पछिल्लो समय संसारभरि धुम मच्चाइरहेको चिनियाँ अटोमोबाइल कम्पनी बिवाइडीका दुई नयाँ कार नेपाली बजारमा सार्वजनिक गरिएको छ।
नेपालका लागि बिवाइडीको आधिकारिक वितरक साइमेक्स इंकले सार्वजनिक गरेका यी दुई मोडल 'एट्टो–१' र 'एट्टो–२' हुन्।
सुरूमा नेपाल अटोमोबाइल्स इम्पोर्टर्स एन्ड म्यानुफ्याक्चरर्स एसोसिएसन (नाइमा) ले आयोजना गरेको प्रदर्शनीमा एट्टो–१ सार्वजनिक गरिएको थियो। त्यसपछि भर्खरै सम्पन्न नेपाल अटोमोबाइल्स एन्ड डिलर्स एसोसिएसन (नाडा) को प्रदर्शनीमा एट्टो–२ सार्वजनिक गरियो।
यो स्टोरीमा हामी बिवाइडीका यी दुई मोडलको तुलनात्मक विश्लेषण गर्दैछौं।
सबभन्दा पहिला मूल्यको कुरा गरौं।
तपाईं कम लगानीमा उत्कृष्ट इलेक्ट्रिक कार किन्न चाहनुहुन्छ भने एट्टो–१ उपयुक्त विकल्प हो। ब्याट्री क्षमताअनुसार यो दुई संस्करणमा उपलब्ध छन्। डाइनामिक मोडलको २८ लाख ९५ हजार र प्रिमियम मोडलको ३२ लाख ९९ हजार रूपैयाँ पर्छ।
बिवाइडीका अन्य इलेक्ट्रिक कारको तुलनामा कम मूल्य पर्ने भएकैले यसले धेरै ग्राहकको ध्यान तानेको छ। 'बिवाइडी सिगल' र 'बिवाइडी डल्फिन मिनी' नामले ब्रान्डिङ गरिएको यो कार अरू देशमा पनि सुपरहिट छ। चिनियाँ बजारमा त पहिलो दिन नै १० हजारभन्दा बढी बिक्री भएको थियो। युरोपेली तथा दक्षिण अमेरिकी मुलुकहरूमा पनि 'हटकेक' बनेको छ। ब्राजिलमा ५० प्रतिशतभन्दा बढी बिजुली गाडीको बजार सिगलले नै ओगटेको तथ्यांक छ।
'विश्व कार पुरस्कार' जितेको बिवाइडीको यो मोडल अहिलेसम्म १० लाखभन्दा बढी बिक्री भइसकेको साइमेक्स इंकले जनाएको छ।
नाडा अटो शोमा सार्वजनिक गरिएको एट्टो–२ भने अलि महँगो पर्छ। यसको मूल्य ४३ लाख ९९ हजार रूपैयाँ तोकिएको छ।
बिवाइडी एट्टो–१
बिवाइडीको एट्टो शृंखला नेपाली बजारका लागि नयाँ भने होइन। पछिल्ला दुई संस्करण आउनुअघि सन् २०२२ मै एट्टो–३ भित्रिएर लोकप्रिय भइसकेको छ। यसलाई नेपालको 'बेस्ट सेलिङ एसयुभी' पनि भनिन्छ।
मूल्यपछि अब हामी एट्टो–१ र एट्टो–२ को मोटर र ब्याट्री क्षमता दाँजेर हेरौं।
यी दुवै मोडलमा 'ब्लेड ब्याट्री' प्रयोग गरिएको छ। यो परम्परागत ब्याट्रीजस्तो गह्रौं र ठूलो आकारको हुँदैन। ब्लेडजस्तो लाम्चो र पातलो आकारमा डिजाइन गरिएको हुन्छ। त्यसलाई कारको 'चेसिस' (फ्रेम) वा मुख्य भागमै मिलाएर राखिन्छ। यसले कार बलियो र मजबुत बनाउँछ। ब्याट्री तात्तिने समस्या आउँदैन। दुर्घटना हुँदा ब्याट्रीमा आगो लाग्ने खतरा पनि कम हुन्छ।
