भन्सार विधेयकमाथि दफाबार छलफल गर्नुअघि अर्थ समिति सदस्यहरूले फिल्ड भन्सार कार्यालयहरू तथा नाकाहरूको निरीक्षण गरेका छन्।
उनीहरूले माघ ११ देखि १६ गतेसम्म गरेको निरीक्षणका आधारमा बुधबार राजस्व सचिव, भन्सार, आन्तरिक राजस्व, राजस्व अनुसन्धान सशस्त्र प्रहरी, नेपाल प्रहरी प्रमुखसँग छलफल गरेका थिए। त्यस्तै केही भन्सार नाकामा भने पुन: निरीक्षण गर्न थालेका हुन्।
कानुनमा व्यवहारिक समस्या समेट्ने तथा देखिएका समस्या समाधान गर्ने गरी कानुनी व्यवस्था गर्न यस्तो निरीक्षणलाई प्राथमिकता दिएको अर्थ समितिका सदस्यहरूले बताएका छन्।
निरीक्षणका क्रममा भने नेपालको भन्सार क्षेत्र तथा सीमा नाकामा मुख्य ६ समस्या देखिएको सासंसदहरूको प्रतिक्रिया छन्।
खुला सीमा नाकाको कारण भन्सार छली भएको, एउटै व्यक्तिले निरन्तर सामान ओसार्ने काम गरेको, भन्सार क्षेत्रमा पूर्वाधारको समस्या देखिएको तथा भएका मेसिनहरू सञ्चालन नगरिएको, भन्सार यार्डमा लामो समयदेखि सामान थन्क्याउने काम गरिएको, नेपाली भूमिमा भारतीय स्वागत बोर्ड राखिएको जस्ता समस्या देखिएको समिति सदस्यहरूले बताएका छन्।
बुधबार गरिएको छलफल कार्यक्रममा समिति सदस्य पदम गिरीले भन्सार नाका अस्तव्यस्त भएको प्रतिक्रिया दिए। उनले भएका स्क्यानर मेसिन पनि नियोजित ढंगले बिगारिएको तथा प्रयोग नगर्दा समस्या बढेको बताएका छन्।
त्यस्तै पूर्वाधारको पनि अभाव देखिएको उनले बताए।
'जहाँ पूर्वाधार छैन त्यहाँ बढाउनु पर्छ, एक अर्ब लगानीबाट १२ अर्ब राजस्व उठ्छ भने किन नगर्ने,' सदस्य गिरीले भने।
समिति सदस्य गंगा कार्कीले तत्काल विराटनगरको रेल वे स्टेशन सञ्चालन गर्न आवश्यक रहेको बताए। उनले भन्सार लागत घटाउन पनि रेलवे सञ्जाल बढाउनु पर्ने बताइन्।
उनले खुला सीमानामा सशस्त्र र सेनालाई तैनाथ गर्नुपर्ने बताए। त्यस्तै भन्सार व्यवस्थित गराउनको लागि कच्चा वस्तुको भन्सार कम र तयारी सामानको बढी भन्सार लिनु पर्ने बताए।
समिति सदस्य जुली महतोले प्राविधिक अभाव, प्रयोगमा कमी भएको बताइन्। भन्सार प्रशासन तजबिजमा काम गरेको उनको गुनासो छ।
नेपालले पुरानो पुलहरू मर्मत नगर्दा समस्या भएको तथा ती पुलहरूमा पनि भारतले आफ्नो स्वागत बोर्ड राख्नु दु:खद् भएको उनले बताइन्।
सांसद नारायणी शर्माले भैरहवा आइसिपिमा सीमा समस्या देखिएको प्रतिक्रिया दिइन्। उनले पनि नेपालकै भूमिमा रहेको पुलमा ‘भारतमा स्वागत गर्छौं भन्दै बोर्ड टास्नु दु:खद् भएको बताइन्। क्वारेनटाइन चलाउन जनशक्ति अभाव देखिएको उनको प्रतिक्रिया छ।
सांसद सूर्यबहादुर थापाले खसी–बोका, राँगा–भैंसीका साथै धेरै उपभोग्य वस्तुहरू भन्सार सिष्टमबाट आयात नभएको बताए।
उनले कतिपय भन्सार क्षेत्रमा ७० प्रतिशत भन्सार बाहिरबाट र ३० प्रतिशत भन्सारबाट सामान आएको बताए।
