'हामी काठमाडौंमा बसोबास गर्ने, भेट पहिलोपटक हस्पिटलमा भएको हो,' पोखरामा आयोजित नेपाल लिटरेचर फेस्टिभलमा कवि भूपी शेरचनकी पत्नी कान्ति शेरचनले स्मरण गर्दै भनिन्, 'यसरी भेटघाट मात्रै हाम्रो करिब ४/५ वर्ष जति भयो होला।'
पोखरामा बिहीबारदेखि सुरू भएको फेस्टिभलमा साहित्यमा रूचि राख्नेको जमघट छ। यही क्रममा 'स्मृतिमा भूपी' सेसनमा भूपी पत्नी कान्ति तथा छोरी कविता वक्ताका रूपमा उपस्थित थिए।
कार्यक्रम उद्घाटन भइसकेपछिको दोस्रो सेसनका क्रममा उनीहरूसँग सहजकर्ताका रूपमा बसन्त थापाले संवाद गरे।
सहजकर्ता थापाले भूपी र कान्तिको प्रेम, विवाह र उमेरको फरकपनको विषयमा प्रश्न राख्दै गर्दा कान्तिले भनिन्, 'अरूको २०/२५ वर्ष हुन्थ्यो होला, तर हाम्रो त जम्मा १२ वर्षको फरक मात्रै हो।'
भूपी थकालीको छोरो, कान्ति राणा खानदानकी छोरी। उनीहरूको जात/धर्म मिल्दैनथ्यो। अन्तरजातीय विवाहलाई सफल बनाएर समाजसंगै अगाडि बढ्नु त्यो बेला चुनौती थियो। त्यसमाथि भूपी पहिले विवाहित थिए।
भूपीसँगको विवाहलाई धेरै समयसम्म कान्तिको परिवारले स्वीकार गर्न सकेन।
कान्तिले भनिन्, 'हाम्रो सम्बन्धलाई प्रेमपछिको विवाह भने पनि हुन्छ। धेरै समय हामीलाई मेरो परिवारबाट स्वीकार भएन। छोरी कविताको जन्म भएपछि भने सबै पक्षबाट हाम्रो सम्बन्धलाई स्वीकार गरियो।'
भूपीको पहिले नै विवाहित भएको विषयमा कान्तिलाई राम्ररी जानकारी थियो। उनलाई लाग्छ, त्यसरी स्वीकार गर्न सक्नु पनि सायद मायाप्रेम पो थियो कि!
यता भूपीकी छोरीको अनुभव बेग्लै छ। साहित्यकारका रूपमा भन्दा उनले उत्कृष्ट बुबाका रूपमा भूपीलाई कविताले चिन्ने मौका पाइन्। सुरूआतको समयमा कवितालाई बुबा भूपीको ख्यातीबाट त्यति खुसी मिल्थेन। बुवालाई भेट्न किन यति धेरै जना आउँछन् भन्ने लाग्थ्यो रे!
'पछि बुझ्दै गएँ, अहिले त आफूलाई भूपीको छोरी हुँ भनेर चिनाउन पाउँदा गर्व लाग्छ,' उनले भनिन्।
कहिलेकाहीं भूपीलाई राजाको समर्थकका रूपमा समेत अर्थ्याइने गरेको छ। यसमा कविताको गुनासो छ।
'उहाँ राजा भन्दैमा सबै राजाको समर्थक हुनु भएन, वीरन्द्रको मात्रै हो, वीरेन्द्रको विचारबाट प्रभावित हुनुभयो,' उनले भनिन्, 'पञ्चायतको समर्थक भने कहिले हुनुभएन, यसमा सायद भ्रम पर्यो कि?'
साहित्य बजार वा भूपीको विषयमा परिचर्चा चलिरहँदा उनको मदिरा पिउने बानीको खुबै चर्चा हुने गर्छ। 'मदिरासंग भूपीको लगनगाँठो कसिएको थियो भन्ने खुब चर्चा चल्छ नि?' भन्ने सहजकर्ता थापाको प्रश्नमा जवाफ दिँदै कविताले भनिन्, 'यो हल्ला गलत थियो, पहिले पिउनुहुन्थ्यो होला, तर मेरो जन्म भएसकेपछि भने पिउने बानी धेरै हदसम्म छुटिसकेको थियो रे!'
हरेक मान्छेका आ–आफ्नै कमीकमजारी हुनसक्छन्। कवितालाई लाग्छ, सायद भूपीको पनि थियो। 'कमीकमजोरीका बाबजुद उहाँ हाम्रो लागि उत्कृष्ट अभिभावक हुनुहुन्थ्यो,' कविताले भनिन्।
कविता आफैले बुबा भूपी शेरचनलाई समर्पित गर्दै किताब समेत प्रकाशित गरेकी छन्। साथीले उनलाई बुबा भूपीको विषयमा लेख्न हौस्याइरहन्थे। तर उनले सक्दिन भन्दै उनी टारिरहन्थिन्। पछि भने आफूले आफूलाई हिम्मत दिएर किताब प्रकाशित गरेको बताइन्।
उनले भनिन्, 'मेरो जोसंग राम्रो चिनारी थियो, उहाँहरूसंगको अनुभवलाई समेटेर किताब लेखेको हुँ।'
