आइएमई ग्रुपको लगानीमा महोत्तरी जिल्लाको गौशाला नगरपालिका वडा नं. १, रामनगरमा स्थापना भएको नेपाल पल्प एण्ड पेपर इन्डष्ट्रिज सञ्चालनमा आएको छ।
प्रधानमन्त्री केपी शर्मा ओलीले बिहीबार उद्योग परिसरमा रहेको ताम्रपत्र अनावरण गर्दै उद्योगको औपचारिक उद्घाटन गरे।
उद्घाटन लगत्तै उनले कागज उत्पादन प्रक्रिया र उद्योगमै रहेको वातावरणमैत्री क्याल्सियम कार्बोनेट उत्पादनको अवलोकन गरे।
२ अर्ब लगानी रहेको यो उद्योगले अब दैनिक ७५ मेट्रिक टन लेखन तथा छपाई कार्यका लागि उपयुक्त गुणस्तरीय कागज औद्योगिक स्तरमा उत्पादन गर्न थालेको छ। पहिलो चरणमा फोटोकपी पेपर र कापी–किताबका लागि प्रयोग हुने कागज उत्पादन सुरू गरिएको छ।
शैक्षिक, प्रशासनिक तथा अन्य क्षेत्रमा उच्च माग रहेको फोटोकपी पेपर र अन्य कागजको उत्पादनले आन्तरिक बजारको माग सम्बोधन गर्नेछ। विद्यालयको पाठ्यपुस्तक छपाई गर्दै आएको जनक शिक्षा सामग्री केन्द्रलाई समेत स्वदेशी उत्पादन प्रयोगका लागि ढोका खुल्नेछ।
उद्घाटन समारोहलाई सम्बोधन गर्दै आइएमई ग्रुपका अध्यक्ष चन्द्र प्रसाद ढकालले नेपाल पल्प एण्ड पेपर इन्डष्ट्रिजको सञ्चालन आइएमई ग्रुपको उत्पादनमूलक क्षेत्रमा औपचारिक प्रवेश मात्र नभई नेपालको औद्योगिक यात्रामै नव जागरणको रूपमा लिइएको बताए।
उनले नयाँ उद्योगको सञ्चालनलाई मुलुकको आत्मनिर्भरता, आर्थिक वृद्धि तथा दीगो औद्योगिक विकासप्रतिको प्रतिबद्धताको रूपमा लिन आग्रह गर्दै, विकासको राष्ट्रिय आकांक्षामा निजी क्षेत्रले गरेको 'होस्टेमा हैंसे' को उदाहरण बनेको उल्लेख गरे।
अध्यक्ष ढकालका अनुसार उद्योगहरू बन्द हुने, लगानीकर्ताहरू पलायन हुने र अरबको ५० डिग्री तापक्रममा युवाहरू विदेशिनुपर्ने बाध्यतालाई कम गर्दै, नयाँ उद्योगहरू खोल्दै आयात प्रतिस्थापन गर्नु र कर्ममुखी औद्योगिक विकासको नवजागरण सृजना गर्नु आइएमई ग्रुपको उत्पादनमूलक क्षेत्रमा प्रवेशको प्रमुख उद्देश्य हो।
औद्योगिक विकास रोजगारीको प्रमुख कारक भएको उल्लेख गर्दै उनले नेपाल पल्प एण्ड पेपर इन्डष्ट्रिजले प्रत्यक्ष रूपमा ३०० भन्दा बढी र अप्रत्यक्ष रूपमा हजारौंका लागि रोजगारी सिर्जना गरिसकेको जानकारी गराए। जसमा इन्जिनियर, प्राविधिक, कारखाना श्रमिक, आपूर्ति व्यवस्थापक, खुद्रा विक्रेता र किसानहरू सम्मिलित छन्।
उद्योगले ५० प्रतिशतभन्दा बढी स्थानीय र महिलाहरूलाई रोजगारीको अवसर दिएको छ।
ढकालले स्वदेशी उद्योग प्रवर्द्धन गर्दै आत्मनिर्भरता हासिल गर्ने सरकार र आम नेपाली जनताको सोच तथा सपनासँग हातेमालो गर्दै अघि बढ्न आग्रह गरे।
नेपाल उद्योग वाणिज्य महासंघका अध्यक्षको रूपमा उनले पछिल्लो समय नेपालमा लगानीमैत्री वातावरण निर्माणका लागि सरकारले ल्याएका कतिपय कानुनहरू निकै सहयोगी सिद्ध हुने विश्वास व्यक्त गरे।
