बैकल्पिक आन्तरिक विमानस्थल बनाउन बनेपाको नागिडाँडा सिफारिस

विमानस्थल बनाउन सिफारिस गरिएकाे बनेपाकाे नागिडाँडा।


त्रिभुवन अन्तर्राष्ट्रिय विमानस्थलको आन्तरिक उडान÷अवतरणलाई सार्न बैकल्पिक विमानस्थल बनाउने ठाउँको खोजीमा रहेको सरकारलाई बनेपाको नागिडाँडा सिफारिस गरिएको छ।

संस्कृति पर्यटन तथा नागरिक उड्डयन  मन्त्रालयले काभ्रेका विभिन्न चार ठाउँको अध्ययन गरी उपयुक्त ठाउँ सिफारिस गर्न गठन गरेको प्राविधिक समितिले बनेपानको नागिडाँडालाई सिफारिस गरेको छ।

इन्जिनियर कमल कुमार केसीको संयोजकत्वमा,ध्रुवदास मोछिमोया, बाबुराम पौडेल, सुवर्णराज उपाध्याय, सिताराम भण्डारी र नलविक्रम थापासहितको समूहले मन्त्रालयलाई प्रतिवेदन बुझाएको छ।

समितिले बनेपाको नागिडाँडा, धुलिखेलको ठुलीचौर र चिसापानी ठुलीचौरमा यस अघिका अध्ययनको आधारमा उक्त सिफारिस गरेको हो।

आर्थिक, भौगोलिक र अवस्थितिका हिसाबले बनेपाको नागिडाँडा उपयुक्त हुने समितिको निष्कर्ष रहेको छ।

६ सयदेखि १२ मिटरको धावनमार्ग भएको विमानस्थल बनाउन सकिने छ। निर्णय भएको मितिले पाँचवर्षसम्मको समय लाग्ने समितिको प्रतिवेदनमा उल्लेख गरेको छ।

निर्णय भएको मितिले एकवर्षभित्र खरिद प्रक्रिया पुरा गर्नसकिने समितिको अनुमान छ।

विमानस्थल बनाउनको लागि त्रिभुवन अन्तर्राष्ट्रिय विमानस्थलसँग जोडिएको ‘एक्सकुलुसिभ’पूर्वाधार बनाउनुपर्ने समितिको सिफारिस गरेको छ।

समितिको सिफारिसका आधारबाट निर्णय गरेर आागमी वर्षको बजेटमा समावेस गर्ने तयारीमा मन्त्री रविन्द्र अधिकारी रहेका छन्।

विमानस्थल बनेपनिछ काठमाडौंबाट दुर्गम क्षेत्रमा हुने उडानको ३१ प्रतिशतसम्म ट्राफिक व्यवस्थापन गर्न सकिने प्रारम्भिक अनुमान गरिएको छ।

त्रिभुवन अन्तर्राष्ट्रिय विमानस्थलबाट ८.५ नटिकल माइल दुरीमा रहेको नागिडाँडामा विमानस्थल बनेपछि लुक्ला, फाप्लु, तुम्लिङटार, भोजपुर र जोमशोममा हुने उडानको २० प्रतिशत हिस्सा व्यवस्थापन हुने छ।

त्यस्तै १५ देखि २० प्रतिशत हेलिकप्टर उडान पनि नागिडाँडाबाटै अपरेट हुनसक्नेछन्।

समितिले नागिडाँडामा विमानस्थल बनाउने निष्कर्षमा पुग्न अगाडि त्यहाँको हावा, भिजिविलिटी लगायतका मौसमी अध्ययन गर्नुपर्ने सुझाएको छ। त्यस्तै त्यहाँको एयर ट्राफिक व्यवस्थापन र सुरक्षा एसिसमेन्ट गर्नपनि उसकाे सिफारिस छ।

यद्यपी विमानस्थलकाे व्यावसायिक र अार्थिक सम्भाव्यता भने विस्तृत अध्यन पछिमात्र थाहा हुनेछ।

नागिडाँडामा बन्ने विमानस्थलकाे स्केच

राजधानी नजिकैको दुर्गम विमानस्थलको रुपमा बन्ने ठानिएको उक्त विमानस्थल बनाउन ३ देखि १० अर्ब रुपैयाँ लाग्ने आँकलन गरिएको छ। भैरहवामा बनिरहेको अन्तर्राष्ट्रिय विमानस्थल भन्दा बढी लागत लाग्ने उक्त विमानस्थल जसरी पनि बनाउने मन्त्री अधिकारीले यसअघि नै उद्घोष गरिसकेका छन्।

नागरिक उड्डयन प्राधिकरणदेखि मन्त्रायकै अधिकांस अधिकारीहरु उक्त विमास्थल लाभदायक नभएको बताउछन्। तर पनि मन्त्ती अधिकारी भने जसरी पनि बनाउने तयारीमा छन्।

नागिडाँडामा विमानस्थल बनिहाले पनि ठुला जहाजबाट उडान हुने रुटमा त्यहाँबाट उडान सम्भव नहुने, आन्तरिक विमानस्थल राजधानी सहरभन्दा धेरै टाढा हुने लगायतका कारणले बनिहाले पनि त्यसले सफलता पाउनेमा नागरिक उड्डयन प्राधिकरणकै अधिकारीहरुको शंका छ।

तर मन्त्री अधिकारी भने नागरिक उड्डयन प्राधिकरणले यसअघि नै गरेका अध्ययनबाट विमानस्थल बनाउन सम्भव देखिएको र यसले साना जहाजको कारणले अन्तर्राष्ट्रिय उडानमा हुने प्रभाव कम गर्न भएपनि जसरी पनि बनाइ छाड्ने बताउछन्।

नागरिक उड्डयन प्राधिकरणले यसअघि गरेका अध्ययन पूर्वसम्भाव्यता अध्ययन हो जसबाट प्राविधिकरुपमा विमानस्थल बनाउन सकिन्छ कि सकिंदैन भन्नेमात्र हो जसले व्यवसायिकरुपमा सम्भव छ कि छैन भन्ने कुनै अध्ययन गरेको छैन।

यसअघि काभ्रेमै विमानस्थलको सम्भाव्यता भन्दै करोडौं रुपैयाँ प्राधिकरणले खर्च गरिसकेको छ।

नागिडाँडाको विमानस्थल अधारभुत भन्दा पनि प्रिमियम विमानस्थलको रुपमा हुने एक अधिकारिको भनाइ छ।

Share:

© 2017 Setopati Sanchar Pvt. Ltd.