गुड फ्राइडे सिनेमा
आज फ्रेबुअरी १४, भ्यालेन्टाइन्स डे। संसारका धेरै ठाउँमा यो दिनलाई प्रेम दिवसका रूपमा मनाइन्छ। यसै दिनको अवसरमा हामीले आजको गुड फ्राइडे सिनेमामा तीन वटा प्रेमकथा सिफारिस गरेका छौं।
यी तीन फिल्म तीन देशका हुन् – चीन, भारत र नेपाल। तीन वटैले बेग्लाबेग्लै र अनौठा कथा भन्छन्। र, यी तीन वटै फिल्म आ-आफ्ना ठाउँमा उत्कृष्टको सूचीमा पर्न सफल छन्।
पहिले हेर्न छुटाउनुभएको भए अब फेरि यी फिल्म हेर्न सक्नु हुनेछ जुन युट्युबमा उपलब्ध छन्।
गाउँकै पहिलो प्रेमिल जोडीको मन छुने कथाः द रोड होम (चीन)
यो फिल्म एउटा प्रेमिल जोडीको कथा हो; एउटा गाउँकी युवती र त्यहाँ पढाउन आएका शिक्षकको। सँगै एक श्रीमान, बाबु, छिमेकी र शिक्षकको अन्त्येष्टिको पनि कथा हो।
यो कथा विगतमा फर्केर सुनाउँछन् लु युशेङले। सामान्यतया अरू फिल्ममा विगतको कथा श्यामश्वेतमा देखाइन्छ भने वर्तमानको रंगीन। फिल्म 'द रोड होम' ले ठीक उल्टो गरेको छ। त्यसैले डेढ घन्टाको यो फिल्ममा श्यामश्वेत र रंगीन दृश्य झन्डै आधा आधा छ।
फिल्मको नामजस्तै यसको सुरूआत युशेङ घर जाँदै गरेको बाटोको दृश्यबाट हुन्छ। चारैतिर हिउँले ढाकेको छ, मौसम चिसो छ। त्यति नै चिसो हुन्छ युशेङको मन।
सहरमा बस्ने उनी आफ्नो गाउँ फर्किँदै छन्। उनका बुबाको मृत्यु भएको हुन्छ। बुबा गुमाएको खबरले उनी दुखी छन्, योभन्दा बढी चिन्ता आमाको छ। बुबाबिना आमाको अवस्था के हुने होला भनेर उनी आत्तिएका छन्।
बुबाको अन्तिम संस्कारको तयारी चल्दै गर्दा युशेङले आफ्ना आमाबाको प्रेम कथा सुनाउँछन्।
लु चाङ्यु नयाँ गाउँमा शिक्षक भएर आउँछन्। उनलाई देख्ने बित्तिकै झाओ दीको मन फुरूंग हुन्छ। दी चाङ्युलाई मनपराउँछिन्। पहिलो नजरको प्रेम, त्यो गाउँकै पहिलो प्रेम!
चाङ्युलाई सुरूमा दीबारे कुनै जानकारी हुँदैन। दी भने उनलाई हेर्न स्कुल छेउछाउ जाने अनेक बहाना खोज्न थाल्छिन्। उनको मनमा चाङ्युले राज गरिसकेका हुन्छन्।
एकदिन उनीहरूको भेट हुन्छ। त्यसपछि चाङ्युलाई पनि दी मनपर्छिन्। उनीहरूको मन साटिन्छ। माया अंकुराउन थाल्छ।
सपनाजस्तै यो मीठो अनुभूति हुँदै गर्दा अचानक समस्या खडा हुन्छ। चाङ्युलाई सरकारले सहर फिर्ता बोलाउँछ। उनी जान्छन्। गाउँमा उनी जानुका अनेक कारण अड्कल गरिन्छ।
उनी नफर्किएपछि दीको मन कुँडिन्छ। हरेक दिन उनी चाङ्युको प्रतीक्षामा बिताउँछिन्। ठन्डीको कुनै पर्वाह नगरी उनी चाङ्युको बाटो हेर्छिन् र एकदिन ढल्छिन्।
गाउँलेलाई लाग्छ- उनी अब बाँच्दिनन्। चाङ्यु फर्केर कहिल्यै आउँदैनन्!
के होला यो प्रेमिल जोडी र प्रेम कथाको भविष्य?
