नेकपा (एकीकृत समाजवादी) को केन्द्रीय कमिटी बैठक स्थगित भएको छ।
संविधान सभा सदस्य एवम् पार्टी पोलिटब्युरो सदस्य विदुर सापकोटाको निधन भएपछि बैठक स्थगित भएको पोलिटब्युरो सदस्य मोहन गौतमले जानकारी दिए।
‘पार्टीका नेता विदुर सापकोटाको निधन भएपछि आजको बैठक स्थगित भएको छ। भोलिबाट बैठक बस्नेछ,’ उनले भने।
एकीकृत समाजवादीको बिहीबारबाट केन्द्रीय कमिटीको दोस्रो बैठक बस्दै थियो। ललितपुरको जावलाखेलमा बैठक सुरू हुँदै थियो।
पोलिटब्युरो सदस्य सापकोटाको निधन भएपछि बैठक रोकिएको हो। सापकोटाको ५९ वर्षको उमेरमा बिहीबार बिहान ३ः४५ बजे काठमाडौंको हेल्पिङ ह्यान्डस् अस्पतालमा निधन भएको हो।
उनी पार्टीको बागमती प्रदेशको सहइन्चार्जसमेत थिए। सापकोटा २०७० सालको संविधान सभा निर्वाचनमा तत्कालीन काभ्रे–४ बाट निर्वाचित भएका थिए।
उनी एमाले काभ्रेको १४ वर्ष पार्टी प्रमुखसमेत भइसकेका थिए।
