नेपालीको महान् चाड दशैं, तिहार र छठ पर्वलाई लक्षित गरी व्यापारीले चालू आर्थिक वर्षको साउन, भदौ महिनामा छिमेकी मुलुक भारतबाट आठ अर्ब मूल्य बराबरको भारतीय सवारी साधन नेपाल भित्र्याएका छन् ।
यसबाट वीरगञ्ज भन्सार कार्यालयलाई कुल राजस्वमध्ये ३० प्रतिशत राजस्व भारतीय सवारी साधनबाट उठेको सूचना अधिकारी सन्तोष यादवले बताए ।
वीरगञ्ज भन्सार कार्यालयका अनुसार चालू आवको साउन, भदौ महिनामा भारतबाट दुई करोड सात लाख तीन हजार रुपैयाँ मूल्य बराबरको ३० वटा बस, १२ करोड ७७ लाख ८६ हजार रुपैयाँ मूल्य बराबरको ६३ थान मिनी बस, २१ लाख रुपैयाँ मूल्य बराबरको एक थान माइक्रो बस, तीन अर्ब ६२ करोड ७१ लाख ३६ हजार रुपैयाँ मूल्य बराबरको दुई हजार २८५ थान जिपकार भ्यान, २७ करोड २५ लाख रुपैयाँ मूल्य बराबरको २१८ थान डबल क्याप पिकअप, २० करोड १६ लाख रुपैयाँ मूल्य बराबरको २८७ थान सिंगल क्याप पिकअपजस्ता सवारीसाधन नेपाल भित्र्याएको हो ।
यसैगरी, सोही अवधिमा भारतबाट २५ करोड ४६ लाख ४१ हजार रुपैयाँ मूल्य बराबरको २८३ थान ट्रक मिनी ट्रक, ४८ करोड ८७ लाख ४४ हजार रुपैयाँ मूल्य बराबरको ६३४ थान बस, ट्रकको चेसिस तथा दुई अर्ब ७१ करोड ६७ लाख ५१ हजार रुपैयाँ मूल्य बराबरको ३५ हजार ८१४ थान विभिन्न कम्पनीको मोटरसाइकल नेपाल भित्र्याएको छ ।
दशैं, तिहार तथा छठमा बिक्रेताले विभिन्न प्रकारका उपहारको स्कीम राख्ने भएकाले विक्री बढ्न जाँदा वीरगञ्ज नाकाबाट दुई महिनाभित्रै यति ठूलो परिणाममा सवारीसाधन नेपाल भित्र्याएको छ । अन्तःशुल्क, भन्सार र भ्याटसमेत विभिन्न प्रकारका गाडीमा २२६ प्रतिशत कर लाग्ने भए पनि यस वर्ष अघिल्लो वर्षको तुलनामा बढी सवारीसाधन वीरगञ्ज नाका भएर भित्रिएको हो ।
विलासिताको श्रेणीमा गाडी आउने र ग्राहक पनि बढ्न गएकाले गत वर्षको तुलनामा यस वर्ष गाडी आयातमा उल्लेखनीय वृद्धि हुने अनुमान गरिएको छ । अघिल्लो वर्षको साउन, भदौ महिनामा छ अर्ब ५० लाख रुपैयाँ मूल्य बराबरको विभिन्न प्रकारका गाडी नेपाल भित्रिएका थिए ।