यसका लागि फिल्म 'द रोड होम' हेर्नुहोला।
वर्षकै सुपरहिट बनेको फिल्मः प्रेमम (भारत)
सन् २००२।
यो बेला जर्ज डेभिड स्कुल पढ्दै गरेका किशोर हुन्छन्। आफूले चर्चमा देखेकी किशोरी मेरीलाई मन पराउँछन्। एकै स्कुल र गाउँका भए पनि जर्जले मेरीलाई आफ्नो मनको कुरा भन्न सकिरहेका हुँदैनन्।
कहिले स्कुलमा त, कहिले बाटामा, कहिले घरै पुगेर त कहिले चिठी दिएर, अनेक गर्दा पनि मेरीलाई प्रेम प्रस्ताव राख्ने उनको प्रयास सफल भइरहेको हुँदैन।
एक दिन उनलाई मौका पर्छ। जसै उनी मेरीलाई मनको कुरा भन्न लागेका हुन्छन्, उनले थाहा पाउँछन् मेरी अर्कैलाई मनपराउँछिन्।
सन् २००५ को समय।
जर्ज कलेज पढ्ने भइसकेका छन्। उनी कलेजमा खासै अनुशासित हुँदैनन्। आफ्ना स्कुलदेखिका दुई साथीसँग मिलेर दादा पल्टेर बसेका हुन्छन्।
एक दिन जुनियर विद्यार्थीलाई चिढ्याउने क्रममा उनको भेट मलारसँग हुन्छ। विद्यार्थी भन्ठानेर जर्जले उनलाई पनि जिस्काउँछन्, तर मलार कलेजकी लेक्चरर हुन्छिन्।
यसपछि जर्जको व्यवहार बदलिन्छ। उनी मलारलाई मनपराउन थाल्छन्। मलारले पनि उनलाई मनपराउँछिन्। तर एक दिन फेरि जर्जको प्रेमको डुंगा डुब्छ।
सन् २०१६।
जर्ज तीस वर्षका भइसकेका हुन्छन्। प्रेमको असफलताको पीडा उनीभित्र गुम्सिरहेको हुन्छ। आफ्नो साथीसँग मिलेर बेकरी क्याफे चलाइरहेका हुन्छन्। एक दिन उनको क्याफेमा एउटी युवती आउँछिन्।
ती युवती उनीभन्दा उमेरमा केही सानी हुन्छिन्। सुरूमा जर्जले उनलाई चिन्दैनन्, तर ती युवतीसँग उनको धेरै पुरानो सम्बन्ध हुन्छ।
अनि तिनै युवतीमार्फत् जर्जको प्रेम जीवनको पूरा चक्र घुम्छ।
यो चक्र घुम्दा कस्ता कस्ता मोड आइपर्छन्? जर्जको असफल प्रेमको शृंखला कसरी चलिरहन्छ वा टुंगिन्छ?
यसका लागि हेर्नुहोस् मलयालम फिल्म 'प्रेमम'।
सन् २०१५ मा रिलिज भएको प्रेमम सुपरहिट फिल्म हो जुन एक साधारण युवकको प्रेमकथा वरिपरि घुम्छ। तर यो प्रेमकथा मात्र होइन, एक मानिसको जीवनका चरण र आरोह-अवरोहको पनि कथा हो।
फरक खालको प्रेमकथा भन्ने फिल्मः कथा (नेपाल)
प्रशान्त रसाइलीको निर्देशनमा बनेको फिल्म 'कथा' एक जना बोल्न नसक्ने युवती कुमारी र भकभकाएर बोल्ने युवक कान्छाको कथा हो।
कुमारी र कान्छा गहिरो प्रेममा परेका छन्।
यी दुई प्रेमी एक अर्काबाट छुट्टिन चाहँदैनन्। तर बिहे गर्ने पैसा जुटाउन कान्छा चौंरी लिएर हिमालतिर जानुपर्ने परिस्थिति आउँछ। कुमारीलाई फर्केर बिहे गर्ने बाचासहित कान्छा साथी सोनामसँगै हिमालतिर उक्लिन्छन्।
कान्छालाई कुरिरहेकी कुमारीको बिहे अगावै पेटमा बच्चा हुर्कन थाल्छ। यो घटनाले कुमारी उनकी आमा र समाजको नजरबाट तिरस्कृत हुन्छिन्। यो सबै कुराबाट बेखबर कान्छा धेरै टाढा हुन्छन्।
अब यी दुई प्रेमीको भेट कहिले र कस्तो अवस्थामा होला? या, यी दुईको भेटै नहुने अवस्था आउला? यसपछिका घटनाले दर्शकका यस्तै जिज्ञासा मेटाउने छन्।
फिल्ममा सौगात र उषासँगै सोनाम राईले कान्छाका साथीका रूपमा महत्वपूर्ण भूमिका निर्वाह गरेका छन्। मन छुने कथा, सुन्दर अभिनय र मनै हर्ने सिक्किमको हिमाली गाउँको दृश्यले 'कथा' फिल्म लोभलाग्दो बनेको छ। खास गरी यो फिल्मको कथा न्यारेट गर्ने शैली मीठो छ।
कान्छा र कुमारीको प्रेमजस्तै फिल्ममा कान्छा र सोनामको मित्रताले पनि मन जित्छ।
सन् २०११ मा रिलिज भएको 'कथा' लामो समयसम्म मनमा बास बस्ने खालको फिल्म हो।
