नेपाल विद्युत प्राधिकरणका नवनियुक्त कार्यकारी निर्देशक हितेन्द्रदेव शाक्यको पदभार ग्रहण गरेका छन्।
मंगलबार साँझ प्राधिकरणको कार्यालय गएर उनले पदभार ग्रहण गरेका हुन्।
उनलाई कर्मचारीहरूले फूलमाला, खादा लगाएर स्वागत गरेका थिए।
पदभार ग्रहणपश्चात उनले साढे ३ वर्ष अदालतको ढोका ढक्ढकाउँदा पनि न्याय नपाएको भन्दै अहिलेको सरकारले पुन: नियुक्त गरेर न्याय गरेको बताए।
‘साढे ३ वर्ष न्यायका लागि अदालतको ढोका ढक्ढकाइरहेको थिएँ,अघिल्लो पटक २०७५ मा नियुक्ति पाउँदाखेरी चार वर्षको अवधिमा ६ महिना नपुग्दै मेरो जिम्मेवारी अन्त्य गरिएको थियो। त्यतिखेर अदालत गएको थियो,’ उनले भने, ‘यही माघ २५ गते मेरो नियुक्ति सकिएको थियो। मेरो औचित्य सकियो र अदालतबाट न्याय पाइनँ भन्ने अवस्थामा रहेकोमा नेपाल सरकारले मलाई यो जिम्मेवारीमा पुन:नियुक्त गरेकोमा न्याय पाएँ भन्ने लागेको छ।’
विद्युतीय क्षेत्रमा केही ठूला चुनौती भएकोले त्यसलाई सबैले मिलेर व्यक्तिलाई भन्दा पनि संस्थालाई प्राथमिकतामा राखेर काम गर्नुपर्ने उनले बताए।
