धितोपत्र बोर्डले भित्री कारोबारमा शून्य सहनशीलता लिनुपर्ने अर्थमन्त्री विष्णु प्रसाद पौडेलले बताएका छन्।
धितोपत्र बोर्डको ३३औं वार्षिकोत्सवमा आयोजित कार्यक्रममा अर्थमन्त्री पौडलेले भने, 'कारोबारमा पारदर्शीता वा भित्री कारोबार लगायतका कुनै पनि काममा शून्य सहनशीलता लिनुपर्छ। नियमनमा दुईटा चिज हुन्छ गल्ती गर्नेलाई रोक्ने र भएन भने नियन्त्रण वा आवश्यकता अनुसार दण्डित गर्ने त्यसैले बोर्ड कुनै पनि प्रभाव र दबाबबाट माथि उठाएर प्रतिस्पर्धी भएर अगाडि बढ्नु पर्छ।'
उनले सन्तोष नारायण श्रेष्ठको नेतृत्वमा बोर्डको अहिलेको टिमले यही उद्देश्यको साथमा प्रभावकारी भूमिका निर्वाह गर्ने विश्वास व्यक्त गरे।
उनले कुनै पनि रूपमा देखा परेका अनियमितता अपारदर्शीता वा बेथिति हुन पाउने छैनन् भनेर बोर्डले काम कारबाही अगााडि बढाउनुपर्नेमा समेत जोड दिए।
अर्थमन्त्रीले थपे, 'यो औपचारिक संस्था मात्रै नभएर पारदर्शीता, भूमिका, परिणाम, सुशासन र निष्पक्षताको हिसाबले उम्दा संस्थाको रूपमा अगाडि बढाउनु पर्नेछ र अर्थमन्त्रालय, सरकारको निरन्तर साथ सहयोग रहनेछ।'
अर्थमन्त्रीले पुँजी बजारमा नयाँ नयाँ उपकरण प्रयोगमा रहेकाले नेपालमा पनि अध्ययन गरेर यी काममा अगाडि बढ्नुपर्ने बताए।
उनले पुँजी बजार अर्थतन्त्रको ऐना भएकोले मुलुकको अर्थतन्त्रको उज्जवल भविष्य देख्न सकिने हिसाबले लाग्नुपर्ने समेत उल्लेख गरे।
बोर्डका अध्यक्ष सन्तोष नारायण श्रेण्ठले यस आर्थिक वर्षमा मात्रै ५० अर्ब रूपैयाँ बराबरका निष्कासनको स्वीकृति दिएको जानकारी दिए।
उनले धितोपत्र बजारमा हुने अवाञ्छित क्रियाकलापलाई समयमा नै नियन्त्रण गरी लगानीकर्ताको हकहित संरक्षण गर्ने तथा बजारलाई स्वच्छ र पारदर्शी बनाएर पुँजी बजारप्रति सर्वसाधारण लगानीकर्ताको विश्वास कायम गर्न बोर्ड अझै जिम्मेवारपूर्वक लाग्ने समेत बताएका छन्।