उनले मुलुकको आर्थिक सुधार र विकासका लागि आवश्यक नीति तथा कानुन निर्माणमा सरकारले निजी क्षेत्रका सुझावहरू सुन्न थालेको र आपसी समन्वयमा काम गरिरहेको निजी क्षेत्रले महसुस गरेको बताए।
स्वदेशी होस् वा विदेशी, लगानीकर्ताले फिल्डमा काम भइरहेको छ कि छैन भन्ने हेर्ने भएकाले यस्तै ठूला आयोजनाहरू सञ्चालनमा आएमा मुलुकमा लगानीको वातावरण राम्रो छ भन्ने सन्देश जाने उनको भनाइ छ।
उनका अनुसार, नेपालमा लगानीको सकारात्मक वातावरण रहेको पुष्टि गर्नसञ्चालनमा आएको यो उद्योग महत्त्वपूर्ण छ।
सो अवसरमा उनले पाथीभरा केबलकार परियोजनामा उठेका केही विषयले मुलुकमा लगानी र व्यावसायिक वातावरणप्रति नकारात्मक सन्देश प्रवाह गर्ने सम्भावनाप्रति चिन्ता व्यक्त गरे।
ताप्लेजुङका स्थानीय जनता, स्थानीय सरकार र प्रदेश सरकारले बारम्बार गरेको आग्रहपछि परियोजना सुरू गरिएको स्मरण गराउँदै उनले धार्मिक, सांस्कृतिक र पर्यावरणीय पक्षलाई ध्यानमा राखी, स्थानीयबासीको सहमति र सहभागितामा काम अघि बढाइएको बताए।
तर, काम सुरू भएलगत्तै जिल्ला बाहिरबाट आएर अवरोध गर्ने प्रयास भएको भन्दै उनले यस्तो प्रवृत्तिले भोलिका दिनमा लगानीको अवस्था के हुन्छ भन्नेबारे निजी क्षेत्र र राज्यले सोच्नुपर्ने अवस्था आएको औंल्याए।
विश्वभर सूचना प्रविधिको विकासले संसार साँघुरिँदै गर्दा पूर्वाधार निर्माणजस्ता काममा देखिने अवरोधले विदेशी लगानीकर्तालाई कस्तो सन्देश दिन्छ भन्नेबारे निजी क्षेत्र चिन्तित रहेको उनले उल्लेख गरे।
बदलिदो विश्व परिवेशमा विदेशी अनुदान तथा सहायता घट्दै गएकाले स्वदेशी उद्यमी, रोजगारी सिर्जना गर्ने व्यवसायहरूलाई प्रोत्साहन गर्नुको विकल्प नरहेको उनले बताए।
प्रकृतिले दिएका अपार सम्भावनाहरूको उपयोग गर्दै समृद्धितर्फ अघि बढ्न आह्वान गर्दै उनले सबै राजनीतिक दलका नेता तथा संघ–संस्थाका नेतृत्वकर्ताहरूलाई पूर्वाधार विकास, रोजगारी सिर्जना, नागरिक सेवासुविधा तथा राज्यको राजस्व वृद्धि जस्ता विषयमा एकजुट हुनुपर्ने आवश्यकता औंल्याए।
उनले पूर्वाधार निर्माण, आर्थिक विकास र नागरिक सुविधाका विषयमा नकारात्मक राजनीति नगर्न आग्रह गरे।
पूर्वाधार विकास भए मात्र नागरिकको जीवनस्तर सुधार हुने, रोजगारी सिर्जना हुने, राजस्व वृद्धि हुने र मुलुक समृद्ध हुनेमा कुनै दुईमत नभएको बताए।
आज उद्घाटन भएको उद्योगको प्रसंग उल्लेख गर्दै उनले नेपाल कागज तथा कागजजन्य उत्पादनका लागि विगतदेखि नै आयातमा निर्भर रहँदै आएकोमा अब त्यो अवस्था नरहने बताए।
भृकुटी कागज कारखाना बन्द भएसँगै औद्योगिकस्तरमा आन्तरिक उत्पादन रोकिएको भए पनि साना तथा हस्तकला कागज उद्योगहरूले केही योगदान पुर्याइरहे पनि त्यो पर्याप्त नभएको उनले उल्लेख गरे।
