बेलायतमा नेपालीहरूको बहुसांस्कृतिक पहिचानको झझल्को दिने पर्वका रूपमा स्थापित नेपाली मेला यस वर्ष पनि उल्लेख्य सहभागिताका साथ सम्पन्न भएको छ ।
दिनभरजसो लगातार परेको वर्षाको वास्ता नगरी हजारौंको संख्याका बेलायतबासी आइतबार लण्डनको केम्पटन पार्क रेस कोर्समा मेलाका लागि भेला भए ।
तमु धीं यूकेको आयोजनामा सन् २००९ देखि हरेक वर्ष गरिँदै आएको मेलाको यस वर्ष दशौं संस्करण थियो ।
मौलिक नेपाली पहिरनमा सजिएका हजारौं उपस्थितिले मेलास्थललाई मिनी नेपाल बनाएको अनुभूति हुन्थ्यो ।
नेपाली मेलामा यसपटक ३ दर्जन सांस्कृतिक झाँकीहरु प्रस्तुत गरिएको थियो। जसमध्ये विगतका २ वर्षको विजेता लमजुङ समाज यूकेले यसपटक पुनः सर्वोत्कृष्ट बन्दै लगातार तीन पटक एम्बासडर कप जितेर ह्याट्रिक गरेको छ।
.jpg)
झाँकीतर्फ सिक्लेस पर्चे समाज यूके दोस्रो र श्री मेश्राम बरम घान्द्रुक वेलफेयर सोसाइटी तेस्रो स्थानमा आउन सफल भए।
सांस्कृतिक नृत्यको प्रस्तुतितर्फ भने घान्द्रुक वेलफेयर सोसाइटी यूके प्रथम, लमजुङ समाज यूके दोस्रो र सिक्लेस पर्चे समाज यूके तेस्रो बने ।
मेलामा शुभकामना मन्तव्य दिँदै कार्यक्रमका प्रमुख अतिथी बेलायतका लागि नेपाली राजदूत डा दुर्गाबहादुर सुवेदीले मेला बेलायतबासी नेपालीमाझ एक पर्वको रुपमा स्थापित बनेको बताए। एकताको सूत्रमा बाँध्ने काम गरेको धारणा व्यक्त गरे।
.jpg)
तमु धीँ यूके अध्यक्ष ज्ञाम गुरुङले नेपाली मेला बेलायतका सबै नेपालीको अपनत्वसहितको साझा मेला रहेको बताए ।
त्यसअवसरमा मेलाका लागि उपराष्ट्रपति नन्दकिशोर पुन, पर्यटनमन्त्री रविन्द्र अधिकारी र तमु धि यूके संरक्षक एवम एनआरएन केन्द्रका पूर्व अध्यक्ष शेष घलेले पठाएका शुभकामना भिडियोहरू देखाइएको थियो। तमु धीँ युकेका उपाध्यक्ष तथा मेला संयोजक हितकाजी गुरुङले स्वागत मन्तव्य दिएका थिए भने महासचिव कृष्ण गुरुङले कार्यक्रम सञ्चालन गरेका थिए ।
कार्यक्रममा बेलायतस्थित विभिन्न कुटनीतिक नियोगका प्रतिनिधि, स्थानीय मेयर, काउन्सिलरहरु, नेपाली संघसंस्थाका प्रतिनिधीहरुका साथै बेलायतको विभिन्न ठाउँबाट नेपालीहरु सहभागी थिए ।
