अमेरिकाको संघीय अदालतले टिपिएस सुविधा तत्काल खारेज नहुने आदेश दिएसँगै यो सुविधा लिएर बसेका नेपाली आप्रवासीलाई राहत मिलेको छ।
२०७२ को भूकम्पपछि अमेरिकाले नेपाललाई दिँदै आएको टेम्पोररी प्रोटेक्टेड स्टाटस (टिपिएस) सुविधा एक महिना अघि खारेज भएको थियो।
अमेरिकाले टिपिएस सुविधा खारेज गरेसँगै यो सुविधाअन्तर्गत अमेरिका बसिरहेका नेपालीहरू अगस्ट ६ सम्म नेपाल फर्किन पर्थ्यो।
अदालतको आदेशसँगै टिपिएस सुविधा पाएकाहरुले नोभेम्बर १८ सम्मको समय पाएको न्युयोर्कमा कार्यरत कानुन व्यवसायी वासु फुलाराले बताए।
‘अमेरिकी संघीय अदालतले एक ऐतिहासिक आदेश जारी गर्दै नेपाल, हन्डुरास र निकारागुवाका लागि अस्थायी रूपमा लागू टिपिएसक कार्यक्रम अन्त्य हालका लागि रोक लगाएको छ।यो कार्यक्रम अन्तर्गत यहा बसेका नेपालीले अस्थायी राहत पाएका छन्।’उनले भने, ‘मुद्धाको अन्तिम सुनुवाइमा ढिलो भएको कारण नोभेम्बर १८ सम्म सरेको छ।त्यसपछि अन्तिम सुनुवाइ हुनेछ, जसले यसको भविष्यको दिशानिर्देश गर्नेछ।’
फुलाराका अनुसार अमेरिकामा टिपिएस सुविधा लिएका नेपालीहरु साढे ७ हजारदेखि ८ हजारको हाराहारीमा छन्।
टिपिएस कार्यक्रम सन् १९९०मा अमेरिकी कांग्रेसले सुरु गरेको मानविय योजना हो।
प्राकृतिक प्रकोप, युद्ध, वा सामाजिक अस्थिरता कारण आफ्नो मुलुक तत्काल फर्किन संभव नभएका नागरिकहरुले यो सुविधा पाउछन्। सन् २०१५ को विनाशकारी भूकम्पपछि नेपाललाई पनि टिपिएस सुविधा प्रदान गरिएको थियो।
-1746009348.jpg)
