चिकित्सा शिक्षामा फर्जी फ्याकल्टी रोक्न अनिवार्य औंठा छाप


चिकित्सा शिक्षा अध्यापन गराइने मेडिकल कलेजमा फर्जी फ्याकल्टी (नक्कली विषयगत शिक्षक) सञ्चालनमा संस्थागत मिलेमतो देखिएपछि कारबाहीको दायरामा ल्याउन नेपाल मेडिकल काउन्सिलले विषयगत शिक्षकको औंठा छाप लिन थालेको छ । चिकित्सा शिक्षालाई गुणात्मक ढंगले अध्यापन गराउनुको साटो निजी मेडिकल कलेजले न्यून खर्चमा अध्यापन गराउन खडेबाबा (नक्कली शिक्षक) राखेको पाइएपछि बायोमेट्रिक प्रणालीमार्फत औंठा छापसहितको रेकर्ड लिन थालिएको हो । यो खबर हामीले आजको अन्नपूर्णबाट लिएका हौ।

मेडिकल कलेजमा पढाउने विषयगत शिक्षकको औंठा छाप लिन थालिएको काउन्सिलका अध्यक्ष प्राडा धर्मकान्त बास्कोटाले बताए । हालसम्म काठमाडौं बाहिरका सबै मेडिकल कलेजमा काउन्सिलको टोली गई विषयगत शिक्षकहरूको बायोमेट्रिक लिइसकेका छन् ।

काउन्सिल अध्यक्ष डा.बास्कोटाका अनुसार राजधानीका मेडिकल कलेजमा अध्यापनरत विषयगत शिक्षकको औंठाछाप रेकर्ड ल्याउने कार्य भइरहेको छ । रेकर्ड लिँदा बायोमेट्रिक डिभाइस प्रयोग गरिएको उल्लेख गर्दै उनले भने, ‘अनुगमनका क्रममा पछि जाँदा डिभाइसमा भएको रेकर्डअनुसार औंठाछाप मिल्छ कि मिल्दैन चेक गर्छौं । रेकर्डमा मिलेन भने कारबाहीको दायरामा ल्याउँछौं । अब खडेबाबाहरूको खैरियत छैन ।’

बायोमेट्रिक डिभाइसमा विषयगत शिक्षकको हस्ताक्षर र अन्य व्यक्तिगत विवरणसमेत संकलन गरिएको छ ।त्रिभुवन विश्वविद्यालय र काठमाडौं विश्वविद्यालयबाट सम्बन्धन लिएका विराटनगर, वीरगन्ज, भैरहवालगायत स्थानमा सञ्चालित मेडिकल कलेजका फ्याकल्टीमा विषयगत शिक्षक फर्जी भएको काउन्सिल स्रोतले बतायो । एमबीबीएस र बीडीएसमा अध्यापन गराउन खडेबाबा राखिने गरिएको छ ।

बढी विद्यार्थी भर्ना गराउने अपेक्षासाथ सीमावर्ती मेडिकल कलेजले भारतबाट विषयगत शिक्षक ल्याएर फर्जी फ्याकल्टी बनाउने गरेको पाइएको छ । ‘अनुगमनमा जाँदा परिचयपत्रसहित बसेका हुन्छन् । तर विद्यार्थी, अभिभावक वा अन्यसँग बुझ्दा त्यहाँ नबसेको पाइन्छ । त्यस्ता खडेबाबालाई बढार्नुपर्ने भएको छ’, डा.बास्कोटाले भने ।

हरेक मेडिकल कलेजमा कार्यरत विषयगत शिक्षकको विवरण सार्वजनिक गर्ने तयारी भइरहेको काउन्सिलका अध्यक्ष डा.बास्कोेटाले बताए । उनका अनुसार विषयगत शिक्षकले सम्बन्धित मेडिकल कलेजमा भन्दा बाहिर काम गर्ने÷नगर्ने सम्बन्धमा सबै जना सचेत हुनेछन् ।

योग्य शिक्षक नहुँदा विद्यार्थीको अध्ययन पनि कमजोर भएको उल्लेख गर्दै बास्कोटाले त्यसको प्रत्यक्ष मार सेवाग्राही बिरामीमा पर्ने बताए ।

Share:

© 2017 Setopati Sanchar Pvt. Ltd.