपूर्व सिके, पश्चिम रेशम चौधरीले पार्टी कामको नेतृत्व गर्ने
सिके राउत र रेशम चौधरी पार्टी एकताको निर्णायक छलफलमा
यी तीन मुद्दामा मोर्चा कस्दै मधेसी दल
एकता टुंग्याउँदै नाउपा र जनमत, बाबुराम भट्टराई पनि छलफलमा
रेशम–रञ्जिताको झगडा, पार्टीमा आगो!
