मर्स्याङदी नदीमा निर्माण हुने ९० मेगावाटको मर्स्याङदी नदी अर्ध जलाशययुक्त जलविद्युत् आयोजनामा चार बैंक तथा वित्तीय संस्थाले १०.५० अर्ब रुपैयाँ लगानी गर्ने गरी वित्तीय व्यवस्थापनको टुंगो लागेको छ।
कुमारी बैंक लिमिटेडको अगुवाइमा लगानीसम्बन्धि सम्झौतामा शुक्रबार (माघ १८ गते) हस्ताक्षर भएको हो।
लगानी सम्झौता एमए पावर प्रालिका अध्यक्ष अनुप आचार्य र कुमारी बैंक लिमिटेडका प्रमुख कार्यकारी अधिकृत रामचन्द्र खनालको उपस्थितिमा कुमारी बैंक लिमिटेड, प्रभु बैंक लिमिटेड, कृषि विकास बैंक लिमिटेड र सिद्धार्थ बैंक लिमिटेडको संयुक्त लगानीमा हुने गरी ऋण सम्झौता गरिएको हो।
हाल चार वित्तीय संस्थाबीच सम्झौता भए पनि केही समयभित्र अन्य बैंक तथा वित्तिय संस्थाहरुले पनि लगानी गर्ने बताइएको छ।
निर्माण अवधिको ब्याजसहित कुल २० अर्ब २५ करोड रुपैयाँ लागत अनुमान गरिएको आयोजनामा ७५ प्रतिशत ऋण र २५ प्रतिशत स्वपूँजी लगानी हुने जनाइएको छ।
प्रवर्द्धक कम्पनीका अनुसार ऋण लगानीतर्फ कुमारी बैंक लिमिटेडले चार अर्ब, प्रभु बैंक लिमिटेडले तीन अर्ब, सिद्धार्थ बैंक लिमिटेडले दुई अर्ब र कृषि विकास बैंक लिमिटेडले साढे एक अर्ब लगानी गर्नेछन्।
स्वपुँजी लगानीतर्फ अनुप आचार्य, हरिबाबु न्यौपाने र दीपक बरालको हुनेछ।
डोल्मा इम्पाक्ट फण्डले पनि स्वपूँजी लगानी गर्नुअघि आवश्यक अध्ययन अगाडी बढाएको कम्पनीका अध्यक्षले बताए।
यही समूहबाट हाल सेतीखोला हाइड्रोपावर लिमिटेड सेतीखोला जलविद्युत आयोजना २२ मेगावाट निर्माण कार्य अन्तिम चरणमा छ।
आयोजनाको नेपाल विद्युत प्राधिकरणसँग २०८० साल कात्तिक १ गते विद्युत खरिद बिक्री सम्झौता सम्पन्न भई व्यपारिक उत्पादन सुरू २०८६ साल वैशाख २२ गते गर्नुपर्ने छ। आयोजना प्राविधिक परामर्शदाता क्लिन इनर्जी कन्सल्टेन्स प्रालि हो।
आयोजनाको विस्तृत परियोजना प्रतिवेदन (डिपिआर), विस्तृत इन्जिनियरिङ डिजाइन तथा ठेक्कासम्बन्धि कागजात तयारीको काम अन्तिम चरणमा छ।
आयोजनाको वातावरणीय प्रभाव मूल्यांकन प्रतिवेदन स्वीकृतिका लागि सम्बन्धित निकायमा पेश भएको कम्पनीले जनाएको छ।
उत्पादित विद्युत् विद्युत गृहदेखि २२० केभी सिंगल सर्किट प्रसारण लाइनमार्फत् ११.६ किलोमिटर दूरीमा नेपाल विद्युत प्राधिकरणको मार्किचोक सव-स्टेशनमा २२०/१३२ केभी मा जोडिने छ।
