गृह मन्त्रालयले बैंक तथा वित्त संस्था र ती क्षेत्रमा कार्यरत कर्मचारीको सुरक्षालाई ध्यानमा राखी काम गर्न जिल्ला प्रशासन कार्यालयहरूलाई परिपत्र जारी गरेको छ।
पछिल्ला दिनहरूमा बैंक तथा वित्त संस्थाका कर्मचारीमाथि दुर्व्यवहार भएको र सुरक्षाको चुनौती समेत रहेको गुनासो बढेपछि मन्त्रालयले शुक्रबार ७७ वटै जिल्ला प्रशासन कार्यालयलाई परिपत्र जारी गरेर सुरक्षा दिन र अवाञ्छित क्रियाकलाप रोक्न निर्देशन दिएको हो।
यस अघि नेपाल बैंकर्स संघ, डेभलपमेन्ट बैंकर्स एशोसिएसन, नेपाल वित्तीय संस्था संघ र नेपाल लघुवित्त बैंकर्स संघले सुरक्षा प्रत्याभूति गराउनका लागि गृह मन्त्रालयमा ज्ञापन पत्र बुझाएका थिए।
'उहाँहरूको (बैंक तथा वित्त संस्थाको) तर्फबाट ध्यानाकर्षण पनि आएको थियो। विभिन्न जिल्लाहरूमा अवाञ्छित क्रियाकलाप समेत भएको सूचनाका आधारमा हामीले परिपत्र जारी गरेका छौं,' गृह मन्त्रालयका सह-सचिव जितेन्द्र बस्नेतले सेतोपाटीसँग भने।
मंगलबार मात्रै जाजरकोटको भेरी नगरपालिकामा एनआइसी एशिया लघुवित्तका कर्मचारीमाथि मोसो दलिएको थियो। मासिक किस्ता उठाउन गएका लघुवित्तका एक जना कर्मचारीमाथि दुई जना व्यक्तिले मोसो दलेका थिए।
यसअघि व्यवसायी दुर्गा प्रसाईंसहित विभिन्न क्षेत्रबाट केही व्यक्तिहरूले बैंक तथा वित्त संस्थाले ज्यादती गरेको आरोप लगाउँदै ऋण तथा ब्याज नतिर्ने अभियान समेत चलाएका थिए। प्रसाईंले पूर्वराजा ज्ञानेन्द्र शाहलाई समेत सामेल गराएर ऋण तथा ब्याज नतिर्न आह्वान गरेका थिए।
बैंक तथा वित्त संस्थाबाट लगेको ऋण नतिर्ने अभियान चलाउने र कर्मचारीमाथि दुर्व्यवहार हुन थालेपछि बैंक तथा वित्त संस्थाका कर्मचारीहरूले संयुक्त विज्ञप्ति जारी गरेर विरोध जनाएका छन्।
