फिल्म जतिसुकै ठूलो बजेटमा बनेको होस् वा जतिसुकै स्थापित कलाकारले काम गरेका हुन्, त्यसको भाग्य लेख्ने काम दर्शकहरूले नै गर्छन्।
यसअघि 'बोक्सीको घर', 'पूर्णबहादुरको सारंगी' लगायत फिल्मको भाग्य दर्शकहरूले लेखेका थिए। यी दुवै फिल्म 'सुपरहिट' मा दर्ज भएका छन्।
यस पटक 'परान' ले त्यस्तै संकेत देखाएको छ।
यो फिल्मले कात्तिक १४ गते रिलिजको दिन मुस्किलले ५ लाख रूपैयाँ व्यापार गरेको थियो। धेरैले यसलाई हलबाट चाँडै ओर्लिने सूचीमा राखिसकेका थिए। दोस्रो दिन शनिबार पनि फिल्मको व्यापार निराशाजनक रह्यो। बिदाको दिन पनि दर्शक नआउँदा फिल्मको भविष्यलाई लिएर निर्माण टिम चिन्तामा थियो।
तर आइतबारसम्म आइपुग्दा यो फिल्मले झन्डै साढे चार करोड रूपैयाँको आँकडा छोएको निर्माण पक्षले जनाएको छ।
चलचित्र विकास बोर्डले शनिबारसम्मको आधिकारिक बक्स अफिस रिपोर्ट सोमबार सार्वजनिक गरेको छ। यसअनुसार फिल्मको खुद कमाइ ३ करोड ७१ लाख रूपैयाँ नाघेको छ। फिल्मको यो कमाइले फिल्मवृत्तमा धेरैलाई चकित पारेको छ।
आखिर कसरी सम्भव भयो यो अविश्वसनीय यात्रा?
परानको यो सफलता पछाडि धेरै कारण हुन सक्छन्।
एक– पहिलो कारण 'माउथ पब्लिसिटी' लाई मान्न सकिन्छ। सुरूआती दिनमा खासै व्यापार नभए पनि ज–जसले फिल्म हेरे, उनीहरूले यसको प्रशंसा गर्न थाले। यसले गर्दा 'वर्ड अफ माउथ' निकै बलियो भयो र नयाँ दर्शकहरू हलसम्म पुग्न प्रेरित भए।
दुई– कथावस्तु र प्रस्तुति। फिल्मको कथावस्तु, कलाकारहरूको अभिनय र समग्र प्रस्तुतिले दर्शकको मन छोएको देखिन्छ।
कतिपय फिल्ममा ठूलो बजेट र प्रचार भए पनि कथा कमजोर हुँदा असफल हुन्छन्। परानले भने कम प्रचार गरे पनि राम्रो कथा र प्रस्तुति दिएर दर्शकलाई बाँध्न सफल भयो। स्टार कलाकार वा आक्रामक मार्केटिङबिना पनि राम्रो कथा र प्रस्तुतिले दर्शकको मन जित्न सकिन्छ भन्ने यसले देखाउँछ।
तीन– दर्शक फिल्मप्रति आकर्षित हुनुको तेस्रो कारण हुन सक्छ, भावनात्मक सम्बन्ध। बाबु र सन्तानबीचको सम्बन्धको कथामा बनेको फिल्मले दर्शकलाई भावनात्मक रूपमा जोड्न सफल छ। जब दर्शकले पर्दामा देखाइएको कथालाई आफ्नै जीवन वा समाजसँग जोड्न सक्छन्, तब उनीहरू फिल्मप्रति बढी आकर्षित हुन सक्ने यसको सफलताले देखाउँछ।
चार– सकारात्मक समीक्षा र चर्चा। सामाजिक सञ्जाल र विभिन्न सञ्चार माध्यममा आएका सकारात्मक समीक्षा तथा चर्चाले पनि फिल्मलाई थप उचाइमा पुग्न मद्दत गर्यो।
अहिलेको डिजिटल युगमा सामाजिक सञ्जालको भूमिकालाई परानको सफलतामा कदापि कम आँक्न मिल्दैन। खासगरी फेसबुक र टिकटकजस्ता प्लेटफर्ममा फिल्म हेरेका दर्शकले आफ्ना अनुभव, प्रतिक्रिया साझा गर्न थाले। यसले छिटो र प्रभावकारी रूपमा फिल्मको चर्चा फैलिँदै गयो।
पाँच– विशेषगरी हलमा दर्शकहरू फिल्म हेरेर भावुक भएका, आँशु खसालेका र राम्रो प्रतिक्रिया दिएका भिडिओहरू बाहिर आउनु परानको सफलताको अर्को महत्वपूर्ण पाटो मान्न सकिन्छ। अहिलेको डिजिटल युगमा सामाजिक सञ्जाल फिल्मको प्रचारका लागि कत्तिको प्रभावकारी माध्यम बन्न सक्छ भन्ने कुरा पनि परानले स्पष्ट देखाउँछ।
दर्शक भावुक बनेका, कतिपयले आँसु खसालेका भिडिओ आउँदा यसले दर्शकलाई मात्र मनोरञ्जन नभई भावनात्मक अनुभव पनि दिएको बुझून् सकिन्छ।
यस प्रकारका भिडिओहरू आउँदा फिल्ममाथि विश्वास बढ्दै गयो। र, यसले व्यापक दर्शकलाई हलसम्म तान्न सफल भयो। यी भिडिओहरू आफैमा एउटा शक्तिशाली प्रचार सामग्री बने, जसले परानको व्यापार ह्वात्तै बढायो।
परान दोस्रो सातामा प्रवेश गर्दा ठूलो ब्यानर र प्रतीक्षित फिल्म 'जारी २' रिलिज भएको थियो। यो फिल्मको औसत प्रतिक्रिया आउदा त्यसको फाइदा परानलाई पुगेको देखिन्छ। यदि आफ्नो फिल्मको कथावस्तु बलियो छ र दर्शकले मनपराए भने सफलता पाउन सकिन्छ भन्ने यसले देखाउँछ।
यसरी, सुरूआती दिनको निराशालाई चिर्दै सोमबारसम्म आउँदा परानले दर्शकको माया र विश्वास जितेर सुपरहिटको बाटो तय गरेको छ। हलमा दर्शक उपस्थिति देख्दा परानको निरन्तरता र व्यापार अझै माथि जाने अनुमान गर्न सकिन्छ।
समग्रमा भन्दा फिल्म यसरी सफल हुनुमा माउथ पब्लिसिटी, कथावस्तु, भावनात्मक सम्बन्ध, सामाजिक सञ्जाल र प्रतिस्पर्धाको अभाव बुझ्न सकिन्छ।
परान नयाँ निर्देशक दीपकप्रसाद आचार्य (काकु) निर्देशित फिल्म हो। त्यसमाथि यसको निर्माणमा व्यावसायिक घराना गोल्छा ग्रुपका शेखर गोल्छा र लामो समय विज्ञापनको क्षेत्रमा काम गरेका रञ्जित आचार्य छन्।
नयाँ निर्देशक र निर्माताले ल्याएको फिल्म चल्नु अन्य नयाँ निर्माता र निर्देशक, त्यसमा पनि व्यवसायिक घरानाका व्यक्तिलाई समेत यो क्षेत्रमा आउन प्रेरणा बन्न सक्छ।
-1746009348.jpg)
