समाजवादी मोर्चाले राजावादीहरूलाई आपराधिक र आततायी तत्त्वको संज्ञा दिँदै तुरून्तै कारबाहीको दायरामा ल्याउन आग्रह गरेको छ।
शुक्रबार राजसंस्था पुनर्स्थापनाको माग गर्दै राजावादीहरूले अराजकता मच्चाएपछि समाजवादी मोर्चाले यस्ता तत्त्वलाई कानुनी दायरामा ल्याई कडाभन्दा कडा कारबाही गर्न माग गरेको हो।
‘समाजवादी मोर्चाको आजको विशाल जनसमर्थन र सहभागिताबाट अत्तालिएका पुनरूत्थानवादी र उच्छृङ्खल प्रतिगामी तत्त्वहरूले अराजकता सृजना गर्दै नेपाल कम्युनिष्ट पार्टी (एकीकृत समाजवादी) को केन्द्रीय, काठमाडौं जिल्ला कार्यालय, अध्यक्ष कमरेड माधवकुमार नेपालका भाइ सरोज नेपालको निजी निवास लगायतमा तोडफोड र आगजनी गर्न पुगेका छन्। निजी, सार्वजनिक सम्पत्ति र कान्तिपुर एवम् अन्नपूर्ण पोष्ट लगायतका सञ्चार गृहमा समेत तोडफोड तथा आगजनी गरेका छन्,’ मोर्चाले विज्ञप्तिमार्फत् भनेको छ, ‘यो उच्छृङ्खल र अराजक कार्यको हामी घोर भर्त्सना एवं निन्दा गर्दछौं। यस कार्यमा संलग्न आपराधिक र आततायी तत्वलाई यथाशीघ्र कानुनी दायरामा ल्याई कडाभन्दा कडा कारबाही गर्न सरकारसँग माग गर्दछौं।’
मोर्चाले राजनीतिक दलको कार्यालय र नागरिकको जनधनको सुरक्षा गर्न सरकारसँग माग समेत गरेको छ।
