प्रतिनिधि सभाको बुधबारको बैठकमा प्रमुख प्रतिपक्षी दल नेकपा (माओवादी केन्द्र) सहित विपक्षी दलहरूले कुलमान घिसिङलाई हटाएको भन्दै प्रधानमन्त्री केपी शर्मा ओलीबाट जबाफ माग गरे।
सरकारले नेपाल विद्युत प्राधिकरणको कार्यकारी निर्देशकबाट घिसिङलाई हटाएकोमा विपक्षी दलहरूले प्रधानमन्त्री ओलीबाट जबाफ सुन्न चाहेका थिए।
तर प्रतिनिधि सभा बैठकमा प्रधानमन्त्री ओली उपस्थित थिएनन्।
विपक्षी दलहरूले प्रधानमन्त्रीको जबाफ माग गर्दै प्रतिनिधि सभा बैठक अवरोध गरिरहेका बेला प्रधानमन्त्री ओलीले भने बालुवाटारमा सत्ता गठबन्धन दलहरूको बैठकमा व्यस्त थिए।
विपक्षी दलका तर्फबाट प्रतिनिधि सभामा बोल्दै माओवादी केन्द्रका सांसद शक्तिबहादुर बस्नेतले राम्रो काम गर्ने कर्मचारी घिसिङलाई सरकारले दण्डित गरेको भन्दै प्रधानमन्त्रीसँगै त्यसको जबाफ माग गरेका थिए।
‘तमाम विकृति, विसंगती, भ्रष्टाचारको संरक्षण गरेको सन्दर्भ उठिराखेको छ। यस्तो बेलामा राम्रो काम गर्ने कर्मचारीलाई पनि दण्डित गर्ने काम भएको छ। यो सामान्य कर्मचारी हेरफेरको मात्रै विषय होइन। सुशासनको प्रश्न पनि हो,’ उनले भने।
प्रमुख प्रतिपक्षीलगायत विपक्षी दलहरूले सदनमा उठेर विरोध जनाएपछि संसद बैठक आधा घन्टा स्थगित भएको छ। विपक्षी सांसदहरू उठेर अवरोध गरिरहेपछि सभामुख देवराज घिमिरेले आघा घन्टाका लागि बैठक स्थगित गरेका हुन्।
प्रधानमन्त्री केपी शर्मा ओलीले बुधबार नै सत्ता साझेदार दलहरूको बैठक बोलाएका थिए। बैठक अहिले प्रधानमन्त्री निवास बालुवाटारमा बसिरहेको छ।
सत्ता साझेदार दलहरूको बैठक मंगलबार नै बोलाइएको थियो। तर जनता समाजवादी पार्टी नेपालका अध्यक्ष उपेन्द्र यादव नआएपछि बैठक एजेन्डामा प्रवेश गर्न सकेन।
भूमि अध्यादेशलगायत विषयमा छलफल गर्न सत्ता गठबन्धन बैठक बसेको हो।
