नयाँ वर्षबाट कान्तिपुर सिनेमाजबाट प्रसारण भएको वेबप्ले सिरिज 'यौटा सपनाको अवसान' को लिरिकल भिडिओ सार्वजनिक भएको छ।
'आऊ हजुर आऊ' बोलको गीतमा न्ह्यू बज्राचार्यको संगीत, विप्लल प्रतीकको शब्द र शारदा अधिकारीको स्वर रहेको छ। लिरिकल भिडिओमा मञ्चनको समयका विशेष मुद्रालाई समावेश गरिएको छ। 'यौटा सपनाको अवसान' नाटकलाई सिरिजको रूपमा रूपान्तरण गरिएको सिर्जना हो।
नाटक गत वर्ष चैत्र १० देखि वैशाख १३ सम्म मण्डला नाटक घरमा मञ्चन भएको थियो। निर्माण कम्पनी गोविन प्रोडक्सन र पौराणिक पिक्चर्सले नाटकघरको मञ्चन छुटाएका दर्शकलाई लक्षित गर्दै नाटकलाई नयाँ स्वरूपमा पस्किएको जानकारी गराएको हो।
निर्माता गोविन्द पराजुलीले नाटकलाई नयाँ दर्शकमाझ लैजाने प्रयास स्वरूप ‘यौटा सपनाको अवसान’ लाई ओटिटीमा रिलिज गरिएको बताएका छन्। सिरिजले ओटिटीमा उत्साहजनक दर्शक पाइरहेको उनको दाबी छ।
अनुप बरालले निर्देशन गरेको यस नाटकले आर्थिक मन्दीमा फसेको एक परिवारको कथा प्रस्तुत गर्छ। नाटकमा दिया मास्के, दिव्यदेव, मेनुका प्रधान, रोय, विकाश जोशी, शेखर चापागाईंको मुख्य अभिनय रहेको छ। सिरिज कान्तिपुर सिनेमाजमा ७ भागमा उपलब्ध छ।
