बजारमा बरेलाको मूल्य घटेको छ।
कालीमाटी फलफूल तथा तरकारी बजार विकास समितिको तथ्यांकले यस्तो देखाएको हो।
कालीमाटी बजारमा आइतबार प्रतिकिलो थोक मूल्य दश रूपैयाँमा बिक्री भइरहेको काउली सोमबार प्रतिकिलो ८ रूपैयाँमा कारोबार भएको छ।
बजारमा काउली स्थानीय, ज्यापु र तराई गरी तीन प्रकारका छन्। जसमध्ये ज्यापुर काउली भने प्रतिकिलो थोक मूल्य १५ रूपैयाँमा कारोबार भइरहेको छ।
त्यस्तै, आइतबारको तुलनामा बरेलाको मूल्य पनि घटेको छ। आइतबार प्रतिकिलो थोक मूल्य ३० देखि ४० रूपैयाँमा बिक्री भइरहेको बरेला सोमबार २० देखि ३० रूपैयाँमा कारोबार भएको समितिको तथ्यांकले देखाएको छ।
अहिले बजारमा उल्लेख्य रूपमा तरकारी आएकाले मूल्य घटेको नेपाल फलफूल तथा तरकारी व्यवसायी संघका पूर्व अध्यक्ष खोम प्रसाद घिमिरेले जानकारी दिए।
कालीमाटी बजारमा काठमाडौं उपत्यकासँगै तराई र भारतीय तरकारीहरू पनि आएका छन्।
थोक मूल्य घटेसँगै खुद्रा मूल्य पनि घटेको छ।
बजारमा गोलभेडा, बन्दा, काउली, बरेला लगायतका तरकारी सस्तो मूल्यमा बिक्री भइरहेको छ।
