विद्युत प्राधिकरणका नवनियुक्त कार्यकारी निर्देशक हितेन्द्रदेव शाक्यले मंगलबार पदभार ग्रहण गरेका छन्। सरकारले सोमबार कुलमान घिसिङलाई बर्खास्त गरेर शाक्यलाई नियुक्त गरेको थियो।
यसअघि २०७७ सालमा उनै शाक्य बर्खासीमा परेका थिए र उनको ठाउँमा घिसिङ प्राधिकरणको कार्यकारी निर्देशक बनेका थिए।
२०७७ फागुनमा चार वर्षका लागि प्राधिकरणको कार्यकारी निर्देशक बनेका शाक्यलाई ६ महिना नपुग्दै बर्खास्त गरिएको थियो। त्यसलगत्तै शाक्य अन्याय भयो भन्दै अदालत गएका थिए। उनले भनेका थिए, 'म बर्खास्तमा परेभन्दा पनि काल पल्कियो भन्ने चिन्ता हो।'
अहिले कुलमानलाई पनि कार्यकाल पूरा हुन चार महिना बाँकी छँदा त्यसैगरी बर्खास्त गरिएको छ।
यसै सन्दर्भमा हामीले हितेन्द्रदेव शाक्यसँग संक्षिप्त कुराकानी गरेका छौं।
हामीले उनलाई सोध्यौं — त्यति बेला तपाईं अन्याय भयो भन्दै अदालत जानुभएको थियो। अहिले कुलमानको त्यस्तै अवस्था आयो। तपाईंलाई अन्याय भएको थियो भने कुलमानलाई पनि त अन्याय भयो होला नि?
जबाफमा उनले भने, 'हो, त्यति बेला मैले अन्याय भयो भनेको थिएँ। अन्याय भएकै हो। अदालतबाट समेत न्याय निरूपण भएन। तर त्यति बेलाको प्रक्रिया र अहिलेको प्रक्रिया एउटै छैन। मलाई सामान्य स्पष्टीकरणको मौकासमेत दिइएको थिएन। मसँग गरिएका कुनै पनि करार सम्झौता पालना भएन। सरकारले एकपक्षीय रूपमा हटाउने निर्णय गरेको थियो। अहिले पर्याप्त स्पष्टीकरणको मौका दिइएको छ। सरकारसँग भएको करार सम्झौतामा टेकेर निर्णय लिइएको छ। त्यस कारण एउटै परिस्थिति होइन।'
उनले यसअघि कार्यकारी निर्देशक नियुक्त हुँदा आफूले चार वर्षको योजना बनाएको बताए। निकै छोटो अवधिमा निकालिएकाले योजनाअनुसार काम गर्न नपाएको उनको भनाइ छ।
'म निस्किएपछि बीचमा कतिपय काम भए, कतिपय भएनन्। अब यी सबै सच्याउने प्रयास गर्छु,' उनले भने, 'कुलमानजीले अघि बढाउनुभएका राम्रा कामलाई निरन्तरता दिने छु। मेरो सोचअनुसार हुन नसकेका कामहरू अघि बढाउने छु।
'मेरो लागि यो जिम्मेवारी उपयुक्त हो भन्ने नै लाग्छ। विद्युत प्राधिकरणलाई सही ढंगमा ड्राइभ गरेर अघि बढ्छु,' उनले भने।
'कुलमानजीको कार्यकालमा कुन काम गर्न छुटेजस्तो लाग्छ?'
हाम्रो यो प्रश्नमा उनको जबाफ थियो, 'प्रोजेक्ट विशेषमा अहिले नजाऊँ। हामीले उद्योग क्षेत्रमा ऊर्जा खपतको योजना अघि सार्नुपर्ने छ। आज भनेर भोलि खपत बढ्ने होइन। यसका लागि पर्याप्त योजना चाहिन्छ, लगानी चाहिन्छ। अब खपत वृद्धिका योजनाहरू अघि सारिनेछ। बिजुली व्यवस्थापनको विषयमा पनि हामीले धेरै काम गर्न सकेका छैनौं।'
उनले अगाडि भने, 'हामीले ऊर्जा सुरक्षामा पनि धेरै काम गर्नुपर्ने छ। महँगो परे पनि ऊर्जा भण्डारमा काम गर्नुपर्ने छ।'
पछिल्लो समय उद्योगहरूले १४ घन्टासम्म लोडसेडिङ खेप्नुपरेको गुनासो गरिरहेका छन्। यसको व्यवस्थापन कसरी गर्ने भनेर हामीले शाक्यलाई सोध्यौं।
'अहिलेको समय निकै चुनौतीपूर्ण छ। अझै केही साता सुख्खा रहनेछ। तर बर्खा याममा विद्युत बढी हुन्छ। त्यसैले पनि हामीले विद्युत खपत बढाउनुपर्ने छ,' उनले भने, 'विद्युत खपत धेरै बढाउन औद्योगिक क्षेत्रको खपतमै बढी ध्यान दिनुपर्ने हुन्छ।'
ओद्योगिक क्षेत्रमा लोडसेडिङ सुरू भएपछि आममान्छेमा पनि लोडसेडिङको डर छाएको छ। के देशले फेरि लोडसेडिङ झेल्नुपर्ने अवस्था आउनसक्छ? यसबारे सोध्दा उनले औद्योगिक क्षेत्रमा लोडसेडिङको समस्या भए पनि घर-घरमा लोडसेडिङ गर्नुपर्ने स्थिति नआउने विश्वास दिलाए।
'अहिले औद्योगिक क्षेत्रमा बढी लोडिसेडिङ भएको गुनासो छ। भारतसँगको विद्युत व्यापारमा पनि अस्वस्थता देखिएको छ। धेरै चुनौतीहरू छन्। तर घर-घरमा लोडसेडिङ हुन्छ कि भनेर चिन्ता गर्नुपर्दैन,' उनले भने, 'औद्योगिक क्षेत्रमा पनि लोडसेडिङ कम गर्ने केही उपाय छन्। मैले जिम्मेवारी लिएपछि ती उपाय अवलम्बन गरेर बिजुली आपूर्ति बढाउन कदम चालिने छ।'
हामीले डेडिकेटेड र ट्रंकलाइनको सवालमा विद्युत प्राधिकरण र उद्योगीहरूबीच जारी विवादबारे पनि कुरा गर्यौं। प्राधिकरणले उठाउन बाँकी अर्बौं रूपैयाँ बक्यौता कसरी उठाउने भनेर पनि सोध्यौं।
यसमा शाक्यको जबाफ छ, 'न्याय निरूपण गर्नुपर्ने व्यक्ति नै सम्बन्धित मुद्दामा संलग्न भएपछि त्यसलाई 'दूषित केस' का रूपमा हेरिन्छ। ट्रंक र डेडिकेटेड लाइन प्रकरण त्यही कारणले अहिलेसम्म समाधान हुन नसकेको हो। यो प्रसंगमा म कहीँ कतै संलग्न छैन। त्यसैले सही ढंगले निरूपण गर्न सक्छु भन्ने मेरो बुझाइ छ। दुईपक्षीय सर्तहरू हेरेर बक्यौता उठाउने र संवादबाट समस्या समाधान गर्ने काम हुनेछ।'
***
यी पनि पढ्नुहोस्:
