घुमिरहूँ लाग्ने शैलुङ (तस्बिरहरू)

जीवन लामा

चैत २३

शैलुङ अहिले चर्चाको गन्तव्य बनेको छ। युवादेखि ज्येष्ठ नागरिक, भक्तजनको लागि पनि शैलुङ उपयुक्त र नजिकको गन्तव्य हो।

काठमाडौंबाट समेत एकैदिन आवातजावत गर्न सकिन्छ। दोलखाको सदरमुकाम चरिकोटबाट त झन् बिहानै आएर शैलुङको विभिन्न स्थानमा घुमफिर गरेर चरिकोट फर्किन सकिन्छ।

कालिञ्चोक एफएमको कार्यकक्ष चरिघ्याङबाटै शैलुङ डाँडा मज्जाले नियाल्न सकिन्छ। ३१४८ मिटर उचाइ रहेको शैलुङ दोलखाको जुनसुकै स्थानबाट सहजै नियाल्न सकिन्छ।

शैलुङ वर्षायाममा हरियाली र हिउँ पर्दा सेताम्मे देखिन्छ। हिउँदमा कत्तिखेर जाउँ जाउँ लाग्छ। म धेरै पटक घुमेको छु शैलुङ। सुरू सुरूमा सडकको सुविधा नहुँदा पनि भैंसे बजार र कहिले बाघखोर देउरालीबाट धेरै पटक हिँडेरै पुगेको छु। अहिले त कालापानीसम्म सररर गाडीमा पुग्न सकिन्छ।

शैलुङमा शैलुङ थुम्का मात्र होइन, यहाँ स्थानीय सरकार र विभिन्न निकायले निर्माण गरेका शैलुङ ग्रेटवाल, मठमन्दिर, छ्योर्तेन, भ्यूटावरले पनि आकर्षक र सुन्दरता थपिएको छ।

शैलुङ थुम्का नजिकै महादेवको मन्दिर, गुफा, पृथ्वीको नाइटो, भीमेश्वरको तरवार लगायतका महत्वपूर्ण स्थान छन्। अध्ययन, अनुसन्धान गर्न चाहने पर्यटकको लागि एकदिन पूरै समय लाग्न सक्छ।

शैलुङ ग्रेटवाल निर्माण गरेपछि पटक पटक जान मन लाग्छ। अधिकांश पर्यटक यही शैलुङ ग्रेटवालले लोभ्याएर तानेको लाग्छ। यही ग्रेटवालकै कारण उकालो हिँडेको महसुस हुँदैन।

चीनको ग्रेटवालझैं लाग्छ शैलुङ ग्रेटवाल। अझ युवा पुस्तामा मौलाएको टिकटक, रिल्स बनाउनेको लर्को लागेको हुन्छ। शैलुङको थुम्काले झन् पर्यटकको आँखानै चिम्लिन दिँदैन। घण्टौं हेरिरहूँ झैं मोहनी लगाइदिन्छ। यहाँ हिँड्न नसक्ने पर्यटकको लागि घोडाको व्यवस्था छ। ठाउँ ठाउँमा पानी, खानेकुराको व्यवस्था छ। एक पटक शैलुङ घुमेका पर्यटकले अर्को सिजनमा आउने भाकल गरेको हुन्छ नै। म यही ठाउँको भएता पनि पटक पटक घुम्न मन लाग्छ। अहिले सडकको सुविधा छ। बस्न चाहने पर्यटकको लागि बाघखोर देउराली, ढुङ्गे बजारमा राम्रा राम्रा होटलको व्यवस्था छ। कालापानीमा होटल, लजको व्यवस्था भएपनि केही होटल व्यवसायीको व्यवहारप्रति पर्यटक असन्तुष्टि छन्। त्यसैले पर्यटकहरू कालापानीमा खाना खान र बस्न चाहँदैनन्।

तस्बिरहरू:

sailung-(14)-1743838189.jpg