द ब्रिटिस कलेज (टिबिसी) र सिन्धुलीको फिक्कल गाउँपालिकाबीच नवप्रवर्तन र उद्यमशीलता प्रवर्द्धनका लागि सहकार्य भएको छ।
ब्रिटिस एजुकेसन ग्रुप अन्तर्गतको ब्रिटिस कलेजका सह–संस्थापक तथा कार्यकारी निर्देशक महेन्द्रराज कँडेल र फिक्कल गाउँपालिकाकी अध्यक्ष पार्वती सुनुवारले नवप्रवर्तन, उद्यमशीलता र दिगो विकासलाई प्रवर्द्धनको लागि सम्झौतापत्रमा हस्ताक्षर गरे।
ब्रिटिस कलेज इन्क्युबेसन सेन्टरका प्रमुख गणेश पौडेल र फिक्कल गाउँपालिकाका उपाध्यक्ष राजु बरालको उपस्थितिमा भएको सम्झौताले दुबै संस्थाले स्थानीय उद्यमीहरूका लागि स्टार्टअप इन्क्युबेसन र मार्गदर्शन गर्ने, डिजिटल साक्षरता, व्यापार र प्रविधिमा सीप विकास कार्यशालाको आयोजना गर्ने, कृषि प्रविधि, ग्रामीण पर्यटन, र हस्तकला आधारित स्टार्टअपहरूमा सहयोग गर्ने उद्देश्य लिएको छ।
साथै, स्मार्ट गाउँ तथा डिजिटल शासन प्रणालीको प्रवर्द्धन गर्ने, उद्यमशीलतासम्बन्धी नीति निर्माणमा सहयोग गर्ने साथै, ग्रामीण नवप्रवर्तकहरूलाई बजार तथा लगानी पहुँच विस्तार गर्ने योजना रहेको छ।
सम्झौतापछि प्रतिक्रिया दिँदै ब्रिटिस कलेजका कार्यकारी निर्देशक कँडेलले भने, 'यो साझेदारी टिबिसीको ग्रासरुटमा आधारित नवप्रवर्तनप्रतिको प्रतिबद्धता हो। हाम्रो इन्क्युबेसनमा जोडिएका विद्यार्थी तथा व्यवसायिक संस्थाहरू बीचका विशेषज्ञता प्रयोग गरी फिक्कलका युवा र किसानहरूको उद्यमशिल सम्भावनाको खोजी र अनुसन्धान गर्दै त्यसलाई बजार र प्रविधिसँग जोडिदिने कार्यको थालनी हुनेछ।'
त्यस्तै, फिक्कल गाउँपालिकाकी अध्यक्ष पार्वती सुनुवारले भनिन्, 'यो समझदारी हाम्रो समुदायका लागि रूपान्तरणकारी कदम हो। टिबिसीसँगको सहकार्यले रोजगारी सिर्जना, सीप अभिवृद्धि, र स्थानीय अर्थतन्त्रलाई बलियो बनाउन सहयोग पुर्याउनेछ।'
टिबिसी इन्क्युबेशन सेन्टरका प्रमुख गणेश पौडेलले पनि आफूहरू नवप्रवर्तनलाई विकेन्द्रित गर्दै समावेशी आर्थिक अवसर सिर्जना गर्ने लक्ष्यमा रहेकोले यो साझेदारी महत्त्वपूर्ण रहेको बताए।
समझदारी अनुसार दुवै संस्थाले संयुक्त रूपमा ‘स्टिरिङ कमिटी’ गठन गरी कार्यक्रमहरूको योजना, कार्यान्वयन र मूल्यांकनको जिम्मा लिनेछन्। प्रारम्भिक कार्यक्रमहरू साझा स्रोतको प्रयोगबाट सुरू गरिनेछ भने दीर्घकालीन योजना तथा ठूला परियोजनाहरूका लागि बाह्य लगानी र सिएसआर खोजिनेछ।
-1742801159.jpg)
