भौतिक पूर्वाधार तथा यातायात मन्त्री देवेन्द्र दाहालले आफ्नो २०० दिनको कार्यसम्पादन सार्वजनिक गरेका छन्।
उनले चालु आर्थिक वर्षको ७ महिनाको अवधिमा सडकसँग जोडिएका १८ महत्त्वपूर्ण काम गरिएको विवरण खुलाएका छन्।
ग्वार्कोमा फ्लाईओभर निर्माणका क्रममा देखिएको प्राविधिक समस्या समाधान गरिएको, सिद्धबाबा सुरुङ मार्ग अन्तर्गत ८७६ मिटर सुरुङ खन्ने काम सकिएको, माघ मसान्तसम्म ४१ वटा पुल निर्माणको काम सकिएको लगायतका उपलब्धि देखाइएको छ।
यस्ता छन् मुख्य काम:
–कुल कालोपत्र स्तरको नयाँ सडक २ लेनको २४६ कि.मि र २ लेन माथिको सडक ३०.५८ कि.मि कालोपत्र भएको
–ललितपुरको ग्वार्कोमा फ्लाइओभर निर्माण गर्ने कार्य माघ मसान्तसम्म सम्पन्न गर्ने लक्ष्य रहेकोमा ८२ प्रतिशत काम सकिएको, फिल्डमा देखिएका केही प्राविधिक विषयहरूलाई सम्बोधन गरी २०८१ चैत्र मसान्तभित्र कार्य सम्पन्न गर्ने गरी काम भइरहेको।
–नेपालको सडक यातायात क्षेत्र सुरुङ युगमा प्रवेश गरेको र सोही सिलसिलामा सिद्धबाबा सुरुङ मार्गको मुख्य सुरुङ खन्ने कार्यमध्ये यस आर्थिक वर्षमा ८७६ मिटर सुरुङ खन्ने काम सकिएको, सुरुङ मार्गको ११२६ मिटर खन्ने काम सकेर ब्रेकथ्रु गरिएको। काठमाडौं तराई मधेश द्रुत मार्ग अन्तर्गत धेद्रे सुरुङ मार्गको पनि ब्रेक थ्रु भएको।
–नेपाली सेनाबाट निर्माणाधीन तराई मधेश द्रुत मार्गको काम तीव्र ढंगले अगाडि बढेको छ। काठमाडौं तर्फको प्रस्थान विन्दु खोकना क्षेत्रको समस्या समाधान गर्न सरोकारवालाहरूसँग छलफल भएको।
–सबै जिल्ला सदरमुकाम बाहै्र महिना राष्ट्रिय सडक सञ्जालसँग जोड्ने गरी यातायातको पहुँच विस्तार गर्ने योजना अनुसार सदरमुकाम जोड्न बाँकी हुम्ला जिल्लाको सिमिकोट जोड्नका लागि खार्पुनाथस्थित चुवा खोलामा बेलीब्रिज जडान गर्ने काम अघि बढेको।
–राष्ट्रिय गौरवका पुष्पलाल (मध्यपहाडी) राजमार्ग, हुलाकी राजमार्ग र कालीगण्डकी कोरिडोरको विभिन्न खण्डहरूमा ५६ कि.मि सडक कालोपत्र गर्ने लक्ष्य रहेकोमा ७८.५ कि.मि. सडक कालोपत्र भएको।
–माघ मसान्तसम्ममा ४१ बटा पुल निर्माण काम सकिएको।
–तमोर कोरिडोर (चतरा–मुलघाट–सुभाङखोला) सडक खण्डमा १४ कि.मि कालोपत्र गर्ने काम सकिएको।
–रानी–विराटनगर–धरान सडक खण्डको तरहरा–सेउती खण्डको ५.३ कि.मि. सडक ४ लेनमा कालोपत्र गर्ने कार्य अन्तिम चरणमा रहेको।
–भेडेटार–रवि–राँके सडक खण्डमा केही सडक कालोपत्र भई निर्माणको काम भई रहेको।
–बुटवल चन्द्रौटा सडकको ६९ कि.मि मध्ये बुटवल गोरसिंङ्गे खण्डको ५० कि.मि सडक चौडा गर्न ठेक्का सम्पन्न भई निर्माण कार्य सुरू भएको।
–रानी–विराटनगर–किमाथांका (कोशी राजमार्ग) ट्र्याक खोल्ने कार्य भई यो सडक चीन, भारत र नेपालको त्रिदेशीय सडक सञ्जालको रुपमा जोडिएको।
–पृथ्वी राजमार्गको मुग्लिङ्ग–पोखरा पूर्वी खण्डमा ४.७५ कि.मि. तथा पश्चिम खण्डमा ८.६८ कि. मि. गरी कुल १३.४३ कि.मि. ४ लेन कालोपत्र सकिएको।
–गत आर्थिक वर्षमा भएको कामको भुक्तानी दायित्व रकम निर्माण व्यवसायीहरूलाई भुक्तानी गरिसकिएको।
–सडक विभाग अन्तर्गत रहेका रुग्ण ठेक्काहरूको ठेक्कागत अध्ययन गरी समाधानको सिफारिस गर्न मन्त्रालयबाट आन्तरिक समिति गठन गरिएकोमा प्रतिवेदन उपलब्ध भएको।
