गुड फ्राइडे सिनेमा
अनौठो, रहस्यमयी र रोचक कथा हेर्न मन छ?
आज गुड फ्राइडे सिनेमामा हामीले यस्तै तमिल फिल्म सिफारिस गरेका छौं — ब्ल्याक।
सन् २०२४ मा रिलिज भएको यो फिल्म थ्रिलले भरिएको र सनसनीपूर्ण छ। यसको क्लाइमेक्सले दर्शकको मथिंगल हल्लाइदिन्छ।
फिल्म सन् १९६४ को एक रातबाट सुरू हुन्छ। बर्खाको त्यो रात तीन साथीहरू ललिता, गणेश र मनोहर गाडीमा बसेर कुरा गरिरहेका हुन्छन्।
गणेश र ललिता एकअर्कालाई प्रेम गर्छन्। तर दुवैका परिवारले यो सम्बन्ध स्वीकार नगरेकाले उनीहरूले भागेर बिहे गरेका हुन्छन्। उनीहरूलाई बस्ने ठाउँ दिएर सहयोग गरिरहेका मनोहरले सबै ठीक हुन्छ भन्दै सम्झाइरहेका हुन्छन्। जब गणेशले ललिता गर्भवती भएको सुनाउँछन्, तब मनोहर एकदम चुप हुन्छन्।
बाटामा ललिताले एक मूर्तिलाई नियालेर हेर्छिन्।
मनोहरले उनीहरूलाई बस्ने ठाउँ दिन्छन् र आफू मदिरा पिउन थाल्छन्। उनी खुसी देखिए पनि भित्रभित्रै जलिरहेका हुन्छन्। किनभने उनले ललितलाई मनपराउँछन्।
मदिराको मातपछि, मनोहरले आफ्नो गाडीबाट बन्दुक निकाल्छन्। एकाएक घर र सडकका बत्तीहरू निभ्दै, बल्दै गर्न थाल्छन्। मनोहर ललिताहरूको कोठाभित्र पस्नुअघि नै उनले गोली चलेको आवाज सुन्छन्। कोठामा जाँदा गणेश र ललितालाई मरेको अवस्थामा देख्छन्।
उनी चकित खान्छन्, उनीहरूको हत्या कसले गर्यो?
अनि कथा एकैपटक ६० वर्षपछि, वर्तमान समयमा पुग्छ।
वसन्त र आरन्या नामका नवविवाहित जोडी हुन्छन्। क्लबमा रमाइलो गरिरहेका बेला एकाएक वसन्तको एक युवकसँग झगडा पर्छ। घर फर्किँदै गर्दा बाटामा ती युवकले आरान्या र वसन्तलाई धम्की दिन्छन्।
आरान्यालाई डर लाग्छ। मन बहलाउन उनीहरू आफ्नो भर्खर किनेको नयाँ अपार्टमेन्टमा जान्छन्। त्यही बेला समाचारहरूमा खबर आइरहेको हुन्छ कि, आज चन्द्रमा पृथ्वीको सबभन्दा तल आउँदैछ। यसलाई 'सुपरमून' पनि भनिन्छ र यो ७० वर्षपछि आएको हो। यसअघि सन् १९६४ मा देखिएको थियो।
अपार्टमेन्ट पुगेपछि उनीहरूले अनौठो घटनाहरूको सामना गर्छन्।
अपार्टमेन्ट नयाँ भएकाले त्यहाँ कोही बसेका हुँदैनन्। उनीहरू नै पहिलो बासिन्दा हुन्छन्। वसन्तले त्यहाँ एक मूर्ति देख्छन् जुन उनलाई पहिले पनि देखेझैं लाग्छ। अपार्टमेन्टको चाबी दिन आएकालाई मूर्तिबारे सोध्छन्।
ती व्यक्तिहरूले यो मूर्ति चालीस/पचास वर्षअघि कुनै गाउँमा लैजान लागिएको तर विभिन्न कारणले नसकेर यहीँ रहेको बताउँछन्।
वसन्त र आरान्या सामान किन्न जान्छन्। सुपरमार्केटमा क्लबमा झगडा परेका तिनै युवक भेटिन्छन्। ती युवकले उनीहरूसँग माफी माग्छन्। तर वसन्तले ती युवकको बाइक फोडेर अब हिसाब बराबर भयो भन्छन्।
उनीहरू अपार्टमेन्ट पुग्दा चौकिदार हुँदैनन्। पूरै कोलोनी खाली हुन्छ। वसन्त र आरान्या रोमान्स गर्नै लाग्दा कोही आउँछ। गेट खोलेर हेर्दा वसन्तका साथी सुरेश आएका हुन्छन्।
वसन्तले किन आएको भनेर सोध्दा सुरेशले तिमीले बोलाएर आएको भन्छन्। वसन्तलाई अचम्म लागिरहन्छ। केही समयपछि सुरेश जान्छन्।
त्यसपछि अपार्टमेन्टमा अनौठा गतिविधि हुन थाल्छन्। बत्ती जान्छ। त्यहीँ छिमेकी अपार्टमेन्टमा बत्ती बलिरहेको हुन्छ। कोही नभएको कोलोनीमा को छ?
यसपछि रहस्यमयी आवाजहरू पनि आउँछन्।
वसन्त र आरान्या छक्क पर्छन्। उनीहरू बत्ती बलिरहेको अर्को घरको बाहिर उभिएर भित्र हेर्छन्।
त्यसभित्र उनीहरूले जे देख्छन्, यसले उनीहरूको होसहवास उडाउँछ।
अब वसन्त र आरान्याको अवस्था के होला?
के उनीहरू यो भयानक अनुभवबाट निस्केलान्?
मनोहर, ललिता र गणेशको कथा उनीहरूसँग कसरी जोडिन्छ?
यी सबै जान्न फिल्म हेर्नुहोला।
फिल्ममा बारम्बार आइरहने थ्रिल र मोडले दर्शकलाई धुकचुक धुकचुक बनाइरहन्छ। समीक्षकहरूले पनि यसलाई उम्दा थ्रिलर र रहस्यमयी फिल्म भनेका थिए।
हेर्नुहोस् फिल्म 'ब्ल्याक'
