ग्लोबल नेपाली
सप्तरीको राजविराजका रवीन्द्र कुमार यादव युएई (युनाइटेड अरब इमिरेट्स) को अबुधावी सहरस्थित बुर्जिल रोयल हस्पिटलमा काम गर्छन्। हस्पिटलको बुर्जिल डे सर्जरी सेन्टरमा उनी छालारोग सम्बन्धी विशेषज्ञ चिकित्सक हुन्।
रवीन्द्रले त्रिभुवन विश्वविद्यालयको शिक्षण अस्पताल, महाराजगञ्जबाट एमबिबिएस र भारतको बनारस हिन्दु विश्वविद्यालबाट एमडी गरेका छन्।
सन् २०१३ मा युएई गएका उनले सुरूमा अबुधावीको अल नूर हस्पिटलमा काम गरे।
'म गएका बेला त्यहाँ कोही नेपाली डाक्टर रहेको जानकारी पाइनँ। सम्भवतः युएई गएर सेवा गर्ने म पहिलो नेपाली डाक्टर हुँ,' उनले भने।
युएई जानुअघि रवीन्द्रले नेपाल र भारतका केही अस्पतालमा काम गरेका थिए।
सन् २०१० मा उनी नोबेल मेडिकल कलेज (विराटनगर) का निमित्त निर्देशक थिए। त्यही बेला बैंगलुरूमा एउटा ट्रेनिङमा जाँदा एक जना डाक्टरबाट युएईका लागि प्रस्ताव आयो।
उनी तत्काल जान तयार भएनन्। नोबेल छाडेर भारतको पुर्निया गए।
त्यसपछि पनि युएई जानेबारे कुरा भइरह्यो। पटक पटक प्रस्ताव आएपछि रवीन्द्र घुम्ने र परिस्थिति बुझ्ने उद्देश्यले सन् २०११ मा र सन् २०१२ मा युएई गए।
दुई पटक भ्रमणबाट उनी युएईमा काम गर्न र बस्न सकिन्छ भन्ने निष्कर्षमा पुगे। काम गर्ने वातावरण राम्रो छ, कमाइ पनि राम्रो हुन्छ भन्ने निश्चित भएपछि सन् २०१३ मा कामका लागि गए।
'केही समय परीक्षाको तयारी गरेर पास भएपछि म युएई आएँ। चार वर्ष अल नूरमा काम गरेर बुर्जिलमा सरेको हुँ,' उनले भने।
बुर्जिल रोयल हस्पिटलमा उनी डे सर्जरी सेन्टरमा काम गर्छन्। त्यहाँ बिरामी राति राखिँदैनन्।
युएईको प्रतिष्ठित कर्पोरेट ग्रुप बुर्जिल मातहत देशका विभिन्न ठाउँमा अस्पतालहरू छन्। तीमध्ये रवीन्द्र काम गर्ने अस्पतालमा बिरामी एक दिनमै घर पठाउने सकिने उपचार र अपरेसन (शल्यक्रिया) हुन्छ।
उनी छालारोग सम्बन्धी चिकित्सक टोलीका प्रमुख हुन्। टाउकोमा कपाल रोप्न चाहनेदेखि छालाको सामान्य समस्या भएका र छालाको क्यान्सर भएकासम्म आउँछन्।
'म काम गर्ने अस्पताल सुविधासम्पन्न छ। छालाको उपचारका लागि सबै खालको लेजर प्रविधि छ,' उनले भने, 'हामी छालाको सौन्दर्य र रोगको उपचार दुवैमा काम गर्छौं। अहिलेका धेरै मान्छेको ध्यान सुन्दरतामा छ।'
उनका अनुसार फेसियल गराउने, अनुहारको छाला राम्रो बनाउने, ट्याटु हटाउने, डन्डिफोर, चाया र पोतोको उपचारका लागि आउनेहरू धेरै हुन्छन्। छालामा साधारण फोका, दागधब्बा, बिमिरा आउने, चिलाउने लगायतको समस्या लिएर पनि आउँछन्।
