बेथिति, भ्रष्टाचार एवम् प्रतिगमनविरूद्ध समाजवादी मोर्चाको र राजसंस्थाका पक्षमा प्रदर्शन गरिरहेका मेडिकल व्यवसायी दुर्गा प्रसाईं नेतृत्वको आन्दोलनले संसद बैठक बस्न ढिलाइ भइरहेको छ।
निर्धारण गरिएको समयभन्दा दुई घन्टा विलम्ब भइसके पनि प्रतिनिधि सभा बैठक सुरू हुन सकेको छैन।
प्रदर्शनका कारण काठमाडौं उपत्यकाकै आवागमन प्रभावित बनेको छ। राजावादीहरूले तीनकुने क्षेत्रमा प्रदर्शन गरिरहेका छन्। उनीहरूको जुलुस भक्तपुरतर्फ, चाबहिल तर्फबाट तीनकुनेतिर आइरहेको छ।
यता समाजवादी मोर्चाको विजय जुलुस सभामा परिणत भएको छ।
काठमाडौंका ठाउँठाउँबाट जुलुस निस्किएकाले सांसदहरू बैठकमा उपस्थित हुन सकेका छैनन्।
प्रतिनिधि सभामा ‘बैंकिङ कसुर तथा सजाय (दोस्रो संशोधन विधेयक, २०८०’ का सम्बन्धमा राष्ट्रिय सभाबाट प्राप्त सन्देशसहितको विधेयक टेबुल गरिने कार्यसूची छ।
पूर्वाधार विकास समितिका सभापति दीपकबहादुर सिंहले ‘जलस्रोत विधेयकसम्बन्धी समितिको प्रतिवेदन, २०८१’ पेस गर्ने र ऊर्जा, जलस्रोत तथा सिँचाइ मन्त्री दिपक खड़काले ‘नवीकरणीय ऊर्जा तथा ऊर्जा दक्षता सम्बन्धी विधेयक, २०८१ लाई दफावार छलफलका लागि सम्बन्धित समितिमा पठाइयोस्’ भन्ने प्रस्ताव प्रस्तुत गर्ने कार्यसूची छ।
