उत्पादनमूलक उद्योगका प्रतिनिधिहरूले उद्योगमा लोडसेडिङ नगर्न सरकारलाई आग्रह गरेका छन्। आइतबार नेपाल सिमेन्ट उत्पादक संघ, स्टिल उत्पादक संघ, र नेपाल धागो उत्पादक संघले संयुक्त रूपमा आयोजना गरेको पत्रकार सम्मेलनमा नेपाल विद्युत प्राधिकरणद्वारा औद्योगिक क्षेत्रमा गरिएको अघोषित लोडसेडिङ गरिएको भन्दै आपत्ति जनाएका छन्।
विद्युत प्राधिकरणले विज्ञप्तिमार्फत आैद्योगिक ग्राकलाई १२ घण्टासम्म लोडसेडिङ हुने जानकारी गराएको थियो। विद्युत प्राधिकरणका कार्यकारी निर्देशक कुलमान घिसिङले प्राथमिकताका आधारमा कतिपय उद्योमा रातको समय बत्ती जान सक्ने सन्देश दिएका थिए।
यद्यपि उद्योगीहरूले जानकारी नगराई १४ घण्टासम्म लोडसेडिङ गरेको गुनासो गरेका थिए। डेडिकेटेड र ट्रंक लाइनको विवादित विषयलाई लिएर विद्युत प्राधिकरणका कार्यकारी निर्देशकले मानमर्दन गरेको भन्दै उद्योगीले आपत्ती जनाएका छन्।
'अहिले जसरी उद्योगलाई विभेदपूर्ण ढंगले लोडसेडिङ गरिएको छ, यो स्वीकार छैन, अरू देशले आैद्योगिक ग्राहकलाई प्राथमिकतामा राख्छन्। तर हाम्रोमा धेरै र पहिले विद्युत कटाैति उद्योगमा गरिएको छ,' अर्घखाँची सिमेन्टका सञ्चालक पशुपति मुरारकाले भने, 'उद्योगमा लडसेडिङ हुनु भएन, डेडिकेटेड र ट्रङकलाइनको विवाद टुंगोमा पुर्याउनुपर्यो।'
नेपाल स्टिल उत्पादक संघका अध्यक्ष शोभाकर न्याैपानेले लोडसेडिङकै कारण उद्योगको लागत अत्याधिक बढेको भन्दै लोडसेडिङ हटाउन माग गरे।
उनले अहिले भैरहवा क्षेत्रमा दिनकै १४ घण्टासम्म लोडसेडिङ भएको बताए।
'हामीलाई जानकारी दिइएको छैन, पत्रपत्रिकामा १२ घण्टा हुने कुरा मिडियामा सुनियो। तर अहिले १४ घण्टासम्म विद्युत कटाैति छ,' न्याैपानेले भने।
उनका अनुसार लोडसेडिङको कारण स्टिलको मूल्य ९ रूपैयाँ ३३ पैसा बढेको बताए।
त्यस्तै, डलरको मूल्य बढेकै कारण ३ रुपैयाँ ५० पैसा र कच्चा पदार्थको मूल्य बढेको कारण ४ रुपैयाँ ५० पैसा मूल्य बढेको प्रतिक्रिया उनको छ।
नेपाल सिमेन्ट उत्पादक संघका अध्यक्ष रघुनन्दन मारूले विद्युत प्राधिकरणका अधिकारीहरूले गैरजिम्मेवार जवाफ दिएर लोडसेडिङ गरेको गुनासो गरे।
'प्राधिकरणका अधिकारी नै महंगोमा किनेर सस्तोमा दिन सक्दैनाै भन्ने प्रतिक्रिया मिडियामा दिएको सुनिन्छ। यस्तो गैरजिम्मेवार कुरा गर्ने हो भने वर्षामा किन मूल्य घटाइएन,' मारूले भने।
उनले लोडसेडिङ अन्त्य गरेर औद्योगिक वातवरण बनाउन आग्रह गरे।
नेपाल धागो उत्पादक संघका प्रतिनिधि शशिकान्त अग्रवालले लामन्ह समय लगातार विद्युत कटाैति हुँदा उत्पादनमूलक उद्योग समस्यामा परेको बताए।
उनले विवादित विषयलाई लिएर प्राधिकरणका अधिकारीले निरन्तर मानमर्दन गरेको गुनासो गरे।
उत्पादन उद्योगहरू चल्दा २४ घण्टा नै चल्ने र नचल्दा पूरै नचलाउनु पर्ने स्थिति हुने उद्योगीहरूको भनाइ छ।
जेनेरेटर चलाउन नसकेको खण्डमा उत्पादनमूलक उद्योगमा १२ घण्टा लोडसेडिङ हुदा ७० प्रतिशत उत्पादन क्षमता घट्ने व्यवसायीको भनाइ छ।
अहिले पाएको विद्युत पनि गुणस्तरीय नभएको र दिनमा ३/४ पटक ट्रिपिङ भएको उनीहरूले बताए।
