गुड फ्राइडे सिनेमा
मलयालम (दक्षिण भारतीय) थ्रिलर फिल्म प्रायः रहस्य र पात्रहरूको मनोवैज्ञानिक स्थितिमा आधारित हुन्छन्। कथामा अप्रत्याशित मोड आउनु थ्रिलर–सस्पेन्स मलयालम फिल्मको खास विशेषता हो।
त्यस्तै, यिनमा व्यक्तिगत वा सामाजिक मुद्दा उजागर गरिएको हुन्छ र दर्शकलाई सोच्न बाध्य पार्ने शैलीमा प्रस्तुत गरिएका हुन्छन्।
यस्तै फिल्म हो सन् २०२३ मा रिलिज भएको 'आट्टम'।
फिल्मको कथा रंगकर्मीहरूको एक समूह 'अरंगु' वरिपरि घुम्छ। यो समूहमा १३ जना सदस्य छन्—१२ पुरूष र एक महिला।
अञ्जली समूहकी एक मात्र अभिनेत्री हुन्। फिल्मको सुरूआतमा अञ्जली व्यक्तिगत र रंगमञ्चको जीवनबीच संघर्ष गरिरहेकी देखिन्छिन्। सानैदेखि रंगमञ्चमा काम गरेकी अब्बल अभिनेत्री भए पनि महिला भएकै कारण उनलाई नाटकमा उति महत्त्व दिइँदैन।
तर एक दिन अञ्जली आफ्नो कलामार्फत् दर्शकको मन जित्न सफल हुन्छिन्।
यसैबीच समूहमा नयाँ सदस्य हरिको आगमन हुन्छ। हरि सिनेमाका कलाकार हुन्छन् र उनको आगमनले समूहमा उत्साह ल्याउँछ। सँगै, प्रतिस्पर्धा र इर्ष्याको वातावरण पनि सिर्जना गर्छ।
हरिको अभिनय क्षमता र व्यक्तित्वबाट अञ्जली र समूहका अरू सदस्यको ध्यान आकर्षित हुन्छ।
अञ्जलीको अर्का एक युवा विनयसँग प्रेम सम्बन्ध हुन्छ जसबारे अरूलाई थाहा हुँदै। विवाहित विनय डिभोर्सको प्रक्रियामा हुन्छन्।
एक दिन नाटक राम्रो भएको उपलक्ष्यमा समूहले पार्टी गर्छ। पार्टीपछि राति सुतेका बेला अञ्जलीमाथि यौन उत्पीडनको प्रयास हुन्छ।
अञ्जलीले पीडकलाई चिन्दिनन्, मात्र उसको पर्फ्युमको गन्ध उनलाई थाहा हुन्छ। अनि एक चाबी छुटेको हुन्छ। अञ्जलीले यिनै कुराका आधारमा हरिलाई नै दोष लगाउँछिन्। तर पर्याप्त प्रमाण नहुँदा विवाद बढ्छ।
अञ्जलीले दोषी पत्ता लगाउन विनयसँग सहयोग माग्छिन्।
विनय सुरूदेखि नै हरिको इर्ष्या गर्थे। हरिले नाटकमा मुख्य भूमिका पाएकोमा विनयको आरिस बढेको हुन्छ। त्यसैले उनले यही मौकामा हरिलाई पछि पार्ने सोच्छन्।
घटनाबारे समूहमा छलफल हुन्छ। समूहका अन्य सदस्यहरूले घटनालाई विभिन्न दृष्टिकोणबाट विश्लेषण गर्छन्। कतिपयले हरिको समर्थन गर्छन्। कतिपयले घटना भएकै होइन, अञ्जली नशामा थिइन् वा उनलाई भ्रम भएको भन्छन्।
यसरी सो घटनापछि समूहमा आन्तरिक द्वन्द्व बढ्दै जान्छ। सदस्यहरूबीच नै शंका, आरोप र विश्वासघातको वातावरण फैलिन्छ।
अन्ततः फिल्म यस्तो मोड लिएर अन्त्य हुन्छ, जुन सम्भवतः दर्शकले परिकल्पना गरेका हुँदैनन्।
आखिर दोषी को थियो? हरि वा अञ्जली? वा अरू कोही? वा सबै?
कथाको तनावपूर्ण प्रस्तुतीकरणले दर्शकलाई अन्तिम क्षणसम्म बाँधेर त राखिहाल्छ।
समीक्षकहरूले यो फिल्मको कथा, निर्देशन र अभिनयलाई उच्च मूल्यांकन गरेका छन्। फिल्ममा सामाजिक सन्देशलाई थ्रिलर शैलीमा प्रभावकारी रूपमा मिश्रण गरिएको छ। त्यसैले समीक्षकहरूले यसलाई सशक्त सामाजिक सन्देश दिने थ्रिलर भनेका छन्।
'आट्टम्' ले राष्ट्रिय र अन्तर्राष्ट्रिय स्तरमा विभिन्न पुरस्कार पनि जितेको छ।
७० औं नेसनल फिल्म अवार्ड्स (सन् २०२४) मा यसले उत्कृष्ट फिचर फिल्मसहित तीन वटा अवार्ड पाएको थियो। केरल फिल्म क्रिटिक्स एसोसिएसन अवार्ड–२०२३ मा पनि उत्कृष्ट फिल्मसहित तीनै वटा अवार्ड जित्यो। त्यस्तै, भारतीय फिल्म फेस्टिभल अफ लस एन्जल्स–२०२३ मा ग्र्यान्ड जुरी अवार्ड जितेको छ।
-1755241369.jpg)
-1746009348.jpg)