यति मात्र होइन, यस्तो खालको ब्याट्री प्रयोगले कारलाई हलुका राख्छ र सडकमा हाँक्दा सन्तुलित महसुस हुन्छ।
ब्याट्री क्षमताको कुरा गर्दा भर्खरै सार्वजनिक एट्टो–२ मा ५१.१३ किलोवाट–घन्टा क्षमताको ब्याट्री प्रयोग गरिएको छ। यो ब्याट्री पूरा चार्ज गरेपछि ३४५ किलोमिटर यात्रा गर्न सकिन्छ। अर्थात्, काठमाडौंमा पूरा चार्ज गरेको एट्टो–२ हाँकेर पोखरासम्म सजिलै पुग्न सकिन्छ।
यो ब्याट्री ७ किलोवाटको एसी चार्जरले ८ घन्टामा पूरा चार्ज हुन्छ। छिटो चार्ज हुने डिसी चार्जिङ प्रयोग गर्ने हो भने ३० प्रतिशतबाट ८० प्रतिशत चार्ज हुन २५ मिनेट मात्र लाग्छ।
अर्कोतर्फ, एट्टो–१ को डाइनामिक संस्करणमा ३० किलोवाट–घन्टा क्षमताको ब्याट्री छ। पूरा चार्ज गरेपछि २३० किलोमिटर यात्रा गर्न पुग्छ। प्रिमियमको ब्याट्री क्षमता ३९ किलोवाट–घन्टाको छ। पूरा चार्जले ३०० किलोमिटर गुड्छ।
एट्टो–१ का यी दुवै संस्करणका ब्याट्री ३.३ किलोवाटको एसी चार्जरले १० देखि १२ घन्टामा पूरा चार्ज हुन्छ भने डिसी चार्जिङबाट लगभग आधा घन्टामै ८० प्रतिशतसम्म चार्ज गर्न सकिन्छ।
कम्पनीका अनुसार एट्टो कारको ब्याट्री १० देखि १५ वर्ष सजिलै टिक्छ।
बिवाइडी एट्टो–२
मोटर क्षमताको कुरा गर्दा एट्टो–२ मा १०० किलोवाटको इलेक्ट्रिक मोटर प्रयोग गरिएको छ। यसले लगभग १३५ हर्सपावर शक्ति दिन्छ। बोलीचालीको भाषामा भन्दा यसले १३५ वटा घोडा बराबरको शक्ति दिन्छ भन्ने बुझिन्छ।
अर्कातिर, एट्टो–१ मा ४५ किलोवाट क्षमताको मोटर प्रयोग गरिएको छ। यसले लगभग ६० हर्सपावरको शक्ति दिन्छ। यो भनेको ६० वटा घोडा बराबरको शक्ति हो।
त्यसैले मोटर र ब्याट्री क्षमताका आधारमा एट्टो–१ भन्दा एट्टो–२ बढी शक्तिशाली छ। पहाडी क्षेत्रका कच्ची बाटोमा पनि सजिलै यात्रा गर्न सकिन्छ।
कारको गति पनि एट्टो–१ भन्दा एट्टो–२ मा धेरै छ। एट्टो–१ मोडल १३० किलोमिटर प्रतिघन्टाको गतिमा गुड्न सक्छ भने एट्टो–२ को अधिकतम गति १५० किलोमिटर प्रतिघन्टा हो।
अब कुरा गरौं, यी गाडीको बाहिरी बनावटको।
एट्टो–२ को लम्बाइ ४.३ मिटर, चौडाइ १.८ मिटर र उचाइ १.६ मिटर छ। यसको दाँजोमा एट्टो–१ होचो र सानो छ। एट्टो–१ को लम्बाइ ३.९ मिटर, चौडाइ १.७ मिटर र उचाइ १.५ मिटर छ।
त्यसैले एट्टो–१ सहरभित्रको यात्राका लागि राम्रो छ भने एट्टो–२ मध्यम र लामो दुरीको यात्राका लागि पनि उपयुक्त हुन्छ।
