दक्षिण भारतीय अभिनेता अल्लू अर्जुनको बहुप्रतिक्षित फिल्म 'पुष्पा २: द रूल' प्रदर्शनको तयारीमा छ।
यो फिल्म डिसेम्बर ५ देखि हलमा प्रदर्शन हुनेछ। यसैबीच फिल्मका निर्माता रवि शंकरले 'पुष्पा ३' बन्ने बताएका छन्। उनले 'पुष्पा २' को सफलतामा निर्भर हुने समेत बताएका हुन्।
'पुष्पा २' को प्रदर्शन मिति नजिकिदै गर्दा निर्माण टिम प्रमोशनमा जुटेका छन्। बिहीबार हैदराबादमा एक प्रेस मिट राखिएको थियो। उक्त कार्यक्रममा रवि शंकरले 'पुष्पा ३' निर्माणको जानकारी दिएका हुन्।
केही समयअघि अभिनेता अल्लू अर्जुनले बर्लिन फिल्म फेस्टिभलमा 'पुष्पा ३' बन्ने बताएका थिए। उनले आफूहरूसँग निकै राम्रो कहानी रहेको बताएका थिए।
सुकुमार निर्देशित फिल्म 'पुष्पा २' मा अल्लु अर्जुनसँगै रश्मिका मन्दना, फहद फासिल, धनुञ्जय, राव रमेश, सुनिल, अनसूया भारद्वाज र अजय घोषको अभिनय छ। नवीन येर्नेनी र रविशंकर यलमाञ्चिली फिल्मको निर्माता हुन्।
