नेपालको चर्चित गायन रियालिटी शो द भोइस अफ नेपालका विजेताहरुको पहिलो विदेश यात्रा बेलायतमा हुने भएको छ।
बेलायतस्थित क्याडेन्जा यूके नेपाल इन्टरटेनमेन्ट लिमिटेडको संयोजनमा फेब्रुअरी १६ देखि मार्च ९ तारिखसम्म बेलायतका विभिन्न ७ शहरमा भोइस अफ नेपाल यूके कन्सर्ट हुन लागेको हो।
आयोजक क्याडेन्जा यूकेले शुक्रबार अल्डरसटको क्लब टेम्पटेसनमा एक पत्रकार सम्मेलन गरेर कार्यक्रमबारे जानकारी दिएको थियो ।
बेलायतमा प्रस्तुति गर्न भोइस अफ नेपालका विजेता सिडि विजय अधिकारी, फाइनलका प्रतियोगीहरु सिर्जे थपलिया, कुशल आचार्य र सप्तक दूतराजको साथमा विवेक वाइवा लामा, सुरेखा क्षेत्री र श्रेया राई आउने भएका छन्। बेलायतका कन्सर्टहरु होस्ट गर्न भोइस अफ नेपालका होस्ट सुशील नेपाल पनि बेलायत आउनेछन् भने एक जना महिला होस्ट यूकेबाटै राखिने भएको छ।
प्रोडक्सन टिमका सदस्यसहित कुल ११ जनाको टोली बेलायत आउनेछ ।
फेब्रुअरी १६ मा फोक्सटनको हकिंग्स कम्युनिटी सेन्टरबाट सुरू हुने भोइस अफ नेपालको यूके कन्सर्ट फेब्रुअरी१७ मा फार्नबरोको ओकफार्म लिजर क्लबमा, फेब्रुअरी १८ मा बर्मिङहमको वेस्ट बर्मिचस्थित द कन्फरेन्स सुटमा, फेब्रुअरी २३ मा लण्डन फेल्थामको फेल्थाम कम्युनिटी कलेजमा, २४ फेब्रुअरी मा प्लमस्टिडको एशियन कम्युनिटी सेन्टरमा, मार्च ३ मा रेडिङको साउथ रेडिङ कम्युनिटी सेन्टरमा र ९ मार्चमा स्वीण्डनको पञ्जाबी कम्युनिटी सेन्टरमा पुगेर टुंगिनेछ ।
पत्रकार सम्मेलनमा क्याडे्रन्जा यूकेका मार्केटिङ तथा पिआर निर्देशक धीरज राईले भोइस अफ नेपालजस्तो निकै लोकप्रिय शोका विजेताहरुको सबभन्दा पहिलो शो नै बेलायतमा ल्याउने अवसर पाएकोमा आफूहरु निकै उत्साहित रहेको बताए।
सबै शोहरुको लागि सम्पुर्ण प्राविधिक तथा व्यवस्थापकीय पक्षहरुको गुणस्तरमा कुनै सम्झौता नगर्ने र मनोरञ्जनको पूर्ण प्याकेज दिने प्रतिबद्धता निर्देशक राईले गरे।
सबै शोहरुमा लाइभ ब्याण्डको संगीतमा गायक गायिकाले गायन प्रस्तुत गर्नेछन्।
पत्रकार सम्मेलनमा प्रोजेक्ट म्यानेजर आवेश राईले हरेक शो युवा, बालबालिका, बुढाबुढी सबैले मन पराउने खालको बनाइने भन्दै उनले नेपाली लोक संगीतदेखि, सुगम, पप र रक एण्ड रोलसम्मका संगीत कार्यक्रममा प्रस्तुत हुने बताए।
बेलायतमा रहेर संगीतमा आबद्ध रहेकासहित झण्डै १ दर्जन युवाको सक्रियतामा हालै स्थापित क्याडेन्जा यूके नेपाल इन्टरटेनमेन्ट लिमिटेडले आयोजना गरेको यो पहिलो कार्यक्रम हुनेछ ।
पत्रकार सम्मेलनमा एनआरएन यूकेका उपाध्यक्ष प्रेम गाहामगर, युवा संयोजक कुमार थापा, सहकोषाध्यक्ष गजेन्द्र गुरूग र कार्यसमिति सदस्य पवन राई, नेपाली युवा समूह यूकेका उपाध्यक्ष केशव गुरूङ, सदस्यहरु मिनुष थापा र एन्डी राई, सुरज पौडेल, प्रकाश कँडेलका साथै आयोजक क्याडेन्जा यूकेको महिला संयोजक अञ्जु श्रेष्ठ, युथ कोअर्डिनेटर अमृता गिरी गजुरेल, कल्चरल सेक्रेटरी गिता बस्नेत पाण्डे लगायत उपस्थित थिए।
