निजी, यात्रुवाहकसँगै ढुवानीमा प्रयोग हुने गाडीमा पनि विद्युतीयको पकड बढ्न थालेको छ। ढुवानीमा प्रयोग हुने बिजुली गाडी (इभी) नेपालमा बिक्री सुरू गरिएको छोटो समयमै बजारमा बलियो उपस्थिति देखिन थालेको बिक्रेता कम्पनीहरूको भनाइ छ।
नेपालमा अघिल्लो वर्ष असोजबाट बिक्री सुरू भएको टाटा 'एस' (एसिई) इभी (पिकअप ट्रक) मात्रै सय वटाभन्दा बढी बिकेको छ। अघिल्लो साता सय वटाभन्दा बढी टाटा एस इभी बिक्री भएको अवसरमा टाटाको आधिकारिक बिक्रेता सिप्रदी ट्रेडिङले कार्यक्रम नै गरेर खुसियाली मनाएको थियो।
'पिकअप ट्रकसँगै समग्र गाडीको बिक्री केही वर्षदेखि घट्दो रहेका बेला टाटा एस इभी कम समयमै सय वटा बिक्नु निकै ठूलो उपलब्धि हो,' सिप्रदीका प्रतिनिधि अनुपमणि ढकालले भने।
हलुका सामान ढुवानी गर्न एससिभी (स्मल कमर्सियल भेइकल) प्रयोग हुन्छ। यस्ता गाडीलाई सानो पिकअप सेगमेन्टमा राखिन्छ। विशेषगरी छोटो (दुई सय किलोमिटरसम्म) दुरीमा हलुका सामान ढुवानी गर्न यी गाडी प्रयोग हुन्छन्। अहिले यो सेगमेन्टमा डिजेल र बिजुलीबाट चल्ने दुवै थरी गाडी छन्।
ढकालका अनुसार डिजेल एससिभी २०६२/०६३ सालमै आएका हुन्। बिजुलीबाट चल्ने भने बिक्री हुन थालेको डेढ वर्ष पनि भएको छैन। यो अवधिमा बिजुलीबाट चल्ने एससिभीको बिक्री हिस्सा ४० प्रतिशत माथि पुगेको उनले बताए।
'अहिले एससिभी बिक्रीमा ४० प्रतिशत हिस्सा विद्युतीयकै छ जुन निकै राम्रो हो। ढुवानी गाडी, खासगरी एससिभीमा विद्युतीयको पकड राम्रै देखिन थालेको छ,' उनले भने, 'सञ्चालन खर्च कम हुने, वातावरण मैत्री हुने, पेट्रोल पम्पसम्म धाउन नपर्दा समय बचत हुने लगायत कारणले एससिभीमा विद्युतीयको हिस्सा बढ्दै गएको हो'
डिजेलको तुलनामा टाटा एस इभीको सञ्चालन खर्च ४५ प्रतिशत कम हुने उनको भनाइ छ।
टाटा एस इभीको कुल तौल १,८४० किलो छ। ग्राउन्ड क्लियरेन्स (जमिन र गाडीको तल्लो भागको दुरी) १६० मिमी छ। यो एक पटकको पूरा चार्जमा १५४ किलोमिटरसम्म चल्ने सिप्रदीले जनाएको छ। सामान्य चार्जरबाट पूरा चार्ज गर्न सात घण्टा लाग्छ। फास्ट चार्जरबाट भने १०५ मिनेटमै ८० प्रतिशत चार्ज हुन्छ।
यसको लम्बाइ ३.८ मिटर र चौडाइ १.५ मिटर छ।
'साँघुरा र सहरका गल्लीहरूमा सहजै पुग्ने भएकाले सामान ढुवानीका लागि यो उपयुक्त हुन्छ,' उनले भने।
टाटा एस इभीको प्रयोग व्यावसायिक प्रयोजनका हलुका सामान (एक हजार किलोसम्म) बोक्न हुन्छ। किराना सामान, तरकारी-फलफूलदेखि बेकरी, डेरी, पानीका जार तथा बोतल लगायत सबैजसो सामान यसबाट ढुवानी हुन्छ। त्यस्तै पछिल्लो समय अनलाइन प्लेटफर्मबाट हुने अर्डर डेलिभरीमा यसको बढी प्रयोग भइरहेको उनले बताए।
सिप्रदीले टाटा एस इभी भारतमा सार्वजनिक हुनेबित्तिकै भित्र्याएको थियो। २०८० असोजमा ल्याइएको यसको मूल्य २६ लाख ९९ रूपैयाँ तोकेको थियो। तर नेपाली बजार केन्द्रित गरेर टाटाले निश्चित समयका लागि यसको मूल्य समायोजन गरेको छ। हाल एस इभीको मूल्य २२ लाख ९९ हजार रूपैयाँ मात्रै रहेको ढकालले जानकारी दिए।
'सुरूको मूल्यको तुलनामा अहिले चार लाख रूपैयाँ कम भएको छ। यसको प्रतिस्पर्धी मूल्यले पनि बिक्री र बजार हिस्सा बढाउन मद्दत पुग्यो,' उनले भने।
उनका अनुसार टाटा एस इभीको ब्याट्रीमा ६ वर्ष वा १.६ लाख किलोमिटरको वारेन्टी दिइएको छ। यो अवधिभर ब्याट्रीमा खराबी आए कम्पनीले बेहोर्छ।
अहिले एस इभीको बिक्री काठमाडौंमा मात्रै केन्द्रित छ। बढ्दो आकर्षणका कारण इटहरी, चितवन, पोखरा र नारायणघाट पनि ब्रिकी खुला गर्ने तयारी गरेको उनले बताए।
हाल हलुका सामान बोक्ने एससिभीमा डिजेलतर्फ टाटाको हिस्सा ८५ प्रतिशत रहेको कम्पनीले बताएको छ।
