अभिनेत्री रेखा थापाले लामो समय लगातार फिल्ममा काम गरिन्।
समकालीन तथा नयाँ अभिनेत्रीहरू म्युजिक भिडिओमा प्रशस्तै देखिँदा रेखाले आफ्नो २५ वर्षको फिल्म करिअरमा एउटा मात्रै भिडिओमा मोडलिङ गरिन्।
उनले खेलेको एकमात्र म्युजिक भिडिओ गायक आनन्द कार्कीको चर्चित गीत 'लाग्छ मन हेरिरहुँ' हो। यो भिडिओ पनि रेखाले आफ्नो करिअरको संघर्षताका खेलेकी थिइन्। त्यसपछिका वर्षहरूमा महंगो पारिश्रमिकको प्रस्ताव आए पनि उनले म्युजिक भिडिओमा काम गरिनन्।
वर्षौ वर्षपछि भने रेखा दोस्रो म्युजिक भिडिओमा देखिन लागेकी छन्। उनले प्रकाश सपुतको आगामी गीत 'नाइँ भनेसी नाइँ' मा काम गरेकी हुन्। 'बदला बरिलै २' का रूपमा आउन लागेको यो गीत साउन १६ गते रिलिज हुनेछ।
प्रकाश सपुतले तीजलाई लक्षित गरेर ल्याउन लागेको यो गीतमा विषयवस्तुका कारण आफूले अभिनय गरेको रेखाले बताएकी छन्।
उनले भनिन्, 'गीतले एउटी बालिका, युवती, महिला र समस्त आमाहरूको आत्मसम्मानको विषय उठाएकोले म तयार भएकी हुँ। विगतमा पनि म समस्त छोरीहरूको सवालमा, उनीहरूको पक्षमा सधैं नै उभिंदै आएकी छु। त्यसका विविध मञ्च तपाईंहरूले देख्दै आउनुभएको छ। यसपटक यो संगीतको मञ्च मलाई उपयुक्त लाग्यो। यतिबेला म नारी मात्र नभएर एउटी छोरीकी आमासमेत भएकाले यो विषयलाई मैले 'नाईं' होइन 'हुन्छ' भन्नुपर्छ भनेर खेलेँ।'
गायक हुँदै फिल्मका निर्माता, लेखक तथा निर्देशकसमेत बनिसकेका प्रकाश सपुतले गत वर्ष 'बसन्त' फिल्मका कारण तीजको छेकोमा गीत निकाल्न नसकेको बताउँदै यो गीतको कन्सेप्ट तयार हुँदा नै रेखा थापालाई सोचेर बनाइएको बताए।
रेखाले म्युजिक भिडिओ नगर्ने सुनेको भए पनि विषयवस्तुका कारण थापाले स्वीकार्ने विश्वास आफूलाई भएकाले प्रस्ताव गरेको प्रकाशको भनाइ छ।
उनले भने, 'दिदीलाई जुन विषय छानिएको छ, त्यसले धेरै छोयो। उहाँसँग जब मैले विषयको कुरा गरें, उहाँले 'यसमा फिल्म बनाउन सकिंदैन?' भनेर सोध्नुभएको थियो। अहिले फिल्म बनाउन चाहिँ अलि तयारी छैन, भिडिओमार्फत भनौं, अझ धेरै ठाउँमा पुग्छ भनेपछि दिदी खेल्न तयार हुनुभयो।'
गीतमा एलिना चौहान तथा समीक्षा अधिकारीले स्वर दिएका छन्। दर्शक-श्रोताले गीत मन पराउने विश्वास प्रकाशको छ।
-1746009348.jpg)
