गुड फ्राइडे सिनेमा
देवकी सबरवाल कलेजमा जीव विज्ञान विषय पढाउँछिन्। मनकी कोमल भए पनि कडा स्वभावकी देखिने उनी आफ्ना विद्यार्थीहरू माझ लोकप्रिय छिन्।
उनकै विद्यार्थीमध्ये एक हुन् उनकी सौतेनी छोरी आर्या। देवकीले किशोर उमेरकी आर्यालाई आफ्नी छोरीका रूपमा अपनाएकी हुन्छिन्। तर आर्याले आफ्नी आमा गुमाएपछि देवकीलाई स्वीकार गर्न सकेकी छैनन्। उनी देवकीलाई आफ्ना बुबाकी श्रीमती मात्र मान्छिन्।
यहीबीच एक दिन उनीहरूको जीवनमा भयानक घटना आइपर्छ।
भ्यालेन्टाइन्स डेका दिन आर्या एउटा पार्टीमा गएकी हुन्छिन्। त्यहाँ केही बदमास युवकहरूले उनलाई दुर्व्यवहार गर्न खोज्छन्। उनले प्रतिकार गर्दा ती युवकहरूले उनको अपहरण गर्छन्। सामूहिक बलात्कार गरेर उनलाई मरिसकेको ठान्दै बाटोमा फ्याँकिदिन्छन्।
अर्को दिन एक जनाले आर्यालाई देखेर अस्पताल पुर्याउँछन्। देवकी र आर्याका बुबा आनन्द छोरीको हालत देखेर विक्षिप्त हुन्छन्।
आर्याको बयान अनुसार प्रहरी म्याथ्यु फ्रान्सिसले अपराधीहरूलाई पक्राउ गर्छन्। तर कानुनी प्रक्रियामा कमजोरीको फाइदा उठाउँदै अपराधीहरूले न्यायालयबाट सफाइ पाउँछन्। उल्टो आर्यालाई मदिरा सेवन गरेको भनेर उनको बयानलाई अविश्वसनीय बनाउन सफल हुन्छन्।
यो घटनाले देवकीलाई आक्रोशित बनाउँछ। उनले न्याय प्रणालीमाथि विश्वास गुमाउँछिन्।
यसपछि सुरू एक आमाको बदला यात्रा।
छोरीको पीडामा रन्थनिएकी देवकीले यसपछि यस्ता कदम चाल्छिन्, जुन दर्शकलाई अनुमान नै हुँदैन। एक सामान्य गृहिणी र शिक्षकको जीवन बाँचिरहेकी देवकी यस्तो हदसम्म जान्छिन्, जसले दर्शकलाई धुकचुक बनाइरहन्छ।
हामी कुरा गर्दैछौं श्रीदेवीको फिल्म 'मम' को।
सन् २०१७ मा रिलिज भएको मम श्रीदेवीको ३०० औं र अन्तिम फिल्म हो।
चार भाषामा प्रदर्शन भएको यो फिल्म ब्लकबस्टर हिट भएको थियो। दर्शक र समीक्षकबाट धेरै सकारात्मक प्रतिक्रिया पाएको यो फिल्ममा श्रीदेवीको अभिनयको खुब प्रशंसा भयो। यही फिल्मबाट श्रीदेवीले सर्वश्रेष्ठ अभिनेत्रीका रूपमा राष्ट्रिय फिल्म पुरस्कार (मरणोपरान्त) पाइन्। त्यस्तै यो फिल्मले ६ विधामा फिल्मफेयर जितेको छ।
फिल्ममा अक्षय खन्ना र नवाजुद्दिन सिद्दिकीको पनि दमदार अभिनय छ। यी तीन कलाकारको अभिनयले पनि फिल्मलाई झनै बलियो बनाउन मद्दत गरेको छ।
मम एक आमाको बदलाको कथा मात्र होइन, चाहे सौतेनी होस्, एक आमाले गर्ने बलिदान, माया र न्यायका लागि गरेको संघर्षको कथा पनि हो। भावनात्मक र रोमाञ्चक बदला कथा हेर्न मनपराउनेका लागि मम राम्रो खुराक हुन्छ।क
हेर्नुहोस् युट्युबमाः
