बलिउड अभिनेता सुनिल शट्टीकी छोरी अथिया शेट्टी र भारतीय क्रिकेटर केएल राहुलको विवाहबारे एकपछि अर्को खबर बाहिर आउने सिलसिला जारी छ।
जनावरी २३ अर्थात् माघ ९ गते भनिएको यो जोडीको विवाहको खबरले फिल्म क्षेत्र, मिडिया र सर्वसाधारणसम्मको ध्यान खिचेको छ।
भारतीय सञ्चारमाध्यम इटाइम्सका अनुसार सुनिल शेट्टीको खंडालास्थित बंगलामा भव्य रुपमा उनीहरूको विवाह समारोह आयोजना हुनेछ।
अथिया र केएलको विवाह कार्यक्रम केही दिनसम्म चल्नेछ। जनावरी २१ मा संगीत समारोह, जनावरी २२ मा मेहेन्दी र जनावरी २३ मा विवाह हुनेछ।
सुनिल शेट्टीले आफ्नी छोरीको विवाहलाई गोप्य राख्न सक्दो प्रयास गरिरहेका छन्। अथिया र केएलको दुवै परिवारले विवाहबारे कुनै जानकारी दिएका छैनन्।
भारतीय सञ्चारमाध्यम पत्रिकाका अनुसार उनीहरूको विवाहमा करिब १ सय जना व्यक्ति सहभागी हुनेछन्। कुनै तस्बिर वा भिडिओहरू लिक नहोस् भनेर विवाहको क्रममा पाहुनाको मोबाइल फोन जफत गरिनेछ।
उक्त समारोहमा थोरै बलिउड कलाकार सहभागी हुनेछन् जसमा सलमान खान, ज्याकी श्राफ, अक्षय कुमारको नाम सामेल छ। साथै विवाहमा क्रिकेट खेलाडी पनि सहभागी हुनेछन्।
अथिया र केएलले २०२२ मा इन्स्टाग्राममार्फत आफूहरू प्रेम सम्बन्धमा रहेको बताएका थिए।
