नेकपा एमालेका वरिष्ठ नेता तथा पूर्वप्रधानमन्त्री झलनाथ खनालले दोस्रो चरणको निर्वाचनबाट मुलुक आर्थिक समृद्धितर्फ अघि बढ्ने बताएका छन्। इलामको रोङ गाउँपालिका अन्तर्गत जिर्मलेको सलकपुरमा शनिबार आयोजित चुनावी सभालाई सम्बोधन गर्दै उनले सरकारको लाचारीपनले गर्दा प्रदेश नं २ को चुनाव सरेको बताए।
पूर्वप्रधानमन्त्री खनालले चुनावपछि एमाले पहिलो पार्टी बन्ने विश्वास व्यक्त्त गरे।
‘पश्चिम क्षेत्रमा त नेकपा एमालेको जनलहर देखियो, अब पूर्वमा पनि एमालेको त्यस्तै लहर चल्छ,’ नेता खनालले भने, ‘अब एमालेलाई मुलुककै पहिलो पार्टी हुनबाट कुनै ताकतले रोक्न सक्दैन।’
जनतामा चुनावप्रतिको व्यापक उत्साह रहेको बताउँदै उनले संविधान कार्यान्वयनका लागि पनि तोकिएकै समयमा तीनै तहको निर्वाचन सम्पन्न गर्नुपर्ने अपरिहार्यता रहेको अौंल्याए।
पर्यटनको सम्भावनायुक्त जिल्ला भएकाले इलामलाई सोही अनुरुप विकास गर्नुपर्ने उनको भनाई थियो।
देशको स्वतन्त्रता र सार्वभौमसत्ता, लोकतन्त्रको संस्थागत विकास, सामाजिक रूपान्तरण, संस्कृतिको जगेर्ना र सन्तुलित विदेश नीति लिएर एमाले अघि बढ्ने उनले बताए। रासस
