नवलपरासी (बर्दघाट सुस्ता पश्चिम)को सुस्ता गाउँपालिका–५मा राष्ट्रिय प्रसारण लाइनको विद्युत पुगेको छ।
नेपाल विद्युत प्राधिकरणले सुस्ता गाउँपालिका–५ स्थित सकरदिनयीबाट करिब ५ किलोमिटर ११ केभी लाइन निर्माण गरी नारायणी नदीपारिको सुस्ताबस्तीमा राष्ट्रिय प्रसारण ग्रीडको विद्युत पुर्याएको छ।
नारायणी नदीमा निर्माण गरिएको १ हजार ५ सय ७१ मि. लामो झोलुंगे पुलको भार व्यवस्थापन र विद्युतीय सुरक्षाको मापदण्ड पूर्ण रूपमा पालना हुने गरी दायाँबायाँबाट ११ केभी लाइन निर्माण गरी सुस्ताबस्तीमा विद्युत पुर्याइएको हो।
प्राधिकरणले ११ केभी लाइन पुर्याएसँगै तीनतिरबाट नारायणी नदीबाट घेरिएको र एकातर्फ भारतसँग सीमाना जोडिएको सुस्ताबस्तीमा राष्ट्रिय प्रसारण लाइनको विद्युतसँग जोडिएको छ।
सुस्ताबस्तीलाई जोड्न नारायणी नदीमा झोलुंगे पुल निर्माण भएसँगै विद्युत लाइन विस्तार पनि सम्भव भएको हो।
गाउँपालिका, लुम्बिनी प्रदेश सरकार र वैकल्पिक ऊर्जा प्रवर्द्धन केन्द्रको साझेदारीमा जडान गरिएको १०० किलोवाटको सौर्य ऊर्जाबाट सुस्ताबस्तीमा विद्युत आपूर्ति हुँदै आएको थियो।
सौर्य ऊर्जा प्लान्टको नियमित मर्मतसम्भार हुन नसक्दा विद्युत आपूर्ति भरपर्दो हुन सकिरहेको थिएन।
सुस्ताबस्तीमा विद्युत आपूर्तिका लागि १०० केभिए क्षमताका दुईवटा वितरण ट्रान्सफर्मर राखिएका छन्।
विद्युत लाइन र ट्रान्सफर्मको जडान र परीक्षण सम्पन्न गरिएको छ। अब त्यहाँबाट उपभोक्ताको घरघरमा विद्युत आपूर्ति दिन सुरू गरिनेछ।
सुस्ताबस्तीमा करिब ३ सय ५० घरधुरी छन्।
प्राधिकरणका कार्यकारी निर्देशक कुलमान घिसिङले देशलाई उज्यालो बनाउने अभियानअन्तर्गत पूर्ण विद्युतीकरणको अन्तिम यात्रामा सुस्तामा राष्ट्रिय प्रसारण लाइनको विद्युत पुर्याइएको बताए।
'सुस्ताबस्तीमा सौर्य ऊर्जाबाट विद्युत आपूर्ति दिइरहेको भएता पनि भरपर्दो र गुणस्तरीय थिएन, स्थानीयबाट विद्युतीकरणका लागि माग हुँदै आएको थियो, भारतसँग सीमाना जोडिएको सुस्ताबस्तीमा राष्ट्रिय ग्रिड पुग्नु राष्ट्रियताको दृष्टिकोणबाटसमेत महत्त्वपूर्ण छ,' कार्यकारी निर्देशक घिसिङले भने।
'चीनसँग सीमाना जोडिएको संखुवासभाको किमाथाङ्कालगायत विद्युत नपुगेका उत्तर र दक्षिण सीमानाका बस्तीहरू पनि छिट्टै विद्युतीकरण हुँदैछन्,' उनले थपे।
१ करोड ३३ लाख रूपैयाँ अनुमानित लागत रहेको सुस्ताबस्तीको विद्युतीकरण कार्य आर्थिक वर्ष २०७९/८०मा सुरू गरिएको थियो। लाइन नारायणी पार गराउन नदीमा पोल गाड्न सम्भव नभएपछि झोलुंगे पुल निर्माण सम्पन्न नहुन्जेलसम्म पर्खनु परेको थियो।
प्राधिकरणले चालू आर्थिक वर्षभित्रमा सबै नेपालीको घरमा भरपर्दो र गुणस्तरीय विद्युत सेवा पुर्याउने नेपाल सरकारको घोषणालाई कार्यान्वयन गर्न सम्पूर्ण तयारी पूरा गरी काम गरिरहेको छ। हाल विद्युतीकरणको अवस्था ९९ प्रतिशत छ।
प्राधिकरणले विद्युत नपुगेका घर खोज्दै विकट बस्तीको विद्युतीकरण गरिरहेको छ।
विद्युत पुगेका ठाउँमा भरपर्दो र गुणस्तरीय विद्युत आपूर्तिका लागि प्रणाली सुधार तथा विस्तार र नपुगेका ठाउँमा विद्युत पुर्याउने कार्यलाई उच्च प्राथमिकतामा राखी काम भइरहेको छ।
