पछिल्ला केही दिनदेखि सुनको मूल्यले निरन्तर रेकर्ड बनाइरहेको छ।
नेपालमा शुक्रबार सुन प्रतितोला दुई लाख ५८ हजार रूपैयाँमा कारोबार भइरहेको नेपाल सुनचाँदी व्यवसायी महासंघले जनाएको छ।
सुनको भाउ दिनानुदिन बढिरहँदा पनि बजारमा माग भने चुलिएको महासंघका प्रथम उपाध्यक्ष धर्म सुन्दर बज्राचार्य बताउँछन्।
उनका अनुसार भाउ थप बढ्छ भनेर सुनमा लगानी गर्नेहरू बढेका हुन्।
‘हामीले तिहारमा मात्रै चार पाँच सय सुन र २० हजार किलो चाँदी बिक्री हुने अनुमान गरेका छौं,’ बज्राचार्यले भने, ‘मूल्य थप बढ्छ भन्ने अपेक्षामा पनि अहिले धेरैले सुन किनिरहेका छन्।’
त्यस्तै हरेक वर्ष तिहारमा सुनचाँदीको खपत बढ्छ। विशेष गरी सुनचाँदीका गहना किनिने धनतेरस यही अवधिमा पर्ने र लक्ष्मी पूजाको दिन समेत सुन चाँदी राखेर पूजा गर्ने चलन भएकाले माग उच्च हुन्छ।
पछिल्लो समय थप मूल्य बढ्ने अपेक्षामा सुनचाँदी किन्नेहरू बढेका हुन्।
नेपालमा सुनचाँदीको मूल्य निर्धारण अन्तर्राष्ट्रिय बजारमा कायम हुने मूल्यको आधारमा हुन्छ। शुक्रबार अन्तर्राष्ट्रिय बजारमा सुन प्रतिऔंस चार हजार तीन सय ६८ डलरमा कारोबार हुन थालेको छ।
सन् २०३० सम्म सुनको मूल्य प्रतिऔंस ५ हजार १ सय ५५ डलर र चाँदीको मूल्य प्रतिऔंस ८२ डलरसम्म पुग्ने अनुमान इन्भेस्टिङ हेभन लगायत बजार विश्लेषकहरूले गरिरहेका छन्।
बैंक अफ अमेरिकाले पनि सन् २०२६ मा पनि सुनको मागमा अहिलेभन्दा कमि नआउने प्रक्षेपण गरिरहेका छन्। यस्तै खबरले गर्दा सुन किन्ने नेपालीहरू बढिरहेका छन्।
नेपालमा लगानी प्रयोजनको लागि सुन किन्न पाइँदैन। त्यसैले मध्यम वर्ग र न्यून मध्यम वर्गहरूले गरगहना किनिरहेका छन्।
उपल्लो वर्गकाहरूले भने अनौपचारिक बजारबाट सुनका बिस्केट समेत किनिरहेको पाइएको बज्राचार्यले बताए।
अहिले नेपाली बैंकिङ प्रणालीमा मुद्दतीमा पाइने ब्याजदर न्यून तहमा आएको, सेयर बजार बढ्न नसकेको र घरजग्गाको कारोबारमा समेत शिथिलता आएकोले पनि धेरैले लगानीको लागि सुन किनिरहेको बज्राचार्यको विश्लेषण छ।
केही समयअघिसम्म बजारमा सुनको अभाव नै देखिएको थियो। मूल्य बढेको कारण बैंकहरूले सुन आयात गरिरहेका थिएनन्।
असोज २६ गतेसम्म बैंकहरूमा ९५ किलो सुन मात्रै मौज्दात रहेको नेपाल बैंकर एसोसिएसनले उल्लेख गरेको छ।
तर, बजारमा माग बढ्न थालेपछि भने यो एक सातामा मात्रै ६ वटा बैंकहरूले तीन सय किलो सुन आयात गरेका छन्।
त्यसैले गत साता अघिसम्म बजारमा सुनको अभाव देखिएको भए पनि अब भने माग अनुसार नै आपूर्ति हुन थालेको छ। नेपालमा वाणिज्य बैंकहरूले मात्रै सुनको आयात गर्न पाउँछन्।
यो पनिः
सुनचाँदी भयो इतिहासकै महँगो, अझ कति बढ्ला?
1635339834.jpeg)
-1746009348.jpg)