एट्टो–१ भनेको बिवाइडीका अरू मोडलभन्दा सानो आकारको कार हो। यो काठमाडौंजस्तो बढी घन्चमन्च भइरहने सहर र साँघुरा सडकहरूमा कुदाउन सजिलो हुन्छ। व्यस्त सहरी क्षेत्रका कामकाजी उपभोक्तालाई लक्ष्य गरेर नै यो मोडल डिजाइन गरिएको हो।
दुवै संस्करणका कारमा चालकसहित पाँच जना आरामसँग यात्रा गर्न सक्छन्।
गाडीको अगाडि र पछाडिका पांग्राबीचको दुरी, जसलाई प्राविधिक भाषामा 'ह्विलबेस' भनिन्छ, त्यो एट्टो–२ मा २.६ मिटर छ भने एट्टो–१ मा २.५ मिटर छ। ह्विलबेस धेरै भएको गाडीमा यात्रुहरूलाई खुट्टा राख्ने ठाउँ धेरै हुन्छ। उच्च गतिमा गुड्दा पनि सन्तुलन स्थिर रहन्छ। कच्ची बाटोमा सन्तुलित ढंगले हाँक्न सकिन्छ।
यसले पनि लामो दुरीका लागि एट्टो–२ र सहरभित्रको यात्राका लागि एट्टो–१ राम्रो हुने देखिन्छ।
यी दुवै संस्करणको 'ग्राउन्ड क्लियरेन्स' पनि फरक छ। यो भनेको कारको सबभन्दा तल्लो भाग र जमिनको सतहबीचको दुरी हो। एट्टो–२ को ग्राउन्ड क्लियरेन्स ६.९ इन्च (१७५ एमएम) छ भने एट्टो–१ को ५.९ इन्च (१५० एमएम) छ।
ग्राउन्ड क्लियरेन्स जति धेरै भयो उबडखाबड बाटोमा पनि गाडीको तल्लो भागले भुइँ छुने समस्या आउँदैन। त्यही भएर कच्ची बाटोको निम्ति एट्टो–२ उपयुक्त देखिन्छ।
जहाँसम्म चालक र यात्रुहरूको सुरक्षाको कुरा छ, एट्टोका यी दुवै संस्करणमा कुनै सम्झौता नगरिएको साइमेक्स इंकले जनाएको छ।
कम्पनीका अनुसार एट्टो–२ मा ७ वटा एयरब्याग प्रयोग गरिएका छन् भने एट्टो–१ मा ६ वटा एयरब्याग छन्। यी एयरब्यागले दुर्घटना हुँदा चालक र यात्रुलाई छोपेर गम्भीर घाइते हुनबाट बचाउँछ। गाडी कतै ठोक्किँदा वा दुर्घटना पर्दा एयरब्यागहरू आफै खुल्छन्।
एट्टोका दुवै संस्करणमा दुर्घटना जोखिम कम गर्न क्यामराहरू पनि जडान गरिएका छन्।
एट्टो–१ मा अगाडिको भागमा एउटा मात्र क्यामरा छ। एट्टो–२ मा अगाडि, पछाडि र दायाँ–बायाँ दुवैतर्फका लुकिङ ग्लासमुनि समेत गरेर चारवटा क्यामरा छन्, जसले बाहिरको दृश्य ३६० डिग्रीमा देखाउँछ।
यी दुवै कारमा पार्किङ सेन्सर छ, जसले गाडी पार्क गर्न सजिलो हुन्छ। दुवैमा 'एन्टी–लक ब्रेकिङ' प्रणाली पनि छ। यसले उकालोमा रोकिएको गाडी फेरि चलाउँदा पछाडि सर्नबाट बचाउँछ।
एट्टोका दुवै संस्करणको विशेषता 'भिटूएल' (भेहिकल–टू–लोड) प्रणाली हो।
यो प्रविधिमार्फत् तपाईं आफ्नो गाडीलाई अन्य घरायसी उपकरणहरूको निम्ति बिजुली स्रोतका रूपमा प्रयोग गर्न सक्नुहुन्छ। खासगरी बिजुली कटौती हुँदा वा आपतकालीन अवस्थामा यो सुविधा निकै उपयोगी हुनसक्छ।
सामान्य भाषामा भन्नुपर्दा, तपाईंको कारले आपतकालीन अवस्थामा घरमा बिजुली आपूर्ति गर्ने 'पावर बैंक' को काम गर्छ।
