संसार डिजिटल्ली रुपान्तरण भइरहेको छ, विज्ञान र प्रविधिको देनले गर्दा पहिला घण्टाैं लाग्ने कार्यहरू अहिले क्षणभरमै गर्न सम्भव भएको छ।
उदाहरणको लागि भुक्तानी सेवाहरू नै हेरौँ, पहिलो घण्टौं लगाएर कार्यलय धाउन पर्ने वाध्यता हटेर अहिले घरको सोफामा बसेर आरामले इसेवाबाट मिनेटमै गर्न सकिन्छ।
अहिलेको डिजिटल युगमा नेपालमा पनि धेरैजसो आर्थिक कारोबारहरू डिजिटल माध्यमबाटै गर्न सकिन्छ तर अझै पनि केही स्थान र मानिसहरू यस सेवाबाट अनविज्ञ छन् जसका कारण डिजिटल भुक्तानीको सुविधा नभएका पसलहरूमा भुक्तानी गर्नहोस् वा उपहार, पूजापाठ, दानदक्षिणा गर्न हाम्रो नेपाली समाजमा नगदको आवश्यकता कतै न कतै परिरहन्छ।
यस्तै नगद चाहिएको बेलामा पनि प्रयोगकर्ताहरूलाई सहजता प्रदान गर्न इसेवाले आफ्नो एटिएम विथड्र सेवा विस्तार गरेको छ।
अब इसेवा प्रयोगकर्ताहरूले एनआइसी एसिया बैंकको एटिएमबाट सजिलै पैसा निकाल्न सक्नेछन्।
यसअघि एभरेष्ट बैंक मार्फत प्रदान गर्दै आएको यो सुविधा इसेवाले हालै एनआइसी एसियामा पनि विस्तार गरेको छ।
एटिएम विथड्र गर्ने प्रक्रिया दुई चरणको रहेको छ। पहिलो चरणमा इसेवा प्रयोगकर्ताहरूले आफ्नो इसेवा एपमा गई ओटिपी प्रक्रिया पूरा गर्नुपर्नेछ भने दोस्रो चरणमा नजिकैको एनआइसी एसिया बैंकको एटिएम मेसिनमा गएर रकम निकाल्ने प्रक्रिया पूरा गर्नुपर्नेछ।
पहिलो चरणमा प्रयोगकर्ताले इसेवाको फाइनान्सियल सर्भिसेजभित्र रहेको एटिएम विथड्रमा गई एनआइसी एसिया बैंक छनोट गरेर आवश्यक विवरण राखेर प्रक्रिया पूरा गर्नु पर्नेछ।
प्रक्रिया पूरा भएपछि इसेवामा दर्ता गरिएको मोबाइल नम्बरमा ओटिपी आउनेछ, जुन प्रयोगकर्ताहरूले एटिएम टर्मिनलमा पुष्टि गर्नुपर्छ।
यसरी मोबाइल नम्बर र ओटिपी सहितका विवरणहरू एटिएम मेसिनमा प्रमाणीकरण भएपछि मात्र प्रयोगकर्ताहरूले नगद निकाल्न सक्नेछन्।
यसरी रकम निकाल्न दुई सजिला चरणहरू पार गरेर ओटिपी जस्ता विवरणहरू पनि पुष्टि गनुपर्ने भएकोले यो प्रक्रिया सहजसँगै सुरक्षित पनि रहेको इसेवाका रणनीतिक बैंकिङ तथा वित्तीय समाधान प्रमुख हेम घिमिरेले बताए।
