सुजुकीका चार पाङ्ग्रे सवारी साधनको आधिकारिक विक्रेता सीजी मोटोकर्पले स्वीफ्टको तेस्रो संस्करण ‘द अल न्यू स्वीफ्ट’ नेपाली बजारमा ल्याएको छ।
सिजी होल्डिङ्सका सभापति तथा प्रबन्ध निर्देशक अरुण चौधरी र राष्ट्रिय क्रिकेट खेलाडी शक्ति गौचनले संयुक्त रुपमा गाडी सार्वजनिक गरेका हुन्।
१.२ लिटरको भिभिटी इन्जिनमा रहेको गाडीले ४२०० आरपिएममा ११३ एनएम अधिकतम टर्क र ६००० आरपिएम किलोवाट शक्ति उत्सर्जन गर्छ।
गाडीमा सिंगल एपर्चर फ्रन्ट ग्रील, एलइडी प्रोजेक्टर हेडल्याम्प, कट टु–टोन अलोय व्हील तथा अर्बन स्याटिन क्रोम युक्त इन्टेरियर छ।
सुरक्षाको लागि यसमा डवल एयरब्याग, इबिडीसँगै एबिएस, आईएसओ फिक्स र टोटल इफेक्टिभ कन्ट्रोल टेक्नोलोजी प्रविधि रहेको कम्पनीले जनाएको छ।
नयाँ स्वीफ्ट सुजुकीको पाँचौ संस्करण हर्टेक्ट प्ल्याटफर्ममा निर्माण गरिएको कम्पनीले जनाएको छ। यसले २२ किलोमिटर माइलेज दिने कम्पनीको दावी छ।
गाडी सार्वजनिक गर्दै सिजी मोटोकोर्पका कार्यकारी निर्देशक करण चौधरीले नयाँ फिचरले भरिपूर्ण यो स्वीफ्टले उपभोक्तालाई निश्चित रुपमा उत्साहित गर्ने दावी गरे।
‘हामी उपभोक्ताका भावनालाई बुझेर अपेक्षा अनुसारको सवारी प्रदान गर्न सफल रहनेछौँ,’ चौधरीले भने । यसको मूल्य भिएक्सआई भेरिएन्टको २८ लाख ९९ हजार र जेडआइएक्स भेरिएन्टको ३१ लाख ९९ हजार निर्धारण गरिएको छ।
तस्वीरः नारायण महर्जन/सेतोपाटी