यी बिरामीहरू विभिन्न देशका हुन्छन्। नेपालीहरू नगन्य मात्रै भेटेको उनले बताए।
अस्पतालमा रिसेप्सन, हाउसकिपिङ, सरसफाइ लगायतमा नेपाली कामदारहरू छन्। नेपाली डाक्टर भने नभएको उनले बताए।
'सुरूमा म आउँदा युएईमा नेपाली डाक्टरबारे केही थाहा थिएन। अहिले सय जना जति भइसक्यौं,' उनी भन्छन्, 'नेपाली स्वास्थ्यकर्मीको ग्रुपमा झन्डै तीन सय जना जोडिएका छन्।'
विदेशीहरूले युएईलाई रोजगारीको आकर्षक गन्तव्यका रूपमा रोज्न थालेपछि काम पाउन कठिन हुँदै गएको रवीन्द्रको भनाइ छ।
उनी युएई गएको समयमा चिकित्सा लाइसेन्स प्राप्त गरेपछि कामको प्रस्ताव आइहाल्थ्यो। काममा छनोटको सुविधा हुन्थ्यो। अहिले लाइसेन्स पाएपछि पनि काम पाउन कुर्नुपर्ने भएको छ।
उनले चार वर्षअघि युएईको गोल्डेन भिसा पाएका छन्। युएई सरकारले डाक्टर, इन्जिनियर, शिक्षक, वैज्ञानिक, व्यावसायिक व्यक्ति लगायत उच्च जनशक्तिलाई लगातार १० वर्ष बस्न पाउने भिसा दिन्छ। यसलाई नै गोल्डेन भिसा भनिन्छ।
सामान्यतया युएईमा भिसा अवधि रोजगारीका आधारमा हुन्छ। रोजगारी दिनेले चाहेमा मात्र भिसा थपिन्छ। गोल्डेन भिसा पाएपछि ढुक्क हुन्छ, रोजगारी दिनेको कुनै सिफारिस चाहिँदैन।
'रोजगारी नभए पनि बस्न पाइन्छ,' उनले भने।
रवीन्द्र युएईमा सामाजिक काममा पनि सक्रिय छन्। विशेष गरेर त्यहाँ रहेका मधेसी समुदायका नेपालीको हकहितका निम्ति आवाज उठाउन र उनीहरूका लागि चेतनामूलक कार्यक्रम चलाउन सक्रिय छन्।
'अस्पतालको कामबाट बचेको समय नेपाली मधेसी समुदायलाई दिन्छु। युएईमा विभिन्न जिल्लाका र समुदायका संघसंगठन थिए तर मधेसीको थिएन,' उनले भने,' 'हामीले मधेसी एकता समाज बनाएर मध्यपूर्वमा काम गर्ने मधेसी मूलका नेपालीलाई समेट्ने प्रयास गरेका छौं। म यसको अन्तर्राष्ट्रिय संयोजक हुँ।'
मधेसी एकता समाजले युएईका साथै मध्यपूर्वमा रहेका नेपाली मधेसी समुदायका व्यक्तिलाई परेको समस्या समाधानमा सहयोग गर्ने गरेको उनले बताए।
उनी मधेसका मुद्दा अन्तर्राष्ट्रियकरण गर्ने काममा पनि सक्रिय छन्। यसका लागि उनी दुई पटक जेनेभा पनि गइसके।
विदेश जानेहरूका लागि सीपमूलक कार्यक्रम चलाउने गरेको पनि उनले बताए।
विदेशी भूमिमा १२ वर्ष बिताइसकेका रवीन्द्रलाई नेपालमै बसेको भए पनि व्यावसायिक रूपमा राम्रै हुन्थ्यो भन्ने लाग्छ। कुनै परिस्थितिमा नेपाल छोडेको र यसमा पछुतो नभएको उनले बताए।
'नेपालमा हुँदा पनि, भारतमा हुँदा पनि राम्रै गरेँ। युएईमा पनि राम्रै गरिरहेको छु,' डा. रवीन्द्रले भने।
-1746009348.jpg)
