ग्लोबल नेपाली
पर्वतका खड्क केसीले क्याम्पस पढ्दै गर्दा काठमाडौंमा रेस्टुरेन्ट सुरू गरे।
सन् १९९६ मा रेस्टुरेन्ट गर्दैगर्दा उनी भर्खर १८ वर्षका थिए। २ वर्ष रेस्टुरेन्ट गरेपछि उनी बेल्जियम पुगे। होटल रेस्टुरेन्टमा काम गर्दै भाषा कक्षा पढे। भाषा अध्ययन गरिसकेपछि ३ वर्ष साइकल इन्जिनियरिङ पनि अध्ययन गरे।
डच भाषामा डिप्लोमा पास गरेकाले उनलाई थप अध्ययनका लागि सजिलो पनि भयो। साइकल इन्जिनियरिङ गरेपछि केसीले युनिर्सिटीमा साइकल मेकानिकको ट्रेनिङ समेत दिए। उनले १८ वर्ष यही क्षेत्रमा काम गरेका हुन्।
'त्यो बेला मैले साइकल सम्बन्धी सिक्ने मौका पाएँ। जसले गर्दा मलाई काम गर्न पनि सजिलो भयो। युरोपमा साइकललाई महत्व दिइने भएकाले यसमा अवसर धेरै छ,' उनले भने, 'जापान कोरियाबाट ल्याएका पार्टपुर्जालाई जोडेर विभिन्न खालका साइकल बनाइन्छन्। यसको मर्मतदेखि स्तरोन्नति गर्ने पढाइ पनि यहाँ हुन्छ।'
नेपालमा जस्तो साइकललाई सामान्य नठानिने भन्दै यसमा काम गर्ने ठाउँ थुप्रै रहने उनको अनुभव छ।
साइकल ट्रेनिङको कामसँगै उनले होटलमा पनि आंशिक रूपमा काम गरिरहेका थिए। त्यही भएर उनलाई सन् २०१४ देखि आफैले रेस्टुरेन्ट चलाउने आँट आयो। अनि उनले आफैले काम गर्दै गरेको रेस्टुरेन्ट किनेका हुन्।
'मेरो रेस्टुरेन्टमा मेक्सिकन, स्पेनिस, इटालियन, ग्रिस, नेपाली र इण्डियन सहित ९ देशको खाना पाइन्छ। यस्तो रेस्टुरेन्ट लुबेनमा बिरलै छन्,' उनले भने, 'कुनै बेला मेरा ५/६ ओटा रेस्टुरेन्ट थिए। मैले अरू बेचेर नेपालमा पनि विभिन्न क्षेत्रमा लगानी गरेको छु।'
हाइड्रो, रियल स्टेट अनि केबलकारमा आफ्नो लगानी रहेको उनले बताए। आफ्नो मात्र लगानीमा कुनै व्यवसाय नभए पनि सामूहिक लगानीमा आफू सहभागी रहेको केसीको भनाइ छ।
लामो समयदेखि बेल्जियममा रहेकाले उनी नेपाली समुदायमा पनि सक्रिय छन्। उनी गैरआवासीय नेपाली संघ (एनआरएनए) बेल्जियमको अध्यक्ष भइसकेका छन्। बेल्जियमको राजनीतिमा समेत सक्रिय छन्।
'म यहाँको स्थानीय राजनीतिमा समेत लागेको हो। यहाँको स्थानीय भाषा संस्कृति र राजनीतिमा चासो लाग्थ्यो। त्यही भएर सन् २०१४ मा सांसदको उम्मेदवार बने तर पराजित भएँ,' उनले भने, 'हाम्रो पहिलो पुस्तालाई यहाँ राजनीति गर्न अलि गाह्रै हुने रहेछ। आफ्नो पेसा व्यवसायलाई पनि हेर्नै पर्यो। त्यही भएर म अहिले सक्रिय राजनीतिमा छैन।'
सोसल डेमोक्रेटिक ग्रीनबाट उमेदवार बनेका केसी अहिले पार्टीमा आबद्ध छन् तर सक्रिय छैनन्।
विदेशमा रहेर आफ्नो व्यवसाय गरे पनि फुर्सदको समयमा नेपालकै बारेमा चासो रहने केसीको अनुभव छ। नेपालमा धेरथोर लगानी गर्न सके रोजगारी बढ्ने उनको बुझाइ छ।
नेपालको अस्थिरताले भने लगानीका लागि डराउने स्थिति उत्पन्न भएको उनको भनाइ छ।
'हामी यहाँ सुविधासम्पन्न ठाउँमा बस्छौं। तर पनि देशका लागि केही गर्न सकिन्छ कि भन्नेमा हाम्रो चासो रहन्छ। जन्मभूमिको महत्व विदेशको भूमिमा आएपछि झन् धेरै थाहा हुन्छ,' उनले भने, 'अहिलेको पछिल्लो आन्दोलनले केही परिवर्तन हुन्छ कि भन्ने आश छ। विदेशमा रहेकालाई फर्किन मन लाग्ने अनि नेपालमा रहेकालाई विदेशिन मन नलाग्ने वातावरण बनोस् भन्नेमा हाम्रो चासो रहन्छ।'
भ्रष्टाचारको अन्त्य र सुशासन कायम गर्न सकेमा युवाहरूलाई रोक्न सकिने उनको तर्क छ। यद्यपि युवाहरूलाई विदेश जानबाट रोक्ने विषय जबरजस्ती नभई देशको वातावरणमा भर पर्ने उनले बताए।
गैरआवासीय नेपालीको लागि लगानी ल्याउने सवालमा सरकार अझै पनि उदार हुन नसकेको भन्दै त्यसका लागि नागरिकताको निरन्तरता हुन पर्ने उनको माग छ।
'वंशजको नागरिकताको निरन्तरता भयो भने हाम्रा छोराछोरी पनि नेपालसँग नजिक हुन्छन्। उनीहरूलाई कसरी नेपालसँग जोड्ने भन्ने चिन्ता हामीलाई छ,' उनले भने, 'संविधान अनुसारको नागरिकता दिन ढिलाइ भएको छ। अहिले त एनआरएन नागरिकताले नै काम नगरेको अवस्था छ।'
आफूहरूले विदेशमा बसेर नेपालको राम्रो भइदिए हुन्थ्यो भन्ने सुझाव दिने बाहेक नीतिगत रूपमा केही गर्न नसक्ने समेत उनले बताए।
'हामीलाई लगानीको लागि सुरक्षित वातावरण चाहिएको हो। यसको लागि पहलकदमी लिने एनआरएनएमा पनि एक हुन सकेको छैन,' उनले भने, 'एकातिर हामी एक हुन जरूरी छ भने अर्कोतिर नेपाल सरकारले पनि हामीप्रति सद्भाव राख्नुपर्छ।'
-1746009348.jpg)
