होटल एसोसिएसन अफ नेपाल (हान) पोखरा च्याप्टरले नयाँ वर्ष २०८२ का अवसरमा लेकसाइडमा फेवा महोत्सव आयोजना गरेको छ।
आगामी चैत ३० गतेदेखि वैशाख १ गतेसम्म महोत्सव आयोजना गरेको हान पोखराका अध्यक्ष लक्ष्मण सुवेदीले बताए।
‘नेपाली नयाँ वर्ष मनाउन हामीले पोखरामा बर्सेनि फेवा महोत्सव आयोजना गरेका छौं,’ सुवेदीले भने, ‘नयाँ वर्ष मनाउन पोखरा आउने पर्यटकले होटलमा बस्दा कम्तीमा २० प्रतिशत छुट पाउनुहुनेछ।’
उनका अनुसार महोत्सव फेवाताल किनारमा हुनेछ। फेवाताल किनार ड्यामसाइडदेखि खहरेसम्म सडकमै महोत्सव सञ्चालन हुनेछ। सडकमा सवारी रोकेर नेपाली कला, संस्कृति र कला प्रस्तुत गर्ने कार्यक्रम तय गरिएको अध्यक्ष सुवेदीले बताए।
पर्यटन, संस्कृति र खाना भन्ने नाराका साथ आयोजित महोत्सवमार्फत् नेपाली खानाको प्रवर्द्धन गर्ने हान पोखराका महासचिव राजेन्द्र ढकालले जानकारी दिए।
रैथाने र परम्परागत खानाको प्रदर्शनी, सांस्कृतिक कार्यक्रम, मनोरञ्जन र खेलकुदका कार्यक्रम, पर्यटक दौड, पप कन्सर्ट, कृषि र हस्तकलाका सामग्रीको प्रदर्शनी र लोक दोहोरीका कार्यक्रम महोत्सवका प्रमुख आकर्षण रहने उनले बताए।
महोत्सव सम्पन्न गर्न विभिन्न समिति र उपसमितिहरू गठन गरिएको छ।
महोत्सवकै प्रचारका लागि हान पोखराले फागुन अन्तिम साता पूर्वी नेपालमा ‘जाउँ है पोखरा’ अभियान सम्पन्न गरेको थियो। अब पश्चिम नेपालमा पनि यस्तै अभियान चलाउने हान पोखराले जनाएको छ।
यस्ता कार्यक्रमले पोखरा आउने पर्यटकको संख्या वृद्धि भएको हान पोखराका अध्यक्ष सुवेदीले दाबी गरे।
उनका अनुसार पर्यटक वृद्धि हुँदै जाँदा अहिले पोखराका होटल ४० भरिएका छन्। पोखरा आउने विदेशी पर्यटकको संख्या पनि पर्यटकीय सिजन सुरू भएसँगै बढ्न थालेका छन्।
पोखराका एक हजार दुई सय होटलमा ४० हजार पर्यटक स्तरका बेड रहेका छन्। पोखराका होटलमा निजी क्षेत्रले ५ खर्ब रुपैयाँ लगानी गरेको हानको रेकर्डमा छ।
सांस्कृतिक झाँकीसहित अम्मटमा महोत्सवको उद्घाटन कार्यक्रम हुनेछ।
नेपाल पर्यटन बोर्ड गण्डकीका प्रमुख मणिराज लामिछानेले फेवा महोत्सवले पोखराको पर्यटन प्रवर्द्धनमा टेवा पुग्ने भनाइ राखे।
हानका केन्द्रीय सदस्य भरतराज पराजुलीले पर्यटनका लागि सकारात्मक माहौल बनाउन यस्ता महोत्सवले सहयोग गर्ने बताए।
