काठमाडौं मोडल कलेज (केएमसी) ले विश्वविद्यालय अनुदान आयोग (युजिसी) नेपालको सहकार्यमा वैशाख ११ देखि १३ गतेसम्म तीन दिने ‘रिसर्च आर्टिकल लेखन कार्यशाला’ सफलतापूर्वक सम्पन्न गरेको छ।
कार्यशालामा काठमाडौंका १० वटा कलेज तथा विश्वविद्यालयहरूबाट ६० जना प्राध्यापक र अनुसन्धानकर्ताहरूले सहभागिता जनाएका थिए, जसले शैक्षिक आदानप्रदान र अनुसन्धान प्रवर्द्धनका लागि एक जीवन्त प्लेटफर्म निर्माण गरेको थियो।
कार्यशालाको उद्घाटन विश्वविद्यालय अनुदान आयोगका अध्यक्ष प्रा.डा. देवराज अधिकारीले गरे।
उद्घाटन समारोहमा बोल्दै उनले अनुसन्धान लेखन सीपले शैक्षिक उत्कृष्टता अभिवृद्धिमा महत्त्वपूर्ण भूमिका खेल्ने बताए।
सहभागीहरूमा विभिन्न शैक्षिक संस्थाहरूका अध्यापकहरू तथा एमफिल र पिएचडी तहका शोधार्थीहरू समावेश थिए।
कार्यशालामा सह–प्राध्यापक डा. भरतसिंह थापा, सह–प्राध्यापक डा. रेवानकुमार दाहाल, डा. अमिना सिंह, प्राध्यापक डा. सुरेन्द्र महतो, डा. गंगाराम विश्वकर्मा, सह–प्राध्यापक डा. प्रकाश पौडेल, सह–प्राध्यापक डा. दिनेश बस्नेत, प्रा.डा. अर्हान स्थापित र प्रा.डा. महानन्द चालिसेजस्ता प्रतिष्ठित प्रशिक्षकहरूले १२ वटा विषयमा प्रशिक्षण दिए।
प्रशिक्षणले सहभागीहरूलाई गुणस्तरीय अनुसन्धान लेख तयार पार्न आवश्यक व्यावहारिक रणनीतिहरूमा दक्ष बनाएको थियो।
कार्यशालाको उद्घाटन तथा समापन कार्यक्रम केएमसी आन्तरिक गुणस्तर सुनिश्चितता इकाईका प्रमुख ध्रुवप्रसाद तिमल्सेनाले सञ्चालन गरेका थिए।
अन्तिम दिन सहभागीहरूले आर्जित सीपहरूको व्यावहारिक प्रयोग प्रस्तुत गरेका थिए र प्रमाणपत्र वितरण कार्यक्रमसमेत सम्पन्न गरिएको थियो। त्रिभुवन विश्वविद्यालय व्यवस्थापन संकायका डीन प्रा.डा. महानन्द चालिसेले प्रमाणपत्र वितरण गरे।
उनले निजी शैक्षिक संस्थाहरूमा बढ्दो अनुसन्धान पहलको प्रशंसा गर्दै त्रिभुवन विश्वविद्यालयको निरन्तर सहयोगको प्रतिबद्धता व्यक्त गरे।
कलेज प्रमुख सुरेन्द्र सुवेदीले अनुसन्धान संस्कृतिको प्रवर्द्धनमा केएमसीको दृढ प्रतिबद्धता व्यक्त गरे।
काठमाडौं मोडल कलेज अन्तर्गत अनुसन्धान अनुसन्धान समितिका संयोजक प्रा.डा. श्रीधर गौतमले कार्यशालाको सफलताप्रति सन्तोष व्यक्त गर्दै सहभागीहरूलाई बधाइ ज्ञापन गरे।
कार्यक्रम समापनमा आयोजकले विश्वविद्यालय अनुदान आयोगप्रति विशेष आभार व्यक्त गरेको थियो।
सहभागीहरूले कार्यशालाले अनुसन्धान लेखन क्षमतामा उल्लेखनीय सुधार ल्याएको र यसले उनीहरूको शैक्षिक तथा व्यावसायिक विकासमा महत्त्वपूर्ण योगदान पुर्याएको प्रतिक्रिया दिएका छन्।
