ग्वार्को ओभरपासको काम केही समयदेखि सुस्त भएको छ।
यसैबीच ओभरपास निर्माण गरिरहेको कम्पनी आशिष समानान्तर रेलिगेयर जेभी फरार भएको खबर बाहिरिएको छ।
फरार भनिए पनि ठेकेदार कम्पनी आफ्नो सम्पर्कमै रहेको दाबी सडक विभागले गरेको छ।
'काम केही समयदेखि सुस्त भएको हो,' सडक विभागका प्रवक्ता तथा उपमहानिर्देशक इन्जिनियर अर्जुन प्रसाद आर्यालले भने, '७०–८० प्रतिशत काम गरेको ठेकेदारले छोडेर जाने भन्ने नै हुँदैन, हाम्रो सम्बन्धित निकायमा ठेकेदार सम्पर्कमै छन्।'
ग्वार्को ओभरपास सडक विभागअन्तर्गत गुणस्तर, अनुसन्धान तथा विकास केन्द्रले हेरिरहेको छ।
हाल केन्द्र प्रमुख बिहिन छ। केन्द्रबाट काममा अवरोध भइरहेको भन्दै ठेकेदारले काम छोडेको बताइए पनि ठेकेदार कम्पनीसँग सम्पर्क गर्ने सेतोपाटीको प्रयास सफल हुन सकेन।
२०७९ मंसिर १६ गतेदेखि निर्माण सुरू गरिएको ओभरपास २०८० फागुन १२ गतेभित्र नै सकिसक्नु पर्ने थियो। तर, सुरूको डिजाइन परिवर्तन गर्नुपरेको कारण देखाउँदै ठेकेदार कम्पनीले थप समय मागेको थियो।
दोस्रो पटक २०८१ असारसम्मका लागि म्याद थपिए पनि सो समयभित्र पनि काम सकिएन। तेस्रो पटक गत पुस ९ सम्मको म्याद थपिएको थियो।
उक्त समयभित्र काम नसकिएपछि पुस १० बाट जरिवाना लगाएर काम भइरहेका छ। निर्माण कम्पनीले चैत मसान्तसम्म काम सक्ने प्रतिबद्धता जनाएको छ। हाल जरिवाना लगाएर यो आयोजनाको काम भइरहेको छ।
इपिसी मोडलको ठेक्का भएकाले लागत बढे पनि यसमा ठेकेदार नै जिम्मेवार हुन्छ। यो मोडेल अनुसार ठेकेदार आफैँले डिजाइन गर्ने र उसैले निर्माण गर्छ।
फ्लाइओभरमा अहिलेसम्म ४४ करोड खर्च भइसकेको बताइन्छ। ओभरहेड ब्रिजको स्ट्रकचरतर्फ शत प्रतिशत काम सकिएको भए पनि कालोपत्रे बाँकी छ।
एप्रोच रोडको पनि करिब ८५ प्रतिशत काम बाँकी रहेको बताइन्छ।
यो पनि:
थपेको म्यादमा पनि नबन्ने भयो ग्वार्को ओभरपास
-1722230285.jpg)
