बेलायतमा एकाउन्टिङको क्षेत्रमा कार्यरत नेपाली मिलेर एक संस्था स्थापना गरेका छन्।
आइतबार लण्डनमा आयोजित भेलाले सरोज सापकोटाको संयोजकत्वमा नेप्लिज एकाउन्टेन्टस् यूके स्थापना गरेको हो।
भेलाले ९ सदस्य रहेको कोअर्डिनेसन समिति पनि निर्वाचित गरेको छ जसको सहसंयोजकमा राजेन्द्र सुवेदी सचिवमा शशिधर नेपाल र कोषाध्यक्षमा सुरेन्द्र ढुंगाना चयन भएका छन।
समितिको संयोजक र सचिवका लागि निर्वाचन गरिएको थियो भने बाँकी पदमा सहमति भएको थियो ।
नवगठित समितिमा कार्यक्षेत्र विभाजनको आधारमा पाँच जनालाई कार्यगत उपसंयोजक तोकिएको छ जसमा कृष्ण प्रसाद खतिवडा, सुरेन्द्र थपलिया, समिर प्याकुरेल, प्रेम सुहांग र लेखनाथ घिमिरे छन्।
एशोसिएसनले बेलायतमा क्रियाशील नेपाली प्रोफेसनललाई संगठित गर्ने, उनीहरुको सीप तथा क्ष्मता अभिवृद्धिमा सहयोग गर्ने, पेशाकर्मीबीचको सम्बन्ध र सहकार्य बढाउने साथै सम्बन्धित बेलायती निकायसँग सम्बन्ध विस्तार गर्ने लगायतका लक्ष्य लिएको छ।
त्यस्तै, नेपालमा समेत स्किल ट्रान्सफर गराउने, नेपाल सरकारलाई एकाउण्टिङसँग सम्बन्धी विषयमा आवश्यक परामर्श दिने, बेलायतमा योग्यता लिएका एसीसीएलाई नेपालमा पनि पूर्ण मान्यता दिलाउन पहलगर्ने लगायतका लक्ष्य संस्थासँग छन्।
बेलायतका विभिन्न क्षेत्रबाट झण्डै ९० जना सहभागी भेलामा संस्थाको नाम, उद्धेश्य, सञ्चालन विधि, सदस्यता लगायतका विषयमा व्यापक छलफल गरिएको थियो।
संस्थाको स्थापना हुनुभन्दा अघिदेखि नै नेतृत्वको विषयमा सहमति बन्न नसकेर चुनावमै जाने निर्णय गरिएकोमा सहभागी कतिपयले राम्रो सन्देश नजाने भन्दै उदाहरणीय शुरुवात हुन नसकेको भनेर चिन्ता प्रकट गरेका थिए।