बिवाइडीले ब्याट्री चार्ज कति प्रतिशत सकियो र कति बाँकी छ भनेर मोबाइल एपबाटै हेर्ने सुविधा पनि दिएको छ। गाडीभित्र एसी घटबढ गर्ने, ढोकाको लक बन्द गर्ने र खोल्ने सुविधा पनि एपमै छ। यो मोबाइल एपले गाडीको नियमित अपडेट पनि दिन्छ। गाडी कहाँ छ र पछिल्लो समय कुन–कुन ठाउँमा गुडेको छ भनेर हेर्न सकिन्छ।
यति मात्र होइन, कारको स्टेयरिङमै फोन उठाउने र गीतहरूको आवाज तलमाथि गर्ने बटन छ। कार हाँक्दा हाँक्दै कसैको फोन आए मोबाइल स्क्रिन छुनु पर्दैन। एक्लै यात्रा गर्ने क्रममा यी सुविधा चालकलाई निकै उपयोगी हुने छन्। यसले गाडी हाँकिरहँदा चालकको ध्यान बाटोबाट हट्दैन।
कारको सामान राख्ने डिक्कीको क्षमता, जसलाई 'बुट स्पेस' भनिन्छ, त्यो पनि एट्टो–२ मा धेरै छ।
एट्टो–२ को डिक्कीको क्षमता ४०० लिटर हो, जसमा ६–७ वटा सुटकेस मज्जाले अट्छन्। एट्टो–१ मा भने ३४५ लिटर क्षमताको डिक्की छ। यसमा ४–५ वटा सुटकेस अट्छन्।
अब कुरा गरौं, एट्टो–२ मा मात्र भएका थप विशेषताबारे।
यसमा दुर्घटना जोखिम कम गर्न केही विशिष्ट प्रविधि प्रयोग गरिएको छ।
उदाहरणका लागि – यसमा 'अटोमेटिक स्पिड कन्ट्रोल' सुविधा छ। अगाडि अरू कुनै सवारी साधन छ भने यसले क्यामरा र सेन्सरको मद्दतले आफ्नो गति आफै समायोजन गर्छ। अर्थात्, अगाडिको गाडीको गति कम हुँदा यसको गति पनि स्वत: कम हुन्छ। ताकि, गाडी ठोक्किनबाट बचोस्।
यसमा भएका सेन्सर र क्यामराको मद्दतले 'अटोमेटिक इमर्जेन्सी ब्रेकिङ' सुविधा पनि दिन्छ। गाडीको अगाडि वा दायाँबायाँ कुनै अर्को गाडी, पैदलयात्रु वा कुनै चिज आयो भने सेन्सरले पत्ता लगाउँछ र ठोक्किनबाट बचाउन स्वत: ब्रेक लगाउँछ। यस्तो सुविधाले दुर्घटना जोखिम निकै कम गर्छ।
यो कारमा 'ड्राइभर ड्राउजिनेस डिटेक्सन' प्रविधि पनि प्रयोग गरिएको छ। गाडी चलाउँदा चलाउँदै चालकको ध्यान बाटोबाट हटेको अवस्थामा यो सिस्टमले सतर्क गराउँछ। यस निम्ति गाडीमा जडान गरिएका क्यामराले चालकको अनुहार निरन्तर अनुगमन गरिरहेको हुन्छ। चालक निदायो वा अन्यत्र ध्यान दियो भने यो सिस्टमले आवाज वा भाइब्रेसन निकाल्छ।
एट्टो–२ मा 'लेन किप असिस्ट' प्रविधि पनि छ। गाडी सडक लेनबाट बाहिर गयो भने यसले अलार्म बजाएर चालकलाई सतर्क पार्छ।
मूल्य र विशेषताको तुलनात्मक अध्ययनपछि अब तपाईं आफ्नो आवश्यकताअनुसार बिवाइडीका यी दुई कारमध्ये कुनै एउटा रोज्न सक्नुहुन्छ।
***
-1755241369.jpg)
-1746009348.jpg)